Miꞌn cyaj kcolin ju colbil ke
2
Cyjaꞌtzun il tiꞌj tuꞌn t-xi kbiꞌnxix aju yol ma kbi,
tuꞌntzun miꞌn kel txalpuj tiꞌj.
2 Porque at tipumal ju yol cyaj cymaꞌn anjel ojtxi,
ex tzaj jun castiw tuj tumelxix cyibaj keju e icꞌ tibaj ley ex mintiꞌ xi cyniman,
3 ¿yajtzun ke,
tzaꞌn tten tuꞌn kcyaj clet ka ma cyaj kcolin jun colbil maꞌxix toclen?
Aju colbil lu tnejelxix tzaj tpacbaꞌn Kajaw,
ex mas o cyuwsanjtz cyuꞌn keju e binte,
ex tzaj cymaꞌn ke.
4 Ex tzaj tchicꞌbaꞌn Dios ka ax toc ju yol tzaj cymaꞌn ke,
tzaj tchicꞌbaꞌn cyuꞌn ke señ,
ex cyuꞌn tbinchben nim cyipumal,
ex cyuꞌn junxilchak techal,
ex tuꞌnju cyoclen tzaj tkꞌoꞌn Xewbaj Xjan xi t-sipan Dios ic tzaꞌnx tajbil.
Oc Jesucrist ic tzaꞌn ke terman
5 Porque mintiꞌ cyaj tmaꞌn Dios tuꞌn cycawin ke anjel cyibaj xjal tuj ju tkꞌijlalil tzul,
aju in chin yoline tiꞌj.
6 Pero at jun o yolin tiꞌj tuj Tuꞌjil,
in tmaꞌn:
¿Ti cyxilen xjal?
¿Tikuꞌn cucx in che tzaj tnaꞌna ex cwentin ke tuꞌna?
7 Nok te cab kꞌij oc tkꞌoꞌna mas chꞌin cyoclen cywitz ke anjel,
pero te tibajxi xi tkꞌoꞌna cyajwalil ex nimbil cye ic tzaꞌn jun rey.
Xi tkꞌoꞌna cyoclen tibaj tcyakil takꞌunbena.
8 Tcyakil cyaj tkꞌoꞌna tjakꞌ cycawbil,
chi tuj Tuꞌjil.
Cyjaꞌtzun,
tej tcyaj tkꞌoꞌn Dios tcyakil tjakꞌ cycawbil xjal,
mintiꞌ jun cyaj tkꞌoꞌn myawt tjakꞌ cycawbil tcub;
pero naꞌnx klonte jaꞌlo ka ma cyaj ten tcyakil tjakꞌ cycawbil.
9 Pero in kqueꞌyin Jesús aju oc kꞌoꞌn mas chꞌin toclen cywitz ke anjel,
pero nok te cab kꞌij;
atzun jaꞌlo ma txi kꞌoꞌn nim toclen ex ma jaw nimsaꞌn tuꞌn tlaj ju cꞌixcꞌoj icꞌx tuꞌn tej tcyim,
cyim tuꞌn klaj kcyakil nok tuꞌn t-xtalbil Dios.
10 Tej tcub t-ximan Dios tuꞌn t-xi tiꞌn nimcu cꞌwaꞌlbaj tuj cyaꞌj,
ilxixtzun tiꞌj tuꞌn ttzꞌaket-xix aju binchalte colbil cye tuꞌnju cꞌixcꞌoj icꞌx tuꞌn,
porque tete Dios tcyakil ex tuꞌn o bant tcyakil.
11 Porque akeju ma che el tpaꞌn Crist tuꞌn cyajben oꞌcx te Dios,
junx cyman tucꞌil Crist,
cyjaꞌtzun mintiꞌ in chꞌixwi Crist tuꞌn cyoc tkꞌoꞌn te terman,
12 porque in tmaꞌn tuj Tuꞌjil:
Cxel nmaꞌne tkanil tiꞌja cye wermaniye,
ex cxel nkꞌoꞌne chjonte teya cyxol keju in cub cybuyin cyib.
13 Ex juntl maj in tmaꞌn:
Ckebel ncꞌuꞌje tiꞌj Dios.
Ex juntl maj in tmaꞌn:
Lu kine lu cyucꞌix ke ncꞌwaꞌle e tzaj tkꞌoꞌn Dios,
chi tuj Tuꞌjil.
14 Ic tzaꞌn cye cꞌwaꞌlbaj junx cychibjal ex junx cychcꞌel,
ax icx te Crist oc te xjal,
at tchibjal ex tchcꞌel ic tzaꞌn cye,
tuꞌntzun tnaj tipumal tajaw camic,
aju tajaw il,
tuꞌnju o cyim Crist,
15 ex tuꞌn cytzokpet cycyakil keju tzyuꞌn ke te majen tuꞌnju cucx in che xob twitz camic tcyakil kꞌij.
16 Porque mya cye anjel in tzaj tkꞌoꞌn onbil,
nok oꞌcx cye tiyjil Abraham.
17 Cyjaꞌtzun tten,
ilxix tiꞌj tuꞌn toc Crist ic tzaꞌn ke terman tuj tcyakil tzaꞌn cyten,
tuꞌntzun tkꞌakꞌanxix tcꞌuꞌj cyiꞌj ex tuꞌn toc te tnejel pal in japunxix tuꞌn tuj tajbebl twitz Dios,
ex tuꞌn tchjet cyil xjal tuꞌn.
18 Porque tuꞌnju icꞌx tuꞌn Crist tej toc tuj joybil tiꞌj,
cyjaꞌtzun at tipumal tuꞌn tonin cye keju in che oc tuj joybil cyiꞌj.