Tuꞌn kkꞌonte xnakꞌtzbil tuj tumelxix
2
Atzun teya,
kꞌonxa ju xnakꞌtzbil cye,
aju xnakꞌtzbil mintiꞌ tpaltil.
2 Kꞌmanxa cye ansyan tuꞌn tten cynabl ex tuꞌn tten cychiylal,
ex tuꞌn cyjacꞌunte cyib,
ex tuꞌn tten cyocslabl mintiꞌ tpaltil,
ex tuꞌn tten cycꞌujlalil axix toc ex tuꞌn tten cypasens tuꞌn ticꞌx cyuꞌn.
3 Ax icx kꞌmanxa cye tij xuꞌj tuꞌn tten tchiylal Dios cye tuj tcyakil,
ex tuꞌn miꞌn cyoc siꞌmil yol,
ex tuꞌn miꞌn cyoc cꞌal kꞌeꞌn,
nok oꞌcx tuꞌn cykꞌonte xnakꞌtzbil tiꞌj ju baꞌn,
4 ex tuꞌn t-xi cykꞌoꞌn tij xuꞌj xnakꞌtzbil cye ke xuꞌj kꞌapojx ke tuꞌntzun cycꞌujlante cychmil cyucꞌix cyal,
5 ex tuꞌn cyjacꞌunte cyib,
ex tuꞌn cyten sak tuj cyanmi,
ex tuꞌn toc cycwentin cyja,
ex baꞌn cymod,
ex tuꞌn t-xi cyniman cychmil;
tuꞌntzun miꞌn cyyolin xjal mya baꞌn tiꞌj tyol Dios.
6 Ax icx kꞌonxa cynabl cuꞌxun tuꞌn cyjacꞌunte cyib.
7 Tuj tcyakil binchama baꞌn tuꞌn toca te jun yecꞌbil cye mastl,
kꞌonxa xnakꞌtzbil cabalxix,
ex atwit toclen tyola.
8 Aju t-xnakꞌtzbila mintiꞌwt tpaltil ex mintiꞌ tuꞌn cyyolin xjal tiꞌj,
tuꞌntzun ttzaj tchꞌixwi aj kꞌoj cyiꞌje,
ex tuꞌn miꞌn tyolin jun yol mya baꞌn cyiꞌje.
9 Kꞌonxa cynabl majen tuꞌn cynimante cyyol cypatrón,
ex tuꞌn cybinchante aju baꞌn tuꞌn cytzalaj cypatrón cyiꞌj,
ex tuꞌn miꞌn taj cymojtzaꞌn cyyol cypatrón,
10 ex tuꞌn miꞌn cyelkꞌan,
nok oꞌcx tuꞌn toc cycwentin tcyakil,
tuꞌntzun tel cynicꞌ xjal tiꞌj ka tbanilxix t-xnakꞌtzbil Dios aju Clol ke.
11 Porque ma tzaj tyecꞌun Dios t-xtalbil cye cycyakil xjal tzaꞌn tten tuꞌn cyclet.
12 In tkꞌoꞌn t-xtalbil Dios xnakꞌtzbil ke tuꞌn tcyaj kcolin aju mya baꞌn ex aju achbil twitz txꞌotxꞌ ex tuꞌn tten knabl tuj tkꞌijlalil jaꞌlo,
ex tuꞌn kbet tuj tumelxix,
ex tuꞌn kniman Dios.
13 Ex in tkꞌoꞌn xnakꞌtzbil ke tuꞌn kayon tiꞌj Jesucrist oc tul,
porque jun tzalajbil oc tjapun jlu.
Aju Jesucrist Kdios maꞌxix toclen ex Clol ke,
oc tyecꞌunte tib in koptzꞌaj wen.
14 Xi tkꞌon tib Jesucrist tuꞌn tcyim tuꞌn tchjet kil tuꞌn,
tuꞌntzun kcolpet tuꞌn tuj tcyakil mya baꞌn,
ex tuꞌn t-sakix tuj kanmi tuꞌn,
tuꞌn koc te jun tnam tecuxix ex at-xix kgan tuꞌn kbinchante aju baꞌn.
15 Kꞌmanxa jlu cye ocslal,
kꞌonxa cynabl ex cawinxa ke,
atwit tipumal tyola.
Miwt jun tzꞌel icꞌun teya.