4
Cxel ncyuwsaꞌne teya twitz Dios ex twitz Kajaw Jesucrist;
porque tuꞌn Jesucrist che oquel ke xjal tuj xjel tzaꞌnx keju itzꞌ icx ke cyimni oc tyecꞌunte tib tuj tcawbil.
2 Cyjaꞌtzun cxel ncyuwsaꞌne teya tuꞌn t-xi tpacbaꞌna tyol Dios,
nok banin ttena,
ka at ambil tiꞌja ex ka mintiꞌ ambil tiꞌja,
pero il tiꞌj tuꞌn tyolina;
naꞌntza cyil xjal,
mayonxa ke tuꞌn miꞌn cybinchante mya baꞌn,
kꞌonxa cynabl tuꞌn tcyakil tpasensa ex tucꞌix xnakꞌtzbil cye.
3 Porque tzul tkꞌijlalil mlay tzicꞌx cyuꞌn aju baꞌn xnakꞌtzbil,
nok oꞌcx cꞌoquel cykꞌoꞌn nim xnakꞌtzal cye ic tzaꞌnx ju cyex cyajbil,
tuꞌnju at-xix cygan tuꞌn cybinte junxitl yol,
4 ex mlay txi cybiꞌntl aju yol axix toc,
nok oꞌcx che elel txalpuj tuꞌn t-xi cybiꞌn ju yol laꞌjbil.
5 Atzun teya,
cucx tuꞌn tten tnabla,
tzicꞌxcu tuꞌna tuj tcyakil,
tzꞌakꞌnana,
pacbanxa tkanil colbil,
japunx tuꞌna aju tajbebla.
6 Porque chꞌix tpon or tuꞌn ncube ic tzaꞌn jun oyaj,
ex in lakꞌex ttzaj tuꞌn wicꞌe tzalu twitz txꞌotxꞌ.
7 Ma tzꞌoc tililxix wuꞌne ic tzaꞌn jun soldad tuꞌn tcub tiꞌj mya baꞌn wuꞌne,
ma japun baj ju wojkelbile,
ma tzꞌoc ncwentine ju ocslabl.
8 Jaꞌlotzun at jun coron banin te weye tuꞌnju ma chin bete tuj tumelxix,
aju ctzajel tkꞌoꞌn Kajaw weye tuj tkꞌijlalil oc tul juntl maj,
porque ate Kajaw jwes tzꞌaklxix.
Mya oꞌcx weye ctzajel tkꞌoꞌn oyaj,
ax icx cye cycyakil keju toc cycꞌuꞌj tiꞌj ju tulel.
In tmaꞌn Pablo te Timotey alcye tuꞌn tbinchante
9 Aya Timotey,
tzꞌoc tililx tuꞌna tuꞌn tul naja queꞌyilte weye.
10 Porque ma chin cyaj coline tuꞌn Demas tuꞌnju ma tzꞌoc tkꞌoꞌn tcꞌuꞌj tiꞌj ju te twitz txꞌotxꞌ ex ma txiꞌ tuj tnam Tesalónica.
Atzunte Crescente ma txiꞌ tuj txꞌotxꞌ Galacia,
ax icx te Tito ma txiꞌ tuj txꞌotxꞌ Dalmacia.
11 Junx te Lucas at wucꞌile.
Ticꞌa kꞌilte Marcos tuꞌn ttzaj tucꞌila,
porque at tajben weye tuꞌn tajben tuj akꞌuntl.
12 Atzunte Tíquico ma txi nsamaꞌne tuj tnam Efeso.
13 Octzun ttzaja,
kꞌintza nxbalune ẍjoꞌw,
aju cyaj nkꞌoꞌne tuj tja Carpo tuj tnam Troas.
Ex kꞌintza ke libro cyucꞌix ke libro tzꞌuꞌm;
atzun mas il tiꞌj ke libro tzꞌuꞌm.
14 Ate Alejandro aju txꞌinol cꞌuxbil,
nimcu mya baꞌn tbincha wiꞌje.
Awt Kajaw kꞌonte chojbil te tiꞌj ju tbinchben.
15 Ax icx teya cwentin oc tiba te,
porque nimxix in jaw kꞌojl tiꞌj ju yol in xi kpacbaꞌne.
16 Tej npon kꞌiꞌne tnejel maj twitz cawil tuꞌn nyoline te colbil wibe,
mi jun o ten wucꞌile te onil weye;
in cyaj coline cyuꞌn cycyakil;
cuchiwt mintiꞌ cyil tiꞌj jlu.
17 Pero ate Kajaw o ten wucꞌile ex tzaj tkꞌoꞌn wipumale tuꞌntzun t-xi npacbaꞌne tkanil colbil cye cycyakil,
tuꞌntzun cybinte cycyakil xjal mya judiy.
Cyjaꞌtzun in clete tuj ttzi balun.
18 Ate Kajaw clolte weye te tcyakil mya baꞌn,
ex oc chin cletele tuꞌn,
tuꞌn wocxe tuj tcawbil tuj cyaꞌj.
Nimanxwit tbi Kajaw tuj tcyakil tabkꞌiyil te jumajx.
Icxwitju.
Jun kꞌolbebl tuꞌn Pablo te bajsbil yol
19 Kꞌonxa nkꞌolbeble te Prisca ex te Aquila,
ex cye keju ateꞌ tuj tja Onesíforo.
20 Ate Erasto ma cyaj ten tuj tnam Corint,
atzunte Trófimo o yabt ex cyaj nkꞌoꞌne tuj tnam Mileto.
21 Tzꞌoc tililx tuꞌna tuꞌn ttzaj naja naꞌnxtok tul jbalil.
In xi kꞌolbeꞌna tuꞌn Eubulo,
tuꞌn Pudente,
tuꞌn Lino,
tuꞌn Claudia ex cyuꞌn cycyakil erman.
22 Tenwt Kajaw Jesucrist tucꞌila.
Tenwt t-xtalbil Dios cyucꞌile cycyakile.
Icxwitju.