6
Cyjaꞌtzun tten,
kkꞌoꞌnc tilil tuꞌn tocxix knabl ic tzaꞌn jun tij xjal,
ex mya nok oꞌcx tuꞌn kyolin tiꞌj tuj tnejel xnakꞌtzbil tiꞌj Crist.
Ex miꞌn ko aj meltzꞌaj juntl maj tuꞌn ttzaj keꞌ kocslabl tiꞌj Dios,
ex tuꞌn tajtz tiꞌj kanmi tiꞌj kbinchben mintiꞌ tajben.
2 Ex mya ax tuꞌn kcyaj ten tiꞌj ju xnakꞌtzbil tiꞌj byabl,
ex tiꞌj ju xnakꞌtzbil tuꞌn tcub kkꞌoꞌn kkꞌab tibaj cywiꞌ ocslal,
ex tiꞌj ju xnakꞌtzbil tiꞌj ankꞌibl cyxol cyimni,
ex tiꞌj ju xnakꞌtzbil tiꞌj jwisi tzul te jumajx.
3 Cyjaꞌtzun cꞌoquel tilil kuꞌn tuꞌn toc mastl knabl,
ka tajbil Dios.
4 Porque akeju ma spicꞌbanjtz tuj cynabl ex ma tzꞌel cynicꞌ tiꞌj ju oyaj tzaj tuj cyaꞌj,
ex ma cycꞌam cyoclen tiꞌj Xewbaj Xjan,
5 ex ma tzꞌel cynicꞌ tiꞌj tyol Dios tbanilxix,
ex ma cyil ke tbinchben nim cyipumal ctzajel tyecꞌun tuj tkꞌijlalil tzul,
6 ka ma che cub tzꞌak jlu,
mlayx bant tuꞌn tajtz juntl maj tiꞌj cyanmi,
tuꞌnju in jaw cykꞌoꞌn Tcꞌwaꞌl Dios twitz crus juntl maj,
ex in tzaj tchꞌixwi cywitz xjal cyuꞌn.
7 Porque ic tzaꞌn jun piẍ txꞌotxꞌ in acꞌ tuꞌn jbal cucx in cub tibaj,
ex in tkꞌoꞌn tawal tuꞌn tajben cye keju in che akꞌnan twitz,
in cub tcyꞌiwlaꞌn Dios txꞌotxꞌ lu;
8 atzunju txꞌotxꞌ in tkꞌoꞌn chꞌiꞌx ex chꞌiꞌx cꞌul,
mintiꞌtl tajben;
ex jaculo tma Dios tuꞌn tnaj,
ex aju bajsbil te tuꞌn toc tkꞌakꞌal.
Mlay ko yucch ka kꞌukl kcꞌuꞌj tiꞌj Crist
9 Erman at ncꞌuꞌje cyiꞌje,
masque in chin yoline icju,
atzun cyeye,
in keꞌxix ncꞌuꞌje cyiꞌje oc cybinchaꞌye aju mas baꞌn;
atzun jlu jun yecꞌbil ka ax toc ma che clete.
10 Porque ate Dios tzꞌaklxix,
mlay tzicꞌ tnaꞌl tuꞌn aju cyakꞌunbene;
xi cyyecꞌune ka at cycꞌujlalile tiꞌj Dios tuꞌnju e ajbene cye ocslal ex cucx in che ajbene cye.
11 Pero wajbile teyle junjun cyeye cucx tuꞌn toc tilil cyuꞌne tuꞌntzun tkeꞌxix cycꞌuꞌje tiꞌj ju in che ayone tiꞌj.
12 Miꞌn waje tuꞌn cyoque cyꞌaj,
nok oꞌcx tuꞌn cyoc lpeꞌye cyiꞌj keju ma cycꞌam aju yol tzaj ttziyan Dios,
ma cycꞌam tuꞌnju at cyocslabl ex at cypasens.
13 Porque tej ttzaj ttziyan Dios tyol te Abraham,
ax tbi tzaj tnaꞌn tiꞌj tyol,
porque mintiꞌ juntl mas maꞌ toclen twitz tuꞌn ttzaj tnaꞌn tbi tiꞌj tyol.
14 Tzaj tmaꞌn te Abraham:
Ax toc nimxix cbel ncyꞌiwlaꞌna,
ex cchmetelxix tiyjila wuꞌne,
chi Dios.
15 Cyjaꞌtzun o tcꞌam Abraham aju tzaj ttziyan Dios te,
porque at tpasens tuꞌn tayon tiꞌj.
16 Ax toc oc in xi cytziyan xjal jun yol axix toc,
in tzaj cynaꞌn tbi juntl mas maꞌ toclen cywitz;
ex ka ma jaw jun yol cyxol,
atzun in tzaj cynaꞌn tbi Dios tiꞌj cyyol ex tuꞌn tcyaj segurxix.
17 Cyjaꞌtzun tzaj tnaꞌn Dios ax tbi tiꞌj tyol,
porque atzun taj Dios,
tuꞌn ttzaj tyecꞌunxix ka mlay chꞌexpet aju cub t-ximan;
tzaj tyecꞌun Dios jlu cye keju at tuꞌn cycꞌmonte aju tzaj ttziyan cye.
18 Tzaj tnaꞌn Dios ax tbi tiꞌj tyol tuꞌn tkꞌukbanjtzxix kcꞌuꞌj tuꞌnju cabe yol mlay chꞌexpet,
ex mlay bant tuꞌn tnicꞌan Dios yol tiꞌj jlu;
cyjaꞌtzun ma ko pon ok tucꞌil Dios tuꞌn kclet ex tuꞌn kcambante aju in ko ayon tiꞌj.
19 Aju oybil lu ic tten ic tzaꞌn takꞌal barc,
in ajben te tzuybil te kanmi tuꞌn tten kanmi segurxix ex tuꞌn miꞌn kyucch;
aju oybil atzun tzajni tuj ju Lugar Xjanxix tiꞌjxi ju xbalun te makbil tcub tuj tmij tja Dios tuj cyaꞌj.
20 Atzun ocx nej Jesús tuꞌn tjaket kbe.
Cyjaꞌtzun ma tzꞌoc Jesús te tnejel pal te jumajx,
ax toclen ic tzaꞌn te Melquisedec.