Aju oc cybinchaꞌ xjal tuj mancbil tkꞌijlalil
3
Ax icx tzꞌelx tnicꞌa tiꞌj jlu:
Tuj mancbil tkꞌijlalil tzul nim yajbil.
2 Porque che ul xjal oꞌcx toc cycꞌuꞌj cyiꞌjx,
ex oꞌcx toc cycꞌuꞌj tiꞌj pwak,
ex in jaw cyniman cyib,
ex jawni ke,
ex yasul ke,
ex miban che niman tyol cyman,
ex mintiꞌ in cykꞌoꞌn chjonte tiꞌj ju in cycꞌmoꞌn,
miban che niman te Dios,
3 ex mintiꞌ cycꞌujlalil,
ex mintiꞌ in chewix cycꞌuꞌj,
ex siꞌmil yol ke,
ex mintiꞌ in cyjacꞌun cyib,
ex mintiꞌ chꞌin cylastmi cyiꞌj xjal,
ex nneꞌl cyicꞌun aju baꞌn,
4 ax in che oc meltzꞌaj cyiꞌj cyucꞌil,
txꞌuꞌj cywiꞌ,
ex in jaw cyniman cyib,
mas toc cycꞌuꞌj tiꞌj achbil ex mya tiꞌj Dios.
5 Mer nimal Dios che queꞌyin,
pero mintiꞌ cyaj tiꞌj tipumal tuꞌn cyclet.
Paꞌmil tiba cyiꞌj jlu.
6 Cyxol jlu at junjun cheba nnoꞌcx cylamon cyib tuj cyja xjal,
jurat in cub cysbuꞌn ke xuꞌj mintiꞌ cynabl ex aj ilxix ke.
Ke xuꞌj lu mer ic tzaꞌn jawoꞌn ke tuꞌnju in pon cycꞌuꞌj tiꞌj nimcu,
7 nim cygan tuꞌn cyxnakꞌtzan,
pero mintiꞌ nneꞌl cynicꞌ tiꞌj ju yol axix toc.
8 Icxtzun cymod xjal lu ic tzaꞌn Janes tucꞌix Jambres,
e kꞌojin tiꞌj Moisés.
Icx ke jlu in che kꞌojin tiꞌj ju yol axix toc,
mya tuj tumel taꞌ cynabl,
ex mlay che cꞌmet tuj ocslabl.
9 Pero mlay cheꞌx lakꞌeꞌ mastl,
porque cycyakil xjal cꞌelel cynicꞌ cyiꞌj ka mintiꞌ cynabl,
ic tzaꞌn ojtxi el cynicꞌ xjal tiꞌj Janes ex Jambres ka mintiꞌ cynabl.
Xi tcyuwsaꞌn Pablo tnabl Timotey alcye tuꞌn tbinchante
10 Atzun teya ma tzꞌoc lpeꞌya tiꞌj nxnakꞌtzbile,
ex tiꞌj nbinchbene,
ex tiꞌj nnable,
ex tiꞌj wocslable,
ex tiꞌj npasense,
ex tiꞌj ncꞌujlalile,
ex nnicꞌx tuꞌna ic tzaꞌn weye.
11 Ex o tena wucꞌile tuj yajbil weye ex tuj tcyakilju icꞌx wuꞌne tuj tnam Antioquía ex tuj Iconio ex tuj Listra;
nim yajbil icꞌx wuꞌne,
pero tuj tcyakil ma chin clete tuꞌn Kajaw.
12 Ex cycyakil keju cyajbil cucx tuꞌn cynimante Jesucrist,
oc che yajlanjtzel.
13 Atzun ke xjal mya baꞌn ex ke sbul,
cyjaꞌ cyxi lakꞌeꞌ mastl tuj mya baꞌn,
in che sbun ax icx cye in che sbunjtz.
14 Atzun teya ax tuꞌn tcyaj tena tuj ju xnakꞌtzbil ma tcꞌama ex ma keꞌ tcꞌuꞌja tiꞌj,
porque baꞌn tuꞌna alcye ma xnakꞌtzan teya.
15 Ex atxix tuj tneꞌyila el tnicꞌa tiꞌj ju Xjan Tuꞌjil,
tuꞌntzun jlu ma tzaj kꞌoꞌn tnabla tzaꞌn tten tuꞌn tcleta tuꞌn tocslabla tiꞌj Jesucrist.
16 Tcyakil aju tzꞌiban tuj Tuꞌjil,
a Dios o kꞌmante ex at tajben te xnakꞌtzbil ke,
ex tuꞌn kmayonjtz tuꞌn miꞌn kbinchante mya baꞌn,
ex tuꞌn tjikumanjtz tiꞌj knabl,
ex tuꞌn kxnakꞌtzanjtz tuꞌn kbet tuj tumelxix,
17 tuꞌntzun tten tnabl ju xjal in ajben te Dios,
ex banin tten tuꞌn tbinchante tcyakil akꞌuntl baꞌn.