5
Atzun tiꞌj tabkꞌiyil ex tiꞌj tkꞌijlalil,
mya il tiꞌj tuꞌn t-xi ntzꞌibane cyeye,
erman.
2 Porque biꞌnxix cyuꞌne aju tkꞌijlalil oc tul Kajaw tzul ic tzaꞌn jun elekꞌ nnuꞌl konicꞌan.
3 Oc cymante xjal:
Mintiꞌ bis,
baꞌn taꞌ tcyakil,
che chilo,
pero minaben tzul castiw cyibaj tuꞌn cynaj,
ic tzaꞌn jun xuꞌj at tuj cꞌixcꞌoj oc nnuꞌl itzꞌj tal;
ex mlay che tzokpaj.
4 Atzun cyeye erman,
mlay che tzyete tuj tkꞌijlalil oc tul Kajaw,
minaben tzul ic tzaꞌn nnuꞌl jun elekꞌ,
porque mya tuj klolj ateꞌye.
5 Porque cycyakile te spicꞌun keye ex in che bete kꞌijl;
mintiꞌ koclen tucꞌil konicꞌan ex tucꞌil klolj.
6 Cyjaꞌtzun,
miꞌn ko tan ic tzaꞌn ke mastl xjal,
nok oꞌcx tuꞌn kxkꞌukin ex tuꞌn tten knabl.
7 Porque akeju in che tan,
te konicꞌan in che tan,
ex akeju in che cꞌan kꞌeꞌn,
te konicꞌan in che cꞌan kꞌeꞌn.
8 Atzun ke,
tenx knabl porque in ko bet kꞌijl.
Ex tenwt kocslabl ex kcꞌujlalil tuꞌn toc te colbil ke,
ic tzaꞌn jun soldad nnoꞌc tkꞌoꞌn chicyet cꞌuxbil tiꞌj tuꞌn tclet.
Ex keꞌc kcꞌuꞌj tiꞌj ju colbil ke tzul,
ic tzaꞌn jun soldad tjax tpasbil cꞌuxbil tuꞌn tclet twiꞌ.
9 Porque mintiꞌ cub t-ximan Dios kiꞌj tuꞌn ttzaj tkꞌoj kiꞌj tuꞌn tcub ksentens tuꞌn;
nok oꞌcx cub t-ximan tuꞌn kclet nok tuꞌn Kajaw Jesucrist.
10 Porque o cyim Jesucrist tuꞌn tchjet kil tuꞌntzun kankꞌin junx tucꞌil,
ka itzꞌx koꞌ ex ka otok ko cyim.
11 Cyjaꞌtzun,
cykꞌom cynable cyxolxe ex cycyuwsam cynable cyxolxe,
ic tzaꞌnx in cybinchaꞌne jaꞌlo.
In tkꞌoꞌn Pablo cynabl erman
12 Ko cubsale cywitze,
erman,
cynimanxe keju in che akꞌnan cyxole ex nejenel ke cyxole tuj takꞌun Kajaw,
ex in cykꞌoꞌn cynable,
13 ex tuꞌn tten nimxix cycꞌujlalile cyiꞌj tuꞌnju in che akꞌnan cyxole.
Tenx cymojbabl cyibe cyxolxe.
14 Ax icx ko cubsale cywitze erman,
tuꞌn t-xi cykꞌoꞌne cynabl keju cycꞌiꞌ che akꞌnan,
ex tuꞌn t-xi cykꞌukbaꞌne cycꞌuꞌj keju chꞌin cycꞌuꞌj;
ex che onine cyiꞌj keju mintiꞌ cyipun,
ex tenx cypasense cyiꞌj cycyakil.
15 Ka at jun mya baꞌn o binchanjtz cyiꞌje tuꞌn juntl,
ten cycwente tiꞌj tuꞌn miꞌn taj cykꞌoꞌne t-xel mya baꞌn;
nok oꞌcx cucx tuꞌn cybinchanteye ju baꞌn cyxolxe ex cye cycyakil xjal.
16 Cucx che tzalaje.
17 Miꞌn che kꞌajene tuꞌn cynaꞌne Dios.
18 Cykꞌonxe chjonte tiꞌj tcyakil,
porque atzun tajbil Dios jlu tuꞌn cybinchanteye,
porque ocslal keye tiꞌj Jesucrist.
19 Miꞌn cub cyyuptzꞌaꞌne ju Xewbaj Xjan.
20 Miꞌn tzꞌel cyicꞌune cyyol ke t-sanjel Dios.
21 Cyqueꞌyin baje tcyakil,
cytzyume aju baꞌn.
22 Cypaꞌmil cyibe tiꞌj tcyakil mya baꞌn.
23 Ex axte Dios aju kꞌol kmojbabl kib,
axwit tzꞌel paꞌn cyeye tuꞌn cyajbene oꞌcx te,
ex awt cwentin cyeye tucꞌix cyxewe tucꞌix cyanmiye tucꞌix cyximlale,
ex mintiꞌwt cypaltile oc tul Kajaw Jesucrist.
24 Aju Dios ma txcon cyeye in japunxix tyol,
ex oc tbinchaꞌ tcyakil jlu cyeye.
Jun kꞌolbebl tuꞌn Pablo te bajsbil yol
25 Erman,
che naꞌne Dios kiꞌje.
26 Cykꞌonxe nkꞌolbeble cye cycyakil erman,
ex cytzꞌuban el cywitze tuꞌn tcyakil cycꞌujlalile.
27 Cxel ncyuwsaꞌne cyeye twitz Kajaw tuꞌn tjaw schꞌit ju uꞌj lu cywitz cycyakil erman.
28 Aju t-xtalbil Kajaw Jesucrist tenwt cyucꞌile.
Icxwitju.