Che naꞌne Dios kiꞌje
3
Cyjaꞌtzun erman,
che naꞌne Dios kiꞌje tuꞌntzun tel lakꞌeꞌ mas tkanil tyol Kajaw ex tuꞌn tnimanjtz,
ic tzaꞌn cyeye ma txi cynimane.
2 Ax icx che naꞌne Dios kiꞌje tuꞌn kclete cywitz ke xjal miban che bin ex mya baꞌn ke,
porque mya cycyakil xjal at cyocslabl.
3 Pero ate Kajaw in japunxix tyol,
ex baꞌn tuꞌn tkeꞌ kcꞌuꞌj tiꞌj,
oc che cyuwsanjtzele tuꞌn,
ex che oquel cwentine tuꞌn,
tuꞌn miꞌn tcub cyiꞌje tuꞌn tajaw il.
4 Ex nok tuꞌn Kajaw ma keꞌ kcꞌuꞌje cyiꞌje,
aju ma txi kmaꞌne cyeye in cybinchaꞌne ex cucx oc cybinchaꞌye.
5 Awt Kajaw ẍaklun cyeye tuꞌn tel cynicꞌe tiꞌj tcꞌujlalil Dios ex tuꞌn tten cypasense ic tzaꞌn te Crist.
Il tiꞌj tuꞌn kakꞌnan
6 Pero cxel kcyuwsaꞌne cyeye erman tuꞌnju atoꞌ tjakꞌ toclen Kajaw Jesucrist,
cypaꞌmel cyibe cyiꞌj ke erman in che bet mya tuj tumel ex mintiꞌ in che bet ic tzaꞌn ju xnakꞌtzbil xcycꞌame keye.
7 Porque ax keye baꞌn cyuꞌne tzaꞌn tten tuꞌn tel cycanoꞌne kiꞌje;
porque tej ktene cyxole mintiꞌ o ko bete mya tuj tumel,
8 ex mintiꞌ o ko waꞌne nok cucx tuꞌn juntl,
nok oꞌcx nim o ko akꞌnane kꞌijl ex konicꞌan ex nim o ko sicte tuꞌn miꞌn tcub kkꞌoꞌne jun iktz cyibaje.
9 Masque at koclene tuꞌn kwaꞌne cyiꞌje,
pero o ko akꞌnane tuꞌn tcnet kwaye,
tuꞌn t-xi kkꞌoꞌne jun yecꞌbil cyeye tuꞌntzun tel cycanoꞌne kiꞌje.
10 Porque tej ktene cyxole,
xi kmaꞌne jlu cyeye:
Ka at jun tcꞌiꞌ tzꞌakꞌnan,
ax icx miꞌn waꞌn.
11 Porque in kbiꞌne at junjun cyxole in che bet mya tuj tumel,
mintiꞌ in che akꞌnan chꞌin,
nok cucx nneꞌx cykꞌij ttzi cyja xjal.
12 Cyetzun jlu in xi kmaꞌne ex in xi kkꞌoꞌne cynabl tuꞌn tyol Kajaw Jesucrist,
tuꞌn cyakꞌnan yalnix tiꞌj ex tuꞌn cywaꞌn cycwent-x cyib.
13 Erman,
miꞌn baj cyganiye tuꞌn cybinchanteye aju baꞌn.
14 Ka at jun cyxole mintiꞌ in xi tniman aju in xi kmaꞌne tuj uꞌj lu,
tzꞌelx cynicꞌe tiꞌj,
ex miꞌn tzꞌoc cymojban cyibe tucꞌil,
tuꞌntzun ttzaj tchꞌixwi.
15 Pero miꞌn tzꞌoc cykꞌoꞌne ic tzaꞌn jun aj kꞌoj cyiꞌje,
nok oꞌcx tuꞌn t-xi cykꞌoꞌne tnabl erman lu tuꞌnju ocslal te.
Jun kꞌolbebl tuꞌn Pablo te bajsbil yol
16 Ate Kajaw kꞌolte kmojbabl kib.
Cucxwit tzaj tkꞌoꞌn cymojbabl cyibe tuj tcyakil.
Tenwt Kajaw cyucꞌile cycyakile.