5
Porque tcyakil tnejel pal in jaw scꞌet cyxol xjal,
ex nnoꞌc kꞌoꞌn tuꞌn tyolin cyiꞌj xjal twitz Dios,
atzun takꞌun tuꞌn t-xi tkꞌoꞌn oyaj ex chojbil tuꞌn tchjet cyil xjal.
2 At tpasens cyiꞌj ke xjal mintiꞌ chꞌin baꞌn cyuꞌn ex o che el txalpuj,
porque icx te mintiꞌxix tipun;
3 ex tuꞌn tlaj mintiꞌxix tipun,
ilxix tiꞌj tuꞌn t-xi tkꞌoꞌn chojbil tuꞌn tchjet til,
ax icx tuꞌn tchjet cyil xjal.
4 Ex mya tuꞌnx te xjal nnoꞌc tkꞌoꞌn toclen tuꞌn toc te tnejel pal;
nok oꞌcx tuꞌn Dios in txconjtz ex nnoꞌc kꞌoꞌn toclen,
ic tzaꞌn te Aarón.
5 Ax icx te Crist,
mintiꞌ jaw tniman tib tuꞌn toc te tnejel pal,
nok oꞌcx xi kꞌoꞌn toclen tuꞌn Dios tej t-xi kꞌmaꞌn te:
Aya Ncyꞌajale,
ma chin oque te tmana jaꞌlo.
6 Ax icx in tmaꞌntl tuj Tuꞌjil:
Aya cꞌoquel te pal te jumajx.
Ax toclena cꞌoquel ic tzaꞌn te Melquisedec,
chi tuj Tuꞌjil.
7 Tuj tkꞌijlalil tej tten Crist twitz txꞌotxꞌ o naꞌn Dios ex o cubsanxix wen,
ex jaw tkꞌajkꞌajel twiꞌ cyuw,
ex jaw okꞌ twitz Dios,
porque at tipumal Dios tuꞌn tclet Crist tuj camic tuꞌn;
ex tzaj tbiꞌn Dios tkanbetz tuꞌnju niman Dios tuꞌn.
8 Masque Tcꞌwaꞌl Dioste,
pero bant tuꞌn tuꞌn t-xi tniman tyol Dios tuꞌnju nimcu icꞌx tuꞌn.
9 Ex tej ttzꞌaket-xix tuj tcyakil,
cyjaꞌtzun oc te colol te jumajx cye cycyakil keju in che niman te.
10 Porque ax Dios o kꞌmante tuꞌn toc te tnejel pal,
ax toclen ic tzaꞌn te Melquisedec.
At xobajil ka ma cyaj kcolin kocslabl
11 At nimcu tuꞌn nyoline tiꞌj jlu,
pero mlay pujet naj porque mintiꞌ nnoꞌcx naj tuj cywiꞌye.
12 Porque mawtlo che oque te xnakꞌtzal jaꞌlo,
porque ma bet-xi kꞌij t-xilen cyocslaꞌne,
pero jlu nok oꞌcx cyajbile tuꞌn cyxnakꞌtzanjtze juntl maj tiꞌj ju tnejel xnakꞌtzbil tiꞌj tyol Dios;
ex ma che oque ic tzaꞌn tal neꞌ cucx tuꞌn t-xiꞌ cychꞌuꞌye ex mlay txiꞌ wabj cyuꞌne.
13 Porque alcye cucx tchꞌuꞌn,
mlay tzꞌel tnicꞌ tiꞌj ju yol tzꞌaklxix,
porque neꞌx taꞌ.
14 Atzunju wabj in ajben cye keju ma che chꞌiy,
ex ma tzꞌoc cynabl tuꞌnju nimxi tzicꞌ cywitz tiꞌj,
cyjaꞌtzun nneꞌl cynicꞌ tiꞌj alcyeju baꞌn ex alcyeju mya baꞌn.