Aju xjal binchal ilxix
2
Atzun jaꞌlo,
erman,
at jun kyole cxel kmaꞌne tiꞌj tulel Kajaw Jesucrist ex tiꞌj ju kꞌij oc tul tuꞌn kcꞌlunte kib tucꞌil;
ko cubsale cywitze
2 tuꞌn miꞌn tchꞌexpet naj cynable,
ex miꞌn naj cynable.
Ka at jun pacbal yol ma pon cyucꞌile ex ka jun yol ex ka jun uꞌj in tmaꞌn ka ya ma tzul tkꞌijlalil tuꞌn tul Kajaw,
ex in cymaꞌn ka keye kyol,
miꞌn txi cynimane.
3 Miꞌn txi cykꞌon cyibe tuꞌn cycub sbuꞌne cyuꞌn xjal,
porque naꞌnxtok tul Kajaw,
nej che oquel ten xjal kꞌojlel tiꞌj Dios,
ex oc tyecꞌu tib ju xjal binchal ilxix,
aju cxel tuj najen.
4 Ate jlu cꞌoquel tzokpaj tiꞌj tcyakilju nnoꞌc cykꞌoꞌn xjal te cydios ex in che cꞌulun xjal cywitz,
ex cꞌoquel ten kꞌojlel cyiꞌj;
cbel keꞌ tuj tja Dios ic tzaꞌn axte Dios,
oc tmaꞌ ka ax Dioste.
5 ¿Mintiꞌpe naꞌn cyuꞌne,
xi nmaꞌne jlu cyeye tej atinxtoke cyucꞌile?
6 Ex biꞌn cyuꞌne jaꞌlo alcyeju in makonte te tuꞌn miꞌn tyecꞌunjtz naj jaꞌlo,
maxi ctzajel yecꞌun oc tpon tkꞌijlalil.
7 Porque aju tipumal mya baꞌn in akꞌnan tuj ewaj jaꞌlo,
pero at jun in makonte te jaꞌlo.
Octzun tel kꞌiꞌn aju in makonte,
8 maxitzun c-yecꞌetel ju xjal binchal ilxix,
pero cbeltzun byoꞌn jlu tuꞌn Kajaw tuꞌnju t-xew nneꞌtz tuj ttziꞌ,
ex biꞌx cnajel tuꞌn t-spicꞌumal Kajaw oc tul.
9 Tuꞌn Satanás tzul te xjal lu,
aju binchal ilxix,
nim tipumal ex oc tbinchaꞌ ke señ cyucꞌix tbinchben nim cyipumal,
pero mya ax toc.
10 Ex tuꞌnju tbinchben mya baꞌn che bel t-sbuꞌn ke xjal,
akeju tuꞌn cyxiꞌ tuj najen tuꞌnju mintiꞌ cygan tiꞌj tuꞌn t-xi cyniman ju yol axix toc tuꞌn cyclet.
11 Cyjaꞌtzun,
che xel ttzokpiꞌn Dios tuꞌn cysbunjtz tuꞌntzun t-xi cyocslaꞌn ju nicꞌaj yol,
12 tuꞌntzun tcub cysentens cycyakil keju mintiꞌ ma txi cyocslaꞌn ju yol axix toc,
nok oꞌcx in che tzalaj tiꞌj ju mya baꞌn.
Ma ko jaw scꞌoꞌn tuꞌn Dios tuꞌn kclet
13 Pero il tiꞌj tuꞌn t-xi kkꞌoꞌne chjonte te Dios cyiꞌje,
akeye erman cꞌujlaꞌn keye tuꞌn Kajaw,
porque ma che jaw scꞌoꞌne tuꞌn Dios atxix t-xe tnejel tuꞌn cyclete,
tuꞌnju ma che el paꞌne tuꞌn Xewbaj Xjan tuꞌn cyajbene oꞌcx te Dios,
ex ma txi cyocslaꞌne ju yol axix toc.
14 Cyjaꞌtzun e txconjtze tuꞌn Dios tuꞌnju tkanil colbil xi kmaꞌne cyeye,
tuꞌntzun cycꞌmonteye jun cyoclene maꞌxix junx tucꞌil Kajaw Jesucrist tuj tajwalil.
15 Cyjaꞌtzun erman,
miꞌn che yucche,
cytzyumxixe ju xnakꞌtzbil aju ma bant cyuꞌne,
ka aju xi kmaꞌne cyeye ex ka aju xi ktzꞌibane cyeye tuj uꞌj.
16 Ma ko cꞌujlanjtz tuꞌn Kajaw Jesucrist ex tuꞌn Kman Dios,
ex ma kꞌukbanjtz kcꞌuꞌj te jumajx tuꞌn,
ex ma tzaj tmaꞌn tuꞌn tkeꞌ kcꞌuꞌj tiꞌj jun baꞌn tzul tkꞌoꞌn Dios ke nok tuꞌn t-xtalbil.
17 Awt kꞌukbante cycꞌuꞌje,
ex awt cyuwsante cyeye tuj tcyakil,
tuꞌn cyyoline baꞌn ex tuꞌn cybinchanteye baꞌn.