At junjun ocslal cꞌelel cypaꞌn cyib tiꞌj cyocslabl
4
Pero clarxix in tmaꞌn Xewbaj Xjan,
tuj mancbil tkꞌijlalil at junjun xjal cyjel cycolin cyocslabl,
cxel cybiꞌn cyyol ke xjal sbul at juꞌẍ tuj cyanmi ex cxel cybiꞌn cyxnakꞌtzbil.
2 Cxel cybiꞌn cyyol ke xjal xmletzꞌ ex nicꞌal yol ke.
Akeju xjal lu tuj najen taꞌ cyanmi,
mintiꞌtl nneꞌl cynicꞌ tiꞌj alcye ju baꞌn ex alcye ju mya baꞌn,
mer ic tzaꞌn ma tzꞌeꞌy tuj cyanmi tuꞌn cꞌuxbil in cꞌant,
ma tzꞌel tnabl cyanmi.
3 Ke xjal lu cxel cymayoꞌn tuꞌn miꞌn cymojeꞌ xjal,
ex cxel cymaꞌn tuꞌn miꞌn t-xi cychyoꞌn xjal chibj aju cyaj tkꞌoꞌn Dios tuꞌn t-xi cychyoꞌn ocslal ex tuꞌn t-xi cykꞌoꞌn chjonte tiꞌj,
akeju ma tzꞌel cynicꞌ tiꞌj ju yol axix toc.
4 Porque tcyakilju cyaj tbinchaꞌn Dios,
baꞌn,
ex mi jun tuꞌn tel kicꞌun ka ma txi kkꞌoꞌn chjonte tiꞌj oc t-xi kchyoꞌn;
5 porque cyꞌiwlaꞌmaj tuꞌn tyol Dios ex tuꞌn knaꞌj Dios.
Jun baꞌn ajbel te Jesucrist
6 Ka ma txi tkꞌoꞌna xnakꞌtzbil lu cye erman,
cꞌoquela jun ajbel baꞌnxix te Jesucrist,
cꞌoquel tipuna tuꞌnju yol ocslaꞌn kuꞌn ex tuꞌnju xnakꞌtzbil baꞌn ma tzꞌoc lpeꞌya tiꞌj.
7 Icꞌun ela aju laꞌjbil mya baꞌn ex ju cylaꞌjbil tij xuꞌj.
Xnakꞌtzam tiba tuꞌn tnimana te Dios.
8 Porque aju tuꞌn tnukpaj kximlal,
nok chꞌin tajben,
pero aju tuꞌn kniman te Dios,
at tajben tuj tcyakil,
porque in tkꞌoꞌn aju baꞌn tuj kchwinklal jaꞌlo,
ax icx tuj juntl ankꞌibl.
9 Ax toc ju yol lu ex baꞌn tuꞌn t-xi cyniman cycyakil xjal.
10 Tuꞌn tlaj jlu in ko akꞌnan ex nnoꞌcxix tilil kuꞌn,
porque kꞌukl kcꞌuꞌj tiꞌj ju Dios itzꞌ,
atzun clol cye cycyakil xjal,
tnejelxix cye keju ma che ocslan.
11 Atzun jlu kꞌmanxa cye ex xnakꞌtzanxa cye.
12 Miꞌn takꞌa ambil tuꞌn tel icꞌuna cyuꞌn ocslal tuꞌnju cuꞌxuna;
nok oꞌcx tuꞌn toca te jun yecꞌbil cyxol ocslal tuꞌn tyola,
ex tuꞌnju in beta tuj tumel,
ex tuꞌnju at tcꞌujlalila,
ex tuꞌnju at tocslabla,
ex tuꞌnju sak tuj tanmiya.
13 Binchama jlu,
schꞌinxa tyol Dios cywitz ocslal,
kꞌonxa cynabl,
ex kꞌonxa xnakꞌtzbil cye,
acutzun cyjaꞌ nxiꞌye tucꞌila.
14 Miꞌn cub tyajina aju toclena at,
aju tzaj kꞌoꞌn teya tej tcub cykꞌoꞌn ansyan cykꞌab tibaj twiꞌya,
ax Dios tzaj yecꞌunte cye tuꞌn tcꞌmonteya toclena.