Alcyeju il tiꞌj tuꞌn kbinchante, ocslal koꞌ
3
Naꞌnxa cye ocslal tuꞌn cyten tjakꞌ tcawbil gobierni ex tjakꞌ cycawbil aj sanjelal,
ex tuꞌn t-xi cyniman,
nok banin cyten tuꞌn cybinchante tcyakil akꞌuntl baꞌn.
2 Kꞌmanxa cye tuꞌn miꞌn cyyolin mya baꞌn tiꞌj juntl,
ex tuꞌn miꞌn cykꞌojin,
nok oꞌcx tuꞌn cyten baꞌn cyucꞌil cycyakil,
ex tuꞌn cyyecꞌunte cyib mans ke cyucꞌil cycyakil xjal.
3 Porque icx ke nej,
mintiꞌ knabl,
ex miban ko niman,
ex tzpetni koꞌ;
ic tzaꞌn majen koꞌ in xi kniman aju in pon kcꞌuꞌj tiꞌj,
ex o ajben te junxilchak achbil;
cucx in kbinchaꞌn aju mya baꞌn,
ex cucx in tzaj tloꞌch kcꞌuꞌj cyiꞌj mastl;
icꞌbil koꞌ,
ex nneꞌl kicꞌun kib kxolx.
4 Pero tej ttzaj kꞌakꞌan tcꞌuꞌj Dios kiꞌj,
aju Clol ke,
ex tej ttzaj tyecꞌun tcꞌujlalil kiꞌj,
5 ma ko clet tuꞌn,
pero mya tuꞌnju atwit kbinchben tzꞌaklxix,
nok oꞌcx tuꞌnju tzaj kꞌakꞌan tcꞌuꞌj kiꞌj.
Ma ko clet tuꞌnju txꞌajbil ke tej kitzꞌj tcabmajiꞌn,
ex tuꞌnju ma ko oc te acꞌaj tuꞌn Xewbaj Xjan.
6 Ma tzaj tkꞌoꞌn Dios Xewbaj Xjan ke,
nimxix ma tzaj tkꞌoꞌn nok tuꞌn Jesucrist aju Clol ke,
7 tuꞌntzun koc te tzꞌaklxix tuꞌn Dios nok tuꞌnju t-xtalbil,
ex tuꞌn kcꞌmonte chwinklal te jumajx ic tzaꞌn jun etzbil,
aju in ko ayon tiꞌj.
8 Aju yol lu axix toc ex baꞌn tuꞌn tkeꞌ kcꞌuꞌj tiꞌj,
ex wajbile tuꞌn t-xi tcyuwsaꞌna ju yol lu,
tuꞌntzun toc tilil cyuꞌn ke ocslal ke tiꞌj Dios tuꞌn cybinchante baꞌn.
Baꞌn tcyakil jlu ex at tajben cye xjal.
9 Pero paꞌmil tiba cyiꞌj xjal in che kꞌojin tuꞌn tlaj jun yol mintiꞌ tnabl,
ex in che yolin tiꞌj alcye ke cyxeꞌchel ex alcye cyiyjil xjal ojtxi,
in che kꞌojin tuꞌn tlaj tley Moisés,
nim in che yolin tiꞌj.
Nokx gan tcyakil jlu ex mintiꞌ tajben.
10 Ka at jun xjal ma cub tkꞌoꞌn jun pabl tib cyxole,
cawinxa jun maj ex ka cab maj,
ka mintiꞌ ma txi tbiꞌn tyola,
lajoꞌmexa cyxole,
11 porque baꞌn tuꞌna,
jun xjal icju ma tzꞌel tzpet,
ex in binchan il,
ex tcub t-sentens tuꞌnx tib.
Xi tmaꞌn Pablo te Tito alcye tuꞌn tbinchante
12 Oc t-xi nsamaꞌne Artemas tucꞌila ex ka Tíquico,
tzꞌoc tililx tuꞌna tuꞌn tul naja wucꞌile tuj tnam Nicópolis,
porque ma cub nximane ax tuꞌn ntene tuj jbalil.
13 Tzꞌoc tililx tuꞌna tuꞌn t-xi tkꞌoꞌna chꞌin onbil cye Zenas aju pjul ley,
tucꞌix Apolos,
tuꞌn tajben cye oc cyxiꞌ tuj cybe,
ex kꞌonxa aju cꞌajbel cye.
14 Ax icx baꞌn tuꞌn tel cycanoꞌn kerman tuꞌn cyakꞌnan tujxix tumel,
tuꞌntzun tcnet aju in ajben cye ex tuꞌn cyonin cye mastl ka at jun il tiꞌj cye,
cyjaꞌtzun tuꞌn toc twitz cyakꞌunben.
Jun kꞌolbebl tuꞌn Pablo te bajsbil yol
15 Cycyakil keju ateꞌ wucꞌile in xi kꞌolbeꞌna cyuꞌn.
Kꞌonxa nkꞌolbeble cye keju at cycꞌujlalil kiꞌj,
junx kocslabl cyucꞌil.
Awt Dios kꞌonte t-xtalbil cyeye cycyakile.
Icxwitju.