Alcye tuꞌn kbinchante cye mastl ocslal
5
Miꞌn tzꞌoc tilina jun tij xinak,
nok oꞌcx kꞌonxa tnabl ic tzaꞌncu tmana;
atzun cye cuꞌxun,
kꞌonxa cynabl ic tzaꞌncu termaniya.
2 Kꞌoꞌnca ke tij xuꞌj ic tzaꞌncu ttxuꞌya;
ex ke kꞌapoj kꞌoꞌnca ic tzaꞌncu tanba,
miꞌn cub t-ximana mya baꞌn cyiꞌj.
3 Baꞌn tuꞌn cyoc cwentit ke meba xuꞌj ka ax toc meba xuꞌj ke.
4 Pero ka at jun meba xuꞌj ateꞌ tal ex ka tal tchman,
il tiꞌj tuꞌn cyxnakꞌtzet jlu,
tuꞌn cyonin cye keju ateꞌ tuj cyja ex tuꞌn taj cykꞌoꞌn chꞌin t-xel cye keju jatum ẍe el itzꞌj,
porque baꞌn te jlu tuj twitz Dios.
5 Pero ju xuꞌj ax toc meba xuꞌj ex tjunalx ma cyaj ten,
kꞌukl tcꞌuꞌj tiꞌj Dios,
ex cucx tnaꞌn Dios ex in cubsan konicꞌan ex kꞌijl;
baꞌn tuꞌn toc cwentit.
6 Pero aju meba xuꞌj in xi tkꞌon tib tuj achbil,
banwtlo itzꞌ pero mer ic tzaꞌn cyimni.
7 Kꞌmanxa tcyakil jlu cye tuꞌn cyten mintiꞌ cypaltil.
8 Ka at jun ocslal mintiꞌ in che oc tcwentin ke terman,
ex ka mintiꞌ in che oc tcwentin keju ateꞌ tuj tja,
ma cyaj tcolin tocslabl,
ex mas ploj tmod twitz jun xjal mya ocslal.
9 Baꞌn tuꞌn ttzꞌibanjtz cybi meba xuꞌj,
oꞌcx keju ma japun 60 abkꞌi cyuꞌn ex nok junx cychmil otok ten,
10 ex ka biꞌn cyuꞌn cycyakil ka baꞌn cybinchben,
ex ka at cyal o cychꞌisa,
ex ka baꞌn che kꞌon cyposad xjal,
ex ka o tzꞌel cytxꞌjoꞌn cykan ke ocslal;
ex ka o che onin cye keju ateꞌ tuj bis,
ex ka cyakꞌ cyib tuꞌn cyonin tuj tcyakil akꞌuntl baꞌn.
11 Pero miꞌn cuꞌx tkꞌoꞌna cyajlal ke meba xuꞌj kꞌapojx ke,
porque oc tbaj cygan tiꞌj Crist,
cyajbil tuꞌn cymojeꞌ juntl maj.
12 Cyjaꞌtzun at cyil,
porque mintiꞌ ma japun cyuꞌn aju yol xi cytziyan nej.
13 Ax icx in che nakꞌet tiꞌj in che oc cyꞌaj,
nok in che bet ttzi cyja xjal;
ex mya nok oꞌcx cyꞌaj ke,
ax icx ẍtakꞌil yol ke,
ex nnoꞌcx cylamon cyib cyxol mastl,
in che yolin mya tuj tumel.
14 Cyjaꞌtzun,
akeju meba xuꞌj kꞌapojx ke,
waje tuꞌn cymojeꞌ ex tuꞌn ttzaj cyal ex tuꞌn tbant cycwentin keju ateꞌ tuj cyja;
ex tuꞌn miꞌn t-xi cykꞌoꞌn ambil teju aj kꞌoj tuꞌn tyolin mya baꞌn cyiꞌj.
15 Porque at junjun meba xuꞌj ma tzꞌel cypaꞌn cyib,
ma che oc lpeꞌ tiꞌj Satanás.
16 Ka at jun ocslal xinak ex ka jun ocslal xuꞌj,
ka at jun meba xuꞌj tuj cyja,
baꞌn tuꞌn toc cycꞌaꞌchan,
tuꞌntzun miꞌn tten jun iktz cyibaj mastl ocslal,
tuꞌntzun tcanun cꞌaꞌchbil cye keju axix toc meba xuꞌj ke.
17 Ke ansyan in che cawin tuj tumelxix,
baꞌn tuꞌn t-xi kꞌot mastl onbil cye,
axixpe keju cykꞌon cyib tuꞌn cypacban ex tuꞌn cykꞌon xnakꞌtzbil.
18 Porque in tmaꞌn tuj Tuꞌjil:
Miꞌn tzꞌoc cycꞌaloꞌne twi ttxaꞌn boys aju in bet tibaj triw tuꞌn tel ttxcꞌomil;
ax icx in tmaꞌn:
Aju akꞌnal,
tuj tumelxix tuꞌn tchjet twi tcꞌuꞌj,
chi tuj Tuꞌjil.
19 Ka at jun ma pon tucꞌila kꞌmalte ka at til jun ansyan,
miꞌn txi tbiꞌna tyol;
katzun at cabe ex ka ox testiw,
binxtzuna.
20 Akeju cucx cybinchan il,
kꞌmanxa cyil cywitz cycyakil tuꞌntzun cyxob mastl ocslal.
21 Cxel ncyuwsaꞌne teya twitz Dios ex twitz Kajaw Jesucrist ex cywitz ke t-anjel scꞌoꞌmaj ke tuꞌn,
japunx tuꞌna tcyakil jlu,
miꞌn txi tmaꞌn naja ka at til jun ocslal ka naꞌnxtok tbinteya,
ex miꞌn tzꞌoc tkꞌoꞌn twitza tiꞌj t-xilen xjal.
22 Mya jurat naj tuꞌn t-xi tkꞌoꞌna cyoclen ocslal,
tuꞌntzun miꞌn tel tikan tila tiꞌj ka ma cub tzꞌak tuj il.
Cwentin oc tiba tuꞌn tten tuj tanmiya sak.
23 Miꞌn txi tcꞌaꞌna junxte aꞌ,
cꞌanxa chꞌin vin tuꞌn tlaj tcꞌuꞌja ex tuꞌn tlaj cucx in tzaj tyabila.