AJU TNEJEL UꞌJ XI TTZꞌIBAN APOSTL PABLO TE TIMOTEY
Jun kꞌolbebl tuꞌn apostl Pablo te Timotey
1
Akine Pablo,
apostl kine te Jesucrist,
tuꞌn Dios tzaj tmaꞌn aju Clol ke,
ex tuꞌn Kajaw Jesucrist aju kꞌukl kcꞌuꞌj tiꞌj.
2 In xi ntzꞌibane jlu teya Timotey,
axix toc aya ncꞌwaꞌle tuj ocslabl.
Awt Kman Dios tucꞌix Kajaw Jesucrist,
che kꞌonte xtalbil teya ex tuꞌn ttzaj kꞌakꞌan cycꞌuꞌj tiꞌja ex tuꞌn tkeꞌxix tcꞌuꞌja.
In tmaꞌn Pablo tuꞌn miꞌn t-xi cybiꞌn ocslal juntl xnakꞌtzbil mya ax toc
3 Waje ax tuꞌn tcyaj tena tuj tnam Efeso,
ic tzaꞌn xi nmaꞌne teya tej cyjaꞌtok nxiꞌye tuj txꞌotxꞌ Macedonia.
Waje tuꞌn t-xi tmaꞌna cye junjun xjal tuꞌn miꞌn t-xi cykꞌoꞌn junxitl xnakꞌtzbil mya ax toc,
4 ex tuꞌn miꞌn t-xi cybiꞌn ju yol laꞌjbil tucꞌix ju yol tiꞌj cybi cyxeꞌchel xjal ojtxi mintiꞌ bajsbil te.
Porque tiꞌj ju yol lu in tzaj cykꞌoj xjal,
nok in che jaw cub tucꞌil yol,
ex mintiꞌ jun onbil ke tuꞌnju yol lu tzaꞌn tten tuꞌn tjapun aju ximamaj tuꞌn Dios te ke,
aju nneꞌl knicꞌ tiꞌj tuꞌn kocslabl.
5 Pero aju tnabl yol ma txi nmaꞌne teya,
atzun tuꞌn kcꞌujlante kib kxolx tucꞌil kcꞌujlalil tzajni jlet tuj kanmi sak taꞌ,
ex ka in kbinchaꞌn aju baꞌn in tmaꞌn kanmi,
ex ka ax toc ocslal koꞌ ex mya nok tten kuꞌn.
6 At junjun xjal o che el txalpuj ex ma tzꞌel cypaꞌn cyib cyiꞌj jlu,
ma txi cykꞌon cyib tuꞌn cyyolin tiꞌj ju yol nokx gan.
7 Cyajbil tuꞌn cyoc chicꞌbal tiꞌj tley Dios,
pero mintiꞌ nneꞌl cynicꞌ tiꞌj ju in cymaꞌn ex tiꞌj ju in cycyuwsaꞌn.
8 Baꞌn kuꞌn,
ate ley baꞌn ka ma tzꞌajben kuꞌn tuj tumelxix.
9 Baꞌn jlu kuꞌn,
ate ley tcub mya cye ke xjal tzꞌaklxix,
nok oꞌcx tcub ley cye keju miban che niman ley ex cycꞌiꞌ tuꞌn cyten tjakꞌ ley,
ex cye keju mintiꞌ tchi Dios cye ex aj il ke,
ex cye keju mintiꞌ cyaj tiꞌj Dios ex mintiꞌ cyocslabl,
ex cye keju in cub cybyoꞌn cyman ex cytxuꞌ,
ex cye keju byol xjal ke,
10 ex cye ke yaẍil,
ex cye xinak in pon cycꞌuꞌj tiꞌj juntl xinak,
ex cye keju elkꞌal xjal,
ex cye keju nicꞌal yol,
ex cye keju in xi cytziyan jun yol tucꞌil nicꞌaj yol,
ex ka at juntl in cybinchaꞌn tuꞌn tmaket aju xnakꞌtzbil baꞌn.
11 Aju xnakꞌtzbil baꞌn ma tzaj okxenan weye in yolin tiꞌj tkanil colbil tbanilxix in tzaj tkꞌoꞌn Dios,
aju Dios at-xix tzalajbil tucꞌil.
In xi tkꞌoꞌn Pablo chjonte te Dios tuꞌnju tzaj kꞌakꞌan tcꞌuꞌj tiꞌj
12 Cxel nkꞌoꞌne chjonte te Kajaw Jesucrist tuꞌnju ma tzaj kꞌoꞌn wipumale tuꞌn,
porque ma keꞌ tcꞌuꞌj wiꞌje ex ma chin oc kꞌoꞌne tuꞌn,
tuꞌn wajbene te.
13 Ojtxi in yasune tiꞌj,
ex in yajlane cyiꞌj ocslal,
ex o nbinchaye mya baꞌn cyiꞌj;
pero o tzaj kꞌakꞌan tcꞌuꞌj Dios wiꞌje,
porque mintiꞌ el nnicꞌe tiꞌj ju o nbinchaye naꞌnxtok wocslane.
14 Pero tzaj tkꞌoꞌn Kajaw nimxix t-xtalbil weye tucꞌix wocslable ex ncꞌujlalile,
tuꞌnju at kmojbabl kib tucꞌil Jesucrist.
15 Lu jun yol lu axix toc ex baꞌn tuꞌn tkeꞌ kcꞌuꞌj tiꞌj ex baꞌn tuꞌn t-xi cyocslaꞌn cycyakil xjal:
ul aj Jesucrist twitz txꞌotxꞌ tuꞌn cyclet ke xjal aj il tuꞌn,
ex akine mas aj ilxix cywitz cycyakil.
16 Cyjaꞌtzun tzaj kꞌakꞌan tcꞌuꞌj Jesucrist wiꞌje,
tuꞌntzun ttzaj tyecꞌun tnejelxix wiꞌje ka at nim tpasens,
ex tuꞌn woque te jun yecꞌbil cye keju che ocslal tiꞌj tuꞌn tten cychwinklal te jumajx.
17 Cyjaꞌtzun,
baꞌn tuꞌn kkꞌonte nimbil te Dios ex tuꞌn tjaw knimsaꞌn tbi tuj tcyakil tabkꞌiyil te jumajx.
Porque ate Dios Rey tuj tcyakil tabkꞌiyil,
mlay naj,
ex mya kꞌanchaꞌl,
oꞌcx ate jun Dios [ex nim tnabl.]
Icxwitju.
18 Aya ncꞌwaꞌl Timotey cxel ncyuwsaꞌne jun yol teya,
tuꞌn tkꞌojina baꞌn tuj kꞌoj,
ic tzaꞌnx ju yol o kꞌmanjtz tiꞌja nej cyuꞌn ke t-sanjel Dios.
19 Ex tenx tocslabla,
ex binchama aju baꞌn in tmaꞌn tanmiya.
Porque at junjun ma cyaj cycolin jlu ex ma naj cyocslabl.
20 Icxte Himeneo tucꞌix Alejandro ma cyaj cycolin cyocslabl,
cyjaꞌtzun ma cheꞌx nkꞌoꞌne tuj tcwent Satanás,
tuꞌntzun tel cynicꞌ tiꞌj,
tuꞌn miꞌn cyyolin mya baꞌn tiꞌj Dios.