Tuꞌn kankꞌin baꞌnxix tuꞌn ttzalaj Dios kiꞌj
4
Jaꞌlotzun erman,
ko cubsale cywitze ex cxel kkꞌoꞌne cynable tuꞌnju kmojbabl kib tucꞌil Kajaw Jesús:
Ic tzaꞌn ju xnakꞌtzbil xi kkꞌoꞌne cyeye tzaꞌn tten tuꞌn cybete twitz Dios ex tuꞌn ttzalaj Dios cyiꞌje,
icxtzun cybinchame ex tuꞌn tjapunxix cyuꞌne.
2 Porque biꞌmaj cyuꞌne aju xnakꞌtzbil xi kkꞌoꞌne cyeye,
aju tzaj tmaꞌn Kajaw Jesús.
3 Porque aju tajbil Dios tuꞌn t-xi cykꞌon cyibe oꞌcx te Dios,
ex tuꞌn miꞌn cybinchanteye aj pajil.
4 Teyle junjun cyeye tuꞌn tten tex t-xuꞌjil,
atwit toclen t-xuꞌjil tuj twitz ex miꞌn pon tcꞌuꞌj tiꞌj juntl,
5 ex mya tuꞌn t-xi cytzokpin cyibe teju cyajbile mya baꞌn ic tzaꞌn in cybinchaꞌn txkantl xjal mintiꞌ ojtzkiꞌn Dios cyuꞌn.
6 Ex miꞌn cybinchaye jun mya baꞌn te cyermaniye ex miꞌn che cub cysbuꞌne,
porque ate Kajaw ctzajel kꞌonte castiw tiꞌj tcyakil jlu,
ic tzaꞌn o txi kmaꞌne cyeye ex o txi kchicꞌbaꞌne.
7 Porque mintiꞌ ma ko txconjtz tuꞌn Dios tuꞌn kbinchante aju ttzꞌilil,
nok oꞌcx tuꞌn t-xi kkꞌon kib oꞌcx te.
8 Cyjaꞌtzun alcye jun xjal nneꞌl ticꞌun ju yol lu,
mya jun xjal nneꞌl ticꞌun,
ate Dios nneꞌl ticꞌun,
aju ma tzaj kꞌonte Xewbaj Xjan ke.
9 Mya il tiꞌj tuꞌn t-xi ntzꞌibane cyeye tzaꞌn tten tuꞌn cycꞌujlanteye cycyakil erman,
porque ax Dios ma xnakꞌtzan cyeye tuꞌn cycꞌujlante cyibe cyxolxe.
10 Ax icxtzun in cybinchaꞌne,
at cycꞌujlalile cyiꞌj cycyakil erman ateꞌ tuj txꞌotxꞌ Macedonia.
Pero ko cubsale cywitze,
erman,
cucx tuꞌn tchꞌiy cycꞌujlalile,
11 ex tuꞌn toc tilil cyuꞌne tuꞌn cyankꞌine tuj txubtxaj ex tuꞌn cyakꞌnane tiꞌj cyakꞌune,
ex tuꞌn cyakꞌnane tuꞌn cykꞌabe,
ic tzaꞌnx xi kmaꞌne cyeye.
12 Tuꞌntzun cyxi nimane cyuꞌn xjal,
ex tuꞌn cytene mintiꞌ atx taj cyeye.
Tzaꞌn tten tzul juntl maj Kajaw
13 Ax icx kajbile erman,
tuꞌn tel cynicꞌe cyiꞌj keju in che cyim,
tuꞌn miꞌn ttzaj cybise ic tzaꞌn ke mastl xjal mintiꞌ jatum tuꞌn toc keꞌ cycꞌuꞌj.
14 Porque ma kocsla ju yol tiꞌj Jesús,
ate Jesús o cyim ex jatz ankꞌin,
ax icxtzun keju o che cyim ocslal ke tiꞌj Jesús,
che tzajel tiꞌn Dios junx tucꞌil Jesús.
15 Cyjaꞌtzun cxel kmaꞌne jlu cyeye,
aju tyol Kajaw:
akoꞌ itzꞌx koꞌ ex atoꞌx oc tul Kajaw,
mlay koꞌx nej cywitz keju otok che cyim.
16 Porque axte Kajaw cbeletz tuj cyaꞌj,
ctzajel tkꞌoꞌn orden,
tucꞌix tnejel anjel ctzajel kꞌajt,
ex ckꞌajtel ju chun te Dios.
Entons keju otok che cyim ocslal ke tiꞌj Crist oc che jawil ankꞌin nej.
17 Lepchixtzun koꞌ akoꞌ itzꞌx koꞌ atoꞌx tzalu,
ko jawil jubchaꞌn junx cyucꞌil tuj muj tuꞌn kcꞌlunte kib tucꞌil Kajaw tuj cykꞌikꞌ,
cyjaꞌtzun ax ko tel tucꞌil Kajaw te jumajx.
18 Cyjaꞌtzun cykꞌukbam cycꞌuꞌje cyxolxe tuꞌnju yol lu.