Jun xnakꞌtzbil tiꞌj tzaꞌn tten tuꞌn knaꞌn Dios
2
Tnejelxix cxel nmaꞌne teya tuꞌn cycubsan ke ocslal twitz Dios cyiꞌj cycyakil xjal,
ex tuꞌn cynaꞌn Dios cyiꞌj,
ex tuꞌn t-xi cykanin t-xtalbil Dios cyibaj,
ex tuꞌn t-xi cykꞌoꞌn chjonte te Dios cyiꞌj.
2 Ax icx baꞌn tuꞌn cynaꞌn Dios cyiꞌj ke gobierni ex cyiꞌj cycyakil keju at cyoclen tuj cawbil,
tuꞌntzun kten tuj txubtxaj ex tuꞌn kcub txuleꞌ,
ex tuꞌn kniman twitz Dios ex tuꞌn kbet tuj tumel.
3 Baꞌn te jlu ex in tzalaj Dios tiꞌj,
aju Clol ke.
4 Porque atzun taj Dios,
tuꞌn cyclet cycyakil xjal ex tuꞌn tel cynicꞌ tiꞌj ju yol axix toc.
5 Porque junx Dios at,
ex junx yolil at in yolin tucꞌil Dios ex in yolin cyucꞌil xjal tuꞌn tbant cyten tucꞌil Dios,
atzun Jesucrist ax xjalte.
6 Xi tkꞌon tib Jesucrist tuꞌn tcyim tuꞌn cycolpet cycyakil xjal,
ex tzaj tchicꞌbaꞌn Dios tiꞌj jlu tujxix tkꞌijlalil.
7 Tiꞌjtzun jlu ma chin oc kꞌoꞌne pacbal ex apostl ex xnakꞌtzal cye xjal mya judiy,
tuꞌn cyocslan ex tuꞌn tel cynicꞌ tiꞌj ju yol axix toc.
Ax toc in xi nmaꞌne tuꞌnju ocslal kine tiꞌj Crist,
mintiꞌ in chin nicꞌane yol.
8 Cyjaꞌtzun wajbile tuꞌn cynaꞌn Dios ke xinak tuj tcyakil lugar,
oc cyjaw cyiꞌn cykꞌab tuꞌn cynaꞌn Dios,
mintiꞌwt jun mya baꞌn tuj cyanmi,
ex mintiꞌwt cykꞌoj ex mintiꞌwt in che yolin mya baꞌn tiꞌj juntl.
9 Icx ke xuꞌj,
waje tuꞌn miꞌn tjaw cyniman cyib tuj cyxbalun tbanilxix,
tuꞌntzun miꞌn toc baj cywitz xjal cyiꞌj,
baꞌn tuꞌn tbaj cybinchan cyib,
pero miꞌn che icꞌ tibaj oc tbaj cyxeban cywiꞌ,
ex miꞌn tzꞌoc cykꞌoꞌn kꞌan pwak cyiꞌj ex ka tal abj wiꞌyilxix perla tbi,
ex mya tuꞌn toc cykꞌoꞌn cyxbalun wiꞌyilxix.
10 nok oꞌcx tuꞌn cybinchante aju baꞌn,
atzunte jlu baꞌn cye ke xuꞌj cyajbil tuꞌn cynimante Dios.
11 Ke xuꞌj oc cyten tuj xnakꞌtzbil,
baꞌn tuꞌn cycub txuleꞌ ex tuꞌn tcub cymansin cyib.
12 Porque mintiꞌ in xi nkꞌoꞌne ambil cye xuꞌj tuꞌn cykꞌonte xnakꞌtzbil cye xinak ex ka tuꞌn cycawin cyibaj xinak,
oꞌcx tuꞌn cycub txuleꞌ.
13 Porque ate Adán cub binchaꞌn nej,
te tibajxi cub binchaꞌn Eva.
14 Mya ate Adán o sbunjtz,
ate xuꞌj o sbunjtz ex binchan il.
15 Pero oc che cletel ke xuꞌj,
ka baꞌn che chꞌiysan cyal,
ka cucx tten cyocslabl tucꞌix cycꞌujlalil,
ex ka sak tuj cyanmi,
ex ka at cynabl.