Jun baꞌn soldad te Jesucrist
2
Aya ncꞌwaꞌl,
cyuwsam tiba tuꞌnju t-xtalbil Dios in tzaj tkꞌoꞌn ke tuꞌnju at kmojbabl kib tucꞌil Jesucrist.
2 Aju tbiya weye cywitz nimcu testiw,
atzunju okxenanxa cye xjal in japunxix cyuꞌn ex at cynabl tuꞌn cykꞌonte xnakꞌtzbil cye mastl.
3 Tzicꞌxcu tuꞌna tuj akꞌuntl;
tzꞌocxa jun baꞌn soldad te Jesucrist.
4 Mi jun soldad jacu baj t-sacun tib tuꞌn t-xi tjyoꞌn juntl takꞌun,
porque atzun taj tuꞌn ttzalaj ju xjal tiꞌj,
aju o kꞌmante te tuꞌn toc te soldad.
5 Jun cuꞌxun nnoꞌcx tkꞌon tib tuj jun sakchbil,
mlay tcꞌam jun oyaj ka mya tuj tumel nnoꞌc tilil tuꞌn tuj sakchbil.
6 Aju xjal in akꞌnan tuj cojbil ex in sict tiꞌj akꞌuntl,
atzunte nej tuꞌn tcꞌmonte twitz awal.
7 Ximanxa tiꞌj aju ma txi nmaꞌne teya;
porque ate Kajaw ckꞌolte tnabla tuj tcyakil.
8 Naꞌntza Jesucrist,
atzun tzaj tiꞌj tiyjil David ex jaw ankꞌin cyxol cyimni ic tzaꞌnxju tkanil colbil in xi npacbaꞌne.
9 Tuꞌn tlaj ju yol lu in xi npacbaꞌne,
nimcu nnicꞌx wuꞌne,
ex maꞌlpe chin octz kꞌoꞌne tuj pres,
ma chin oc kꞌoꞌne ic tzaꞌn jun byol xjal;
pero aju tyol Dios mya presin.
10 Cyjaꞌtzun nnicꞌx tcyakil jlu wuꞌne tuꞌnju at ncꞌujlalile cyiꞌj keju scꞌoꞌmaj tuꞌn Dios,
tuꞌntzun icx cye tuꞌn cycꞌmonte jun colbil tbanilxix ex te jumajx,
aju in tzaj tkꞌoꞌn Dios tuꞌnju at kmojbabl kib tucꞌil Jesucrist.
11 Axix toc ju yol lu:
Ka ma ko cyim junx tucꞌil Crist,
ax icx ko ankꞌil junx tucꞌil.
12 Ka ma tzicꞌx kuꞌn,
ax icx ko cawil junx tucꞌil.
Ka ma cub kewan ka mintiꞌ ojtzkiꞌn kuꞌn,
ax icx te cbel tewan ka mintiꞌ ojtzkiꞌn koꞌ tuꞌn.
13 Ka ma cyaj kcolin kocslabl,
atzunte Crist cucx in japun tyol;
porque mlay baj tchꞌexpuꞌn tyol.
Jun akꞌnal mintiꞌ tpaltil
14 Naꞌntza jlu cye ocslal,
ex kꞌonxa cynabl twitz Kajaw;
kꞌmanxa cye tuꞌn miꞌn cyjaw kꞌojl tiꞌj ju yol nokx gan,
porque nokx gan jlu,
ex a jlu in xitunte cynabl keju in che bin tiꞌj.
15 Kꞌoꞌnca tilil tuꞌn tyecꞌunte tiba twitz Dios mintiꞌ tpaltila,
ic tzaꞌn jun akꞌnal mintiꞌ in chꞌixwi tiꞌj takꞌun,
tuꞌn t-xi tpacbaꞌna ju yol axix toc tujxix tumel.
16 Paꞌmil tiba cyiꞌj ke xjal mya nimal Dios ke ex nokx gan cyyol,
porque akeju xjal lu mas in cheꞌx tuj il.
17 Aju cyyol xjal lu in lekꞌekꞌen tel ic tzaꞌn jun yabil in kꞌay cychibjal xjal tuꞌn;
ajun Himeneo cyxol jlu tucꞌix Fileto.
18 Ma che el tzpet tiꞌj ju yol axix toc,
in cymaꞌn ka o che jaw ankꞌin ke ocslal cyxol cyimni,
tuꞌn jlu nneꞌl tzpet cynabl junjun tuj cyocslabl.
19 Pero aju simyent cub tkꞌoꞌn Dios mlay yucch,
toc ju sey lu tiꞌj,
in tmaꞌn:
Ojtzkiꞌn tuꞌn Kajaw alcye keju tecuxix;
ax icx in tmaꞌn:
Cycyakil keju in cymaꞌn ka ocslal ke tiꞌj Crist,
cypaꞌmil cyib tiꞌj mya baꞌn,
chi ju tzꞌiban.
20 Tuj jun nintz ja at junxilchak macbil in che ajben;
at macbil kꞌan pwak,
ex at macbil sak pwak,
ax icx at macbil tzeꞌ ex at macbil txꞌotxꞌ;
at junjun macbil tbanilxix,
ex at junjun myaxix tbanil,
part cyajben.
21 Cyjaꞌtzun,
ka at jun tpaꞌn tib tiꞌj ju mya baꞌn lu ex mintiꞌ in tzꞌilix tuꞌn,
cꞌoquel te jun macbil tbanilxix,
tecuxix Kajaw ex at tajben te Kajaw,
ex banin tten tuꞌn tajben tuj tcyakil akꞌuntl baꞌn.
22 Tel oka tiꞌj cyachbil cuꞌxun,
tzꞌoc tililx tuꞌna tuꞌn tbinchanteya aju tzꞌaklxix ex tuꞌn tten tocslabla ex tuꞌn tten tcꞌujlalila ex tuꞌn tten tmojbabl tiba cyucꞌil mastl,
junx cyucꞌil keju in che cubsan twitz Kajaw,
akeju sak tuj cyanmi.
23 Miꞌn tzꞌoc tmojtzaꞌna cyyol xjal mintiꞌ cynabl ex mintiꞌ chꞌin baꞌn cyuꞌn;
porque baꞌn tuꞌna,
tuꞌn jlu in tzaj cykꞌoj xjal.
24 Porque aju tmajen Kajaw mya baꞌn tuꞌn tkꞌojin,
nok oꞌcx tuꞌn toc mans cyucꞌil cycyakil ex tuꞌn tten tnabl tuꞌn tkꞌonte xnakꞌtzbil,
ex tuꞌn tten tpasens.
25 Ex mans tyol tuꞌn t-xi tcaꞌwin keju in che kꞌojin tiꞌj,
mya yajcu tzꞌajtz tiꞌj cyanmi tuꞌn Dios tuꞌn tel cynicꞌ tiꞌj ju yol axix toc,
26 tuꞌntzun tjaw cyqueꞌyin cywitz ex tuꞌn cytzokpet tuj tcꞌobil tajaw il jatum tzyuꞌn ke tuꞌn cybinchante alcyeju tajbil tajaw il.