3
Mintiꞌ icꞌx tiꞌj kuꞌne tuꞌn kbinteye cyiꞌje,
cyjaꞌtzun cub kximane tuꞌn kcyaj tene tuj tnam Atenas oꞌcx keye,
2 ex xi ksamaꞌne kerman Timotey cyucꞌile tuꞌntzun cycyuwsanjtze tuꞌn ex tuꞌn t-xi kꞌot cynable tuj cyocslable,
porque ate Timotey ajbel te Dios ex akꞌnal kucꞌile tuꞌn tpacbanjtz tkanil colbil in tzaj tkꞌoꞌn Crist.
3 Xi ksamaꞌne tuꞌn miꞌn tel tzpet cynable tuꞌn tlaj ju yajbil cyeye,
porque ax keye baꞌn cyuꞌne ka il tiꞌj tuꞌn ticꞌx kuꞌn.
4 Porque tej ktene cyucꞌile,
biꞌx xi kmaꞌne cyeye ka il tiꞌj tuꞌn kyajlanjtz,
ex cyjaꞌtzun tten in baj kiꞌj,
baꞌn jlu cyuꞌne.
5 Cyjaꞌtzun tten,
mintiꞌ icꞌx tuꞌn ncꞌuꞌje cyiꞌje,
xi nsamaꞌne Timotey tuꞌn nbinteye tzaꞌn cytene tuj cyocslable,
mya yajcu o che oque tuj joybil cyiꞌje tuꞌn tajaw il,
ex mya yajcu nokx gan kakꞌunbene.
6 Pero tej tul meltzꞌaj Timotey kucꞌile tzaj tmaꞌn tkanil baꞌn ka at cyocslable ex at cycꞌujlalile,
ex ka cucx in ko tzaj cynaꞌne in che tzalaje kiꞌje,
cyajbile tuꞌn toc cyqueꞌyine kwitze,
ax icx keye kajbile tuꞌn toc kqueꞌyine cywitze.
7 Cyjaꞌtzun erman,
tej ktene tuj bis ex tuj yajbil keye,
o kꞌukbanjtz kcꞌuꞌje cyuꞌne nok tuꞌnju waꞌlkeꞌxixa tuj cyocslable;
8 porque jaꞌlo ma tzꞌel kbise ex ma keꞌ kcꞌuꞌje tuꞌnju waꞌlkeꞌxixe tuj cyocslable tiꞌj Kajaw.
9 ¿Alcyetzun tumel tuꞌn t-xi kkꞌoꞌne chjonte te Dios cyiꞌje tuꞌnju nimxix in ko tzalaje cyuꞌne twitz Dios?
10 In ko naꞌne Dios cyiꞌje kꞌijl ex konicꞌan,
in ko cubsane wen tuꞌn toc kqueꞌyine cywitze ex tuꞌn t-xi ktzꞌaksaꞌne aju atx taj cyeye tuj cyocslable.
11 Awt Kman Dios tucꞌix Kajaw Jesucrist cheꞌx ẍaklunte keye tuj kbeye tuꞌn kpone cyucꞌile.
12 Awt Kajaw kꞌonte t-xtalbil cyeye tuꞌn cychꞌiye tuꞌn tten nim cycꞌujlalile cyxolxe ex cyucꞌil cycyakil xjal,
ic tzaꞌn keye at-xix kcꞌujlalile cyiꞌje.
13 Awt Kajaw cyuwsante cynable ex tuꞌn cytene sak tuj cyanmiye ex mintiꞌ cypaltile twitz Kman Dios oc tul Kajaw Jesucrist cyucꞌil cycyakil ocslal tiꞌj.