Ate Jesús mas at toclen twitz Moisés
3
Erman,
ma che el paꞌne tuꞌn Dios tuꞌn cyajbene oꞌcx te,
ex ma che txconjtze tuꞌn Dios cyucꞌil mastl tuꞌn cyoque tecuxix.
Cyjaꞌtzun che ximane tiꞌj Jesucrist aju apostl ex tnejel pal ocslaꞌn kuꞌn.
2 Porque ate Dios oc kꞌonte Jesús te tnejel pal,
ex japunxix tcyakil tyol Dios tuꞌn Jesús,
ic tzaꞌn te Moisés japunxix tcyakil tuꞌn cyxol ke xjal etzan ke tuꞌn Dios.
3 Porque baꞌn tuꞌn tcꞌmonte Jesús jun toclen mas maꞌ twitz ju te Moisés,
ic tzaꞌn jun xjal binchal ja,
mas at toclen twitz ju ja.
4 Porque tcyakil ja at jun o binchante;
pero atzunju o binchante tcyakil,
ate Dios.
5 Cyjaꞌtzun,
ate Moisés majen,
ex japunxix tuꞌn tuj tcyakil tajbebl cyxol xjal etzan tuꞌn Dios,
porque atzun takꞌun Moisés tuꞌn ttzaj tchicꞌbaꞌn ju yol ctzajel tmaꞌn Dios.
6 Atzunte Crist Cꞌwaꞌlbaj te,
ex japunxix tuꞌn cyxol xjal etzan tuꞌn Dios,
ex atzun koꞌ etzan tuꞌn Dios ka cucx tkeꞌxix kcꞌuꞌj tiꞌj,
ex ka cucx ktzalaj tuꞌn kayon tiꞌj ju ctzajel kꞌoꞌn ke.
In tzaj tkꞌoꞌn Dios ojlabl cye xjal etzan tuꞌn
7 Cyjaꞌtzun cynaꞌntze aju in tmaꞌn Xewbaj Xjan tuj Tuꞌjil:
Ka ma cybiye aju in tmaꞌn Dios jaꞌlo,
8 miꞌn cub cycyuwsaꞌne cyanmiye ic tzaꞌn tej toc icꞌleꞌn Dios cyuꞌn aj Israel tuj tkꞌijlalil tej toc tuj joybil tiꞌj cyuꞌn tuj lugar mintiꞌ cynajbil xjal tuj,
chi tuj Tuꞌjil.
9 Porque chi Dios:
Atzun in oque tuj joybil wiꞌje cyuꞌn cyxeꞌchele ojtxi,
ex in probarinjtze cyuꞌn,
masque o cyil nbinchbene tuj 40 abkꞌi.
10 Tuꞌntzun jlu tzaj nkꞌoje cyiꞌj ke xjal lu ex o nmaye:
Cucx in che txalpujeꞌ tuj cyanmi ex mi cyaj tuꞌn t-xi cyniman nyole.
11 Cyjaꞌtzun tzaj nkꞌoje cyiꞌj,
ex xi nmaꞌne jun nyole axix toc cye,
tuꞌn miꞌn cyocx tuj txꞌotxꞌ jatum tuꞌn cyojlan wuꞌne,
chi Dios.
12 Cycwentin oc cyibe erman,
tuꞌn miꞌn toc cyanmiye mya baꞌn,
ex cycwentin oc cyibe tuꞌn miꞌn tcyaj cycoline cyocslable,
ex tuꞌn miꞌn tel cypaꞌn cyibe tiꞌj ju Dios itzꞌ.
13 Nok oꞌcx cykꞌom cynable cyxolxe junjun kꞌij,
atxcu ambil jaꞌlo;
tuꞌntzun mi jun cyeye cyuwix tanmi tuꞌn t-sbubl il.
14 Porque ma kcꞌam koclen tucꞌil Crist,
ka cucx tkeꞌxix kcꞌuꞌj tiꞌj ic tzaꞌn nej,
ex ka mintiꞌ ma ko yucch.
15 Cucx tkꞌmanjtz ju yol lu:
Ka ma cybiye aju in tmaꞌn Dios jaꞌlo,
miꞌn cub cycyuwsaꞌne cyanmiye ic tzaꞌn tej toc icꞌleꞌn Dios cyuꞌn aj Israel.
16 ¿Alcyetzun keju oc icꞌleꞌn Dios cyuꞌn,
ex otok cybi tyol?
¿Myapetzun cycyakil keju e jeꞌtz tuj Ejipt tuꞌn Moisés?
17 ¿Ex alcyetzun keju tzaj tkꞌoj Dios cyiꞌj tuj 40 abkꞌi?
¿Myapetzun akeju e binchan il ex e cyim tuj lugar mintiꞌ cynajbil xjal tuj?
18 Ex tej t-xi tmaꞌn Dios jun yol axix toc tuꞌnx tib,
¿al etzun xi tmaꞌn tuꞌn miꞌn cyocx tuj txꞌotxꞌ jatum tuꞌn cyojlan tuꞌn?
¿Myapetzun cye keju mintiꞌ xi cyniman tyol?
19 Cyjaꞌtzun ma kil,
mintiꞌ bant tuꞌn cycanun aj Israel tuj ojlabl tuꞌn tlaj mintiꞌ xi cyocslaꞌn tyol Dios.