6
Cycyakil keju biꞌx tzyuꞌn ke te majen,
che ximan cyiꞌj cypatrón tuꞌn tten tchiyilal cypatrón tuj cywitz,
tuꞌntzun miꞌn cyyolin xjal mya baꞌn tiꞌj Dios,
ax icx tiꞌj ju xnakꞌtzbil in kkꞌoꞌn.
2 Akeju majen ocslal cypatrón,
mya tuꞌn miꞌn t-xi cyniman cypatrón tuꞌnju cyerman cyib tuj ocslabl,
nok oꞌcx tuꞌn cyajbenxix cye;
porque akeju patrón jatum in che ajben,
ocslal ke ex at cycꞌuꞌj majen cyiꞌj.
Xnakꞌtzanxa jlu cye ex kꞌonxa cynabl.
Baꞌn tuꞌn kniman te Dios ex tuꞌn ktzalaj tiꞌj ju in tzaj tkꞌoꞌn ke
3 Ka at jun xjal in tkꞌoꞌn junxitl xnakꞌtzbil,
ex mintiꞌ taj tiꞌj ju tbanil yol aju tyol Kajaw Jesucrist,
ex mintiꞌ taj tiꞌj ju xnakꞌtzbil aju in tmaꞌn tuꞌn kniman te Dios,
4 jun xjal icju in jaw tniman tib,
ex mintiꞌ chꞌin baꞌn tuꞌn.
Toc tyab twiꞌ,
nok oꞌcx taj tuꞌn tkꞌojin tiꞌj yol;
tuꞌntzun jlu in tzaj tloꞌch cycꞌuꞌj xjal,
tucꞌix kꞌoj,
tucꞌix yasbil,
tucꞌix cyximbetz mya baꞌn.
5 Nok in che jaw cub tucꞌil yol,
ex mya tuj tumel taꞌ cynabl;
ma che el tzpet tiꞌj ju yol axix toc,
tuj cynabl aju tuꞌn cyniman te Dios tuꞌn cycambante nim.
[Paꞌmil tiba cyiꞌj xjal lu.]
6 Pero ka ma ko niman te Dios ex in ko tzalaj tiꞌj ju in tzaj tkꞌoꞌn ke,
atzun jlu jun cambabl maꞌxix.
7 Porque mintiꞌ chꞌin kꞌiꞌn kuꞌn tej kul itzꞌj,
ex mintiꞌ chꞌin cxel kiꞌn oc kicꞌ twitz txꞌotxꞌ.
8 Cyjaꞌtzun,
ka at kwa ex at kxbalun,
ko tzalaj tiꞌj jlu.
9 Porque akeju cyaj tuꞌn cyoc kꞌinun,
in che oc tuj joybil cyiꞌj ex in che cub tzꞌak tuj cꞌobil,
tuꞌnju in pon cycꞌuꞌj tiꞌj nimcu mintiꞌ tajben,
ex in che cꞌixbi tuꞌn;
tuꞌntzun jlu in tzaj xitbil cyibaj ex in cheꞌx tuj najen.
10 Porque aju tuꞌn tpon kcꞌuꞌj tiꞌj pwak,
atzun tlocꞌ tcyakil mya baꞌn;
ic tzaꞌn junjun o che el txalpuj tiꞌj cyocslabl ex nim o che cꞌixbisanjtz tuꞌnju o pon cycꞌuꞌj tiꞌj pwak.
Tuꞌn tcub tiꞌj mya baꞌn kuꞌn tuꞌn kocslabl
11 Atzun teya,
tel oka tiꞌj tcyakil jlu porque ajbela te Dios.
Tzꞌoc tililx tuꞌna tuꞌn tbinchanteya aju tzꞌaklxix,
ex tuꞌn tnimana te Dios,
ex tuꞌn tten tocslabla,
ex tuꞌn tten tcꞌujlalila,
ex tuꞌn tten tpasensa,
ex tuꞌn toca mans.
12 Tzꞌoc tililx tuꞌna ic jun soldad tuꞌn tcub tiꞌj mya baꞌn tuꞌna tuꞌn tocslabla;
tzyuma aju chwinklal te jumajx,
porque o txconjtza tuꞌn tten tchwinklala te jumajx tej t-xi tchicꞌbaꞌna tocslabla cywitz nimcu testiw.
13 Cxel ncyuwsaꞌne teya twitz Dios aju in tzaj kꞌonte cychwinklal cycyakil,
ex twitz Jesucrist aju xi chicꞌbante tiꞌj ju yol axix toc twitz Ponsio Pilat,
ex tuj tumelxix tyol.
14 Cxel ncyuwsaꞌne teya tuꞌn tjapun tuꞌna aju ma txi nmaꞌne teya,
miwt baj tchꞌexpuꞌna,
ex cucx tuꞌn ttena mintiꞌ tpaltila ocxi tul Kajaw Jesucrist.
15 Tujxix tkꞌijlalil ctzajel yecꞌun Jesucrist tuꞌn Dios.
Ate Dios in tzalaj te jumajx,
ex oꞌcx te at tipumal tibaj tcyakil.
Ate Dios Rey in cawin cyibaj cycyakil rey,
ex ate Dios Cyajaw cycyakil keju at cyoclen.
16 Oꞌcx te Dios mlay cyim,
atzun najl tuj spicꞌun aju mlay ko pon lakꞌeꞌ ttxlaj.
Mi jun xjal o tzꞌoc queꞌyinte Dios ex mlay bant tuꞌn toc tqueꞌyin xjal twitz Dios.
Oꞌcxwit te Dios tuꞌn tnimanjtz ex tuꞌn tten tipumal te jumajx.
Icxwitju.
17 Kꞌmanxa cye kꞌinun ateꞌ tuj tkꞌijlalil jaꞌlo tuꞌn miꞌn tjaw cyniman cyib,
ex tuꞌn miꞌn toc keꞌ cycꞌuꞌj tiꞌj kꞌinumabl porque mya segur te jlu;
nok oꞌcx tuꞌn tkeꞌ cycꞌuꞌj tiꞌj jun Dios itzꞌ,
porque tcyakil in tzaj tkꞌoꞌn Dios ke ex nimxix in tzaj tkꞌoꞌn tuꞌn ktzalaj tiꞌj.
18 Kꞌmanxa cye tuꞌn cybinchante aju baꞌn,
tuꞌntzun tchmet cyakꞌunben baꞌn ic tzaꞌn jun kꞌinumabl;
kꞌmanxa cye tuꞌn cybinchante xtalbil ex tuꞌn t-xi cysipan chꞌin cye mastl.
19 Atzun jlu tuꞌn tbaj cychmoꞌn ic tzaꞌn jun kꞌinumabl tuꞌn tajben cye tuj tkꞌijlalil tzul,
tuꞌntzun cytzyunte ju chwinklal axix toc.
Xi tcyuwsaꞌn Pablo tnabl Timotey alcye tuꞌn tbinchante
20 Aya Timotey,
cꞌuꞌnxa aju ma tzaj okxenan teya tuꞌn Dios.
Paꞌmil tiba tiꞌj cyyol ke xjal mya nimal Dios,
ex miꞌn txi tbiꞌna aju cyyol nokx gan.
Paꞌmil tiba tiꞌj cyxnakꞌtzbil keju in cymaꞌn ka at cyojtzkibl pero mya ax toc cyuꞌn.
21 Porque at junjun o che oc lpeꞌ tiꞌj ju ojtzkibl lu mya ax toc,
cyjaꞌtzun ma che el txalpuj tiꞌj cyocslabl.
Tenwt t-xtalbil Dios tucꞌila.
Icxwitju.