Aju takꞌunben Pablo tuj Tesalónica
2
Porque ax keye erman baꞌn cyuꞌne,
tej kpone cyucꞌile mya nokx gan.
2 Masque otok ko cꞌixbisanjtze tuj tnam Filipos ex otok ko oc yasoꞌne,
ic tzaꞌn baꞌn cyuꞌne,
pero mintiꞌ o xobe,
nok oꞌcx oc keꞌ kcꞌuꞌje tiꞌj Dios tuꞌn t-xi kpacbaꞌne tkanil colbil aju tzaj tkꞌoꞌn Dios,
ex tzaj nim cykꞌoj xjal kiꞌje.
3 Porque tej t-xi kkꞌoꞌne cynable,
mintiꞌ o tzpete tiꞌj,
ex mintiꞌ jun kximbetze mya baꞌn,
ex mintiꞌ o sbune cyiꞌje.
4 Pero tuꞌnju otok tzicꞌ twitz Dios kiꞌje,
cyjaꞌtzun tzaj tokxeꞌnan tkanil colbil keye,
cyjaꞌtzun tten in ko yoline tiꞌj,
mintiꞌ in ko yoline tuꞌn cytzalaj xjal kiꞌje,
nok oꞌcx in ko yoline tuꞌn ttzalaj Dios kiꞌje,
porque ojtzkiꞌn tuj kanmiye tuꞌn Dios.
5 Porque mintiꞌ o xmoxine cyiꞌje tuꞌn tcub cyiꞌje kuꞌne,
ic tzaꞌn baꞌn cyuꞌne,
ex mintiꞌ pon kcꞌuꞌje tiꞌj cypwake ex mintiꞌ o sbune cyiꞌje tuꞌn ttzaj cykꞌoꞌne cypwake keye.
A Dios testiw kiꞌje.
6 Mintiꞌ o kajbeye tuꞌn kjaw nimsaꞌne cyuꞌn xjal,
mi cyuꞌne,
mi cyuꞌn mastl xjal,
masque at koclene tuꞌn kjaw nimsaꞌne porque apostl koꞌye te Crist.
7 Pero o tene cyxole bunin kyole,
ic tzaꞌn jun txuybaj cwentinxix ke tal tuꞌn,
ex at-xix tcꞌuꞌj cyiꞌj.
8 At-xix kcꞌuꞌje cyiꞌje,
ex baꞌn ela tuj kwitze tuꞌn t-xi kmaꞌne tkanil colbil cyeye,
aju tzaj tkꞌoꞌn Dios,
ax icx kakꞌ kibe tuꞌn kajbene cyeye,
porque at-xix kcꞌuꞌje cyiꞌje.
9 Porque naꞌnx cyuꞌne erman,
tzaꞌn tten o akꞌnane ex o sicte tuꞌn tcnet aju in ajben keye,
o akꞌnane konicꞌan ex kꞌijl tuꞌn miꞌn tcub kkꞌoꞌne jun iktz cyibaje;
cyjaꞌtzun tten xi kpacbaꞌne tkanil colbil cyeye,
aju tzaj tkꞌoꞌn Dios.
10 Akeye testiw kiꞌje ex tucꞌix Dios,
tzaꞌn tten xko tene cyxole ocslal keye;
tej xko tene cyucꞌile sak tuj kanmiye,
ex ma ko bete tuj tumelxix,
ex mintiꞌ kpaltile.
11 Ax icx baꞌn cyuꞌne tzaꞌn tten xi kkꞌoꞌne cynable ex xi kkꞌukbaꞌne cycꞌuꞌje teyle junjun cyeye,
o kbinchaye cyeye ic tzaꞌn in tbinchaꞌn jun mambaj cye tcꞌwaꞌl.
12 Xi kmaꞌne cyeye tuꞌn cybinchanteye aju baꞌn nneꞌla tuj twitz Dios,
ax Dios ma txcon cyeye tuꞌn cyocxe tuj tcawbil ex tuj tajwalil.
13 Cyjaꞌtzun cucx in xi kkꞌoꞌne chjonte te Dios tuꞌnju xi cyocslaꞌne tyol Dios,
aju cybiye keye;
tej t-xi cyocslaꞌne mintiꞌ o cymaye ka tyol xjal,
oꞌcx o cymaye ka tyol Dios,
porque ax toc tyol Dios ex in akꞌnan tuj cyanmiye akeye ocslal keye.
14 Porque akeye erman,
ma tzꞌel cycanoꞌne cyiꞌj ke ocslal tiꞌj Jesucrist etzan ke tuꞌn Dios ateꞌ tuj txꞌotxꞌ Judey;
porque ma che yajlanjtze cyuꞌnx cyxjalile ic tzaꞌnx cye e yajlanjtz cyuꞌn xjal judiy.
15 Porque cyuꞌn judiy cub cybyoꞌn Kajaw Jesús cyucꞌix ke t-sanjel Dios,
ax icx keye ma ko etz lajoꞌne cyuꞌn,
ex mintiꞌ cyaj tiꞌj tuꞌn ttzalaj Dios cyiꞌj,
ex in che kꞌojin cyiꞌj cycyakil xjal.
16 Oc in ko yoline cyucꞌil xjal mya judiy tuꞌn cyclet,
in che oc ten mayolte keye tiꞌj jlu;
cyjaꞌtzun cucx in chmet cyil,
cyjaꞌtzun tten ma tzaj tkꞌoj Dios cyiꞌj,
maꞌxix jun cycastiw tzul tuꞌn.
O tajbe Pablo tuꞌn t-xi juntl maj visitaril cye aj Tesalónica
17 Atzun ke erman,
mya nim kꞌij ma cyaj kcolin kib;
mintiꞌ nnoꞌc kqueꞌyin kwitz,
pero aju kanmiye at cyucꞌile;
cyjaꞌtzun nnoꞌc tililxix kuꞌne tuꞌn kpone cyucꞌile ex kajbilxixe tuꞌn toc kqueꞌyine cywitze.
18 Cyjaꞌtzun o kajbeye tuꞌn kxiꞌye cyucꞌile,
ax toc elaꞌ maj cub nximane,
akine Pablo,
pero o mayonjtze tuꞌn Satanás.
19 Porque ¿alcyetzunju tuꞌn tkeꞌ kcꞌuꞌje tiꞌj,
ex alcye tuꞌn ktzalaje tiꞌj,
ex alcyetzun jun yecꞌbil cxel kyecꞌune tiꞌj kakꞌunbene twitz Kajaw Jesucrist oc tul?
¿Myapetzun akeye?
20 Ax toc akeye jun yecꞌbil cxel kyecꞌune tiꞌj kakꞌunbene,
ex nok cyuꞌne ko tzalajele.