3 Il tiꞌj cucx tuꞌn t-xi kkꞌoꞌne chjonte te Dios cyiꞌje erman;

tuj tumelxix jlu porque aju cyocslable cucx tchꞌiy ex cycyakile cucx tchꞌiy tcꞌujlalil teyle junjun cyxolxe.

4 Cyjaꞌtzun ax koꞌye in ko tzalaje cyiꞌje,

ex in xi kmaꞌne cye mastl ocslal etzan tuꞌn Dios tuj junjun tnam tzaꞌn cytene,

porque cucx tkeꞌ cycꞌuꞌje tiꞌj Dios tuj tcyakil cybise ex yajbil cyeye.

5 A jlu jun yecꞌbil ka ate Dios tzꞌaklxix ex in tbinchaꞌn tcyakil tuj tumelxix,

cyjaꞌtzun ma tzaj tkꞌoꞌn Dios cyoclene tuꞌn cyocxe tuj tcawbil Dios,

porque tuꞌn tlaj tcawbil Dios nnicꞌx cyuꞌne.

6 Porque tuj tumelxix ctzajel tkꞌoꞌn Dios yajbil cye keju in che yajlan cyeye,

7 ex tuj tumelxix ctzajel tkꞌoꞌn Dios ojlabl cyeye,

akeye in che yajlanjtze,

tuꞌn cyojlane junx kucꞌile oc tyecꞌunte tib Kajaw Jesús,

ctzajel tuj cyaꞌj cyucꞌix ke t-anjel at nim cyipumal,

ex in cꞌant tkan kꞌakꞌ cyiꞌj.

8 Tzul kꞌolte castiw cye keju cycꞌiꞌ tuꞌn cyojtzkiꞌnte Dios,

ex mintiꞌ in xi cyniman aju tkanil colbil tuꞌn Kajaw Jesucrist.

9 Ctzajel kꞌoꞌn cycastiw jlu tuꞌn cynaj te jumajx,

biꞌx che elel kꞌiꞌn twitz Kajaw,

mlay che ten twitz,

tuꞌnju at nim tipumal ex in koptzꞌaj t-spicꞌumal.

10 Ctzajel kꞌoꞌn cycastiw jlu tuj tkꞌijlalil tzul,

oc tul Jesucrist tuꞌn tjaw nimsaꞌn tbi cyuꞌn ke ocslal tiꞌj,

ex oc che jawil labin cycyakil keju ma che ocslan tiꞌj,

ax icx cyeye porque ma txi cyocslaꞌne aju yol xi kchicꞌbaꞌne cyeye.

11 Cyjaꞌtzun,

cucx in ko naꞌne Dios cyiꞌje tuꞌn ttzaj tkꞌoꞌn Dios cyipumale tuꞌn cybete tuj tumelxix twitz,

porque ma che txconjtze tuꞌn,

ex tuꞌn tjapun tcyakilju cyximbetze baꞌn tuꞌn tipumal Dios,

ex tuꞌn tjapun tcyakil akꞌuntl in cybinchaꞌne tuꞌn cyocslable,

12 tuꞌntzun tjaw nimset tbi Kajaw Jesucrist cyuꞌne,

icx cyeye tuꞌn cyjaw nimsaꞌne tuꞌn tuꞌnju t-xtalbil Kdios ex tuꞌn t-xtalbil Kajaw Jesucrist.