3 Aya Timotey,

cucx in tzaj nnaꞌne tuj nnaꞌj Diose kꞌijl ex konicꞌan ex in xi nkꞌoꞌne chjonte te Dios aju in chin ajbene te tuꞌn tcyakil wanmiye ic tzaꞌn o cybincha ke nxeꞌchele.

4 Cucx in tzaj nnaꞌne tej tetz taꞌl twitza,

waje tuꞌn toc nqueꞌyine twitza tuꞌn tnoj wanmiye tuꞌn tzalajbil.

5 In tzaj nnaꞌne aju tocslabla axix toc,

ic tzaꞌn o ten tocslabl tyaya Loida ex ic tzaꞌn o ten tocslabl ttxuꞌya Eunice,

ex kꞌukl ncꞌuꞌje tiꞌj,

icx teya at tocslabla.

6 Cyjaꞌtzun cxel nkꞌoꞌne tnabla tuꞌn tajbenxix tuꞌna aju toclena xtcꞌama tuꞌn Dios tej tcub nkꞌoꞌne nkꞌabe tibaj twiꞌya.

7 Porque mintiꞌ ma tzaj tkꞌoꞌn Dios xobajil tuj kanmi,

nok oꞌcx tuꞌn tten kipumal ex kcꞌujlalil ex tuꞌn kjacꞌunte kib.

8 Cyjaꞌtzun,

miꞌn chꞌixwiya tuꞌn t-xi tchicꞌbaꞌna tkanil tiꞌj Kajaw,

ex miꞌn chꞌixwiya wiꞌje pres kine tuꞌn tlaj Kajaw,

nok oꞌcx tzicꞌxcu tuꞌna junx wucꞌile tuꞌn tlaj tkanil colbil,

tzicꞌxcu tuꞌna tuꞌn tipumal Dios.

9 Ate Dios ma clon ke ex ma ko ttxoc tuꞌn kten oꞌcx tuꞌn kajben te;

mya tuꞌnju kakꞌunben ma ko ttxoc Dios,

nok oꞌcx tuꞌnju cub t-ximan icju,

ex tuꞌnju t-xtalbil tzaj tkꞌoꞌn ke atxix t-xe tnejel,

tuꞌnju at kmojbabl kib tucꞌil Jesucrist.

10 Pero ma tzaj tyecꞌun Dios t-xtalbil ke jaꞌlo tuꞌnju tul-len Clol ke Jesucrist,

porque o tzꞌel kꞌiꞌn tipumal camic tuꞌn Jesucrist ex ma cub tkꞌoꞌn ju chwinklal tuj kꞌanchaꞌl ex tuꞌn miꞌn knaj.

Tcyakil jlu ma binchet nok tuꞌnju tkanil colbil.

11 Ma chin oc kꞌoꞌne tuꞌn Dios pacbalte tkanil colbil,

ex ma chin oque apostl tuꞌn t-xi nkꞌoꞌne xnakꞌtzbil cye xjal mya judiy.

12 Icxtzun tuꞌn ticꞌx tcyakil jlu wuꞌne,

pero mlay chin chꞌixwiye,

porque baꞌn wuꞌne alcye ma wocslaye,

ex kꞌukl ncꞌuꞌje tiꞌj at tipumal tuꞌn tcꞌuꞌnte aju ma txi wokxenane te,

cucx cꞌuꞌn tuꞌn oc tul canun tkꞌijlalil oc tul Crist juntl maj.

13 Tzyuma ju yol mintiꞌ tpaltil,

aju o tbiya weye,

ex tzꞌajbenx te jun yecꞌbil teya ex tuꞌn tten tocslabla ex tcꞌujlalila,

tuꞌnju at kmojbabl kib tucꞌil Jesucrist.

14 Cꞌuꞌnxa aju yol axix toc ma tzaj okxenan teya tuꞌn Dios;

cꞌuꞌnxa tuꞌn tipumal Xewbaj Xjan aju najl tuj kanmi.

15 Baꞌn tuꞌna cycyakil keju ateꞌ tuj txꞌotxꞌ Asia ma chin cyaj coline cyuꞌn,

ajun Figelio cyxol tucꞌix Hermógenes.

16 Cuchiwt tuꞌn ttzaj kꞌakꞌan tcꞌuꞌj Kajaw cyiꞌj keju ateꞌ tuj tja Onesíforo,

porque nimcu maj o kꞌukbanjtz ncꞌuꞌje tuꞌn,

ex mintiꞌ o chꞌixwi wiꞌje tej ntene tuj pres,

17 Tej tul aj tuj tnam Rom oc tililxix tuꞌn tuꞌn tjyon wiꞌje,

ex in cnete tuꞌn.

18 Cuchiwt tuꞌn ttzaj kꞌakꞌan tcꞌuꞌj Kajaw tiꞌj tuj tkꞌijlalil tzul.

Ex baꞌnxix tuꞌna,

nimcu o tzꞌonin kiꞌj tej kten tuj tnam Efeso.