4
Cyjaꞌtzun atxcu ju yol tzaj tmaꞌn tuꞌn kcanun tuj ju ojlabl in tkꞌoꞌn Dios,
kcwentin oc kib,
mya yajcu at jun ke miꞌn canun tuj ojlabl.
2 Porque icx ke ma tzaj kꞌmaꞌn tkanil colbil ke,
ic tzaꞌn tzaj kꞌmaꞌn cye;
pero aju yol cybi aj Israel mintiꞌ ajben cye porque mintiꞌ xi cyocslaꞌn tej cybinte.
3 Pero akekoꞌ ma kocsla ex ma ko canun tuj ojlabl ic tzaꞌnx o tma Dios:
Cyjaꞌtzun tzaj nkꞌoje cyiꞌj,
ex xi nmaꞌne jun nyole axix toc cye,
tuꞌn miꞌn cyocx tuj txꞌotxꞌ jatum tuꞌn cyojlan wuꞌne,
chi Dios.
Tma Dios jlu masque otok bant takꞌun atxix tej tbant twitz txꞌotxꞌ.
4 Porque tuj Tuꞌjil at jatum in tmaꞌn tiꞌj twukin kꞌij cyjaꞌ:
Ex ojlan Dios tuj twukin kꞌij tej tbaj bant tcyakil takꞌun.
5 Ex ma cybiye jatum in tmaꞌn:
Mlay che ocx tuj txꞌotxꞌ jatum tuꞌn cyojlan wuꞌne,
chi tuj Tuꞌjil.
6 Atx te yol tuꞌn cycanun junjun tuj ojlabl in tkꞌoꞌn Dios,
pero akeju o kꞌmanjtz tkanil colbil cye ojtxi,
mintiꞌ e canun tuj ojlabl tuꞌn tlaj mintiꞌ xi cyniman tyol Dios.
7 Cyjaꞌtzun tten in tzaj tkꞌoꞌn Dios juntl kꞌij:
Tuj kꞌij jaꞌlo,
chi tuj Tuꞌjil.
Aju yol lu in tzaj tmaꞌn Dios ke,
otok txi tmaꞌn ojtxi,
ex tbajlenxi nimcu abkꞌi o tma juntl maj nok tuꞌn ju tyol David,
ic tzaꞌn ma cybiye in tmaꞌn tuj Tuꞌjil:
Ka ma cybiye aju in tmaꞌn Dios jaꞌlo,
miꞌn cub cycyuwsaꞌne cyanmiye.
8 Porque nokwit xi tkꞌoꞌn Josué ojlabl cye aj Israel,
miwtlo o yolin Dios tiꞌj juntl kꞌij.
9 Cyjaꞌtzun,
atx jun ojlabl cye ke xjal etzan tuꞌn Dios,
ic tzaꞌn te Dios tej tojlan tuj twukin kꞌij.
10 Porque aju ma canun tuj ojlabl in tkꞌoꞌn Dios,
ax icx ma tzꞌojlan tuꞌn miꞌn takꞌnantl,
ic tzaꞌn te Dios o tzꞌojlan tej tbant takꞌun.
11 Kkꞌoꞌnctzun tilil tuꞌn kcanun tuj ju ojlabl lu,
tuꞌntzun miꞌn kcub tzꞌak ic tzaꞌn cye,
ex tuꞌn miꞌn koc ic tzaꞌn cye mintiꞌ xi cyniman ju yol.
12 Porque aju tyol Dios itzꞌte ex at tipumal,
ex mas at ttziꞌ twitz jun spad cab pacꞌ ttziꞌ;
ex in pon xuyl max tujxi kanmi,
ex tiꞌj kxew,
ex tiꞌj tyakamil kximlal,
ex max tujxi kbakil,
ex nneꞌl tnicꞌ tiꞌj kximbetz ex aju kaj tuꞌn kbinchante.
13 Ex mintiꞌ jun tchꞌisben Dios miwt kꞌanchaꞌl twitz,
ex mintiꞌ jun maksiꞌn;
tcyakil kꞌanchaꞌl twitz Dios jatum tuꞌn kpon kꞌol tajlal.
Ate Jesús tnejel pal maꞌxix toclen
14 At jun tnejel pal ke maꞌ toclen,
ma tzꞌocx max tuj cyaꞌj,
ate Jesús aju Tcꞌwaꞌl Dios,
cyjaꞌtzun tten,
ktzyumxix aju yol ma kocsla.
15 Porque at jun tnejel pal ke baꞌn kꞌakꞌan tcꞌuꞌj kiꞌj tuꞌn tlaj mintiꞌ kipun,
porque tuj tcyakil oc jlu tuj joybil tiꞌj ic tzaꞌn ke,
pero mintiꞌ binchan il.
16 Ko lakꞌextzun ttxlaj Dios ex keꞌc kcꞌuꞌj tiꞌj tuꞌn kpon twitz tkꞌukbil jatum taꞌ t-xtalbil,
tuꞌntzun ttzaj kꞌakꞌan tcꞌuꞌj kiꞌj ex tuꞌn kcꞌmonte jun xtalbil tuj tkꞌijlalil oc tul tajbenxix ke.