Tzaꞌn tuꞌn tten cychwinklal ke cwentil cyxol ocslal
3
Lu jun yol axix toc:
Ka at jun erman taj tuꞌn toc te nejenel cyxol ocslal,
baꞌn ju akꞌuntl lu ka taj tuꞌn takꞌnan tiꞌj.
2 Pero aju nejenel il tiꞌj tuꞌn tten mintiꞌ tpaltil,
ex nok jun t-xuꞌjil tuꞌn tten.
Il tiꞌj tuꞌn tjacꞌunte tib,
ex tuꞌn tten tnabl,
ex tuꞌn tten baꞌn tmod,
ex tuꞌn tkꞌonte cyposad xjal,
ex atwit tnabl tuꞌn tkꞌonte xnakꞌtzbil.
3 Mlay tzꞌoc jun xjal cꞌal kꞌeꞌn te nejenel,
ex ka in kꞌojin,
[ex ka in pon tcꞌuꞌj tiꞌj tuꞌn tcambante pwak mya tuj tumel.]
Nok oꞌcx baꞌn toc te nejenel aju xjal baꞌn tmod ex mans,
ex mintiꞌ in pon tcꞌuꞌj tiꞌj nimcu;
4 ex baꞌn cawin tuj tja,
ex baꞌn che niman ke tcꞌwaꞌl ex baꞌn che bin.
5 Porque jun xjal miban cawin tuj tja,
¿tzaꞌntzun tten tuꞌn tbant tcwentin cye ocslal etzan ke tuꞌn Dios?
6 Mlay tzꞌoc te nejenel jun acꞌaj ocslal,
mya yajcu jaw tniman tib ex cbel t-sentens ic tzaꞌn te tajaw il cub t-sentens.
7 Ex ilxix tiꞌj tuꞌn tten nejenel baꞌnxix cywitz xjal mya ocslal,
tuꞌntzun cyyolin baꞌn tiꞌj,
tuꞌntzun miꞌn ttzaj jun yol tiꞌj ex tuꞌn miꞌn tcub tzꞌak tuj tcꞌobil tajaw il.
Tzaꞌn tuꞌn tten cychwinklal ke diácono
8 Ax icx baꞌn tuꞌn cyoc te diácono akeju in che yolin tuj tumelxix,
ex mintiꞌ in meltzꞌajeꞌ cyyol,
ex mya cꞌal kꞌeꞌn ke,
ex mintiꞌ in pon cycꞌuꞌj tiꞌj jun cambabl mya tuj tumel.
9 Ex ilxix tiꞌj cucx tuꞌn tten cyocslabl aju o tzaj tyecꞌun Dios ke,
ex in tmaꞌn cyanmi ka baꞌn in cybinchaꞌn.
10 Ex ilxix tiꞌj tuꞌn ticꞌ witzbaj cyiꞌj tnejel ka baꞌn ateꞌ,
baꞌntzun tuꞌn cyoc te diácono ka mintiꞌ cypaltil.
11 Ax icx ke xuꞌj,
baꞌn tuꞌn cyajben ka in che yolin tuj tumel,
ex ka mya siꞌmil yol ke,
ex ka in cyjacꞌun cyib,
ex ka in japun cyuꞌn tuj tcyakil.
12 Ke diácono junx cyxuꞌjil tuꞌn tten,
ex tuꞌn tbant cycawin cye cycꞌwaꞌl ex cye keju ateꞌ tuj cyja.
13 Porque akeju diácono ka in che ajben tuj tumel,
in cycꞌmoꞌn jun cyoclen maꞌxix ex in keꞌxix cycꞌuꞌj tiꞌj tuꞌn cyyolin tiꞌj cyocslabl tiꞌj Jesucrist.
Aju kocslabl maꞌxix toclen
14 Ximan wuꞌne tuꞌn nxiꞌ naje queꞌyil teya,
pero mya yajcu miꞌn chin pon naje,
15 cyjaꞌtzun in xi ntzꞌibane jlu teya,
tuꞌn tbinteya tzaꞌn tten tuꞌn tajbena cyxol ke ocslal etzan tuꞌn Dios;
akeju xjal lu ocslal ke tiꞌj Dios,
aju Dios itzꞌ,
tzyuꞌn ju yol axix toc cyuꞌn ex cwentin cyuꞌn.
16 Ax toc maꞌ t-xilen aju kocslabl ma tzaj yecꞌun:
Oc Dios te xjal tuꞌn ttzaj yecꞌun ke,
el chicꞌeꞌ tuꞌn Xewbaj Xjan ka tzꞌaklxixte,
ex oc queꞌyin cyuꞌn anjel.
O pacbanjtz tkanil tiꞌj cyuj mastl nasyon,
ex e ocslan xjal tiꞌj,
ex jax kꞌiꞌn tuj cyaꞌj.