Ate Jesús pal ax toclen ic tzaꞌn te Melquisedec
7
Porque ate Melquisedec reytok tuj tnam Salem,
ex paltok in ajben teju Dios maꞌxix toclen.
Ate Melquisedec etz canil tiꞌj Abraham tej tajtz Abraham tuj kꞌoj,
tcublenxi cyiꞌj rey tuꞌn,
ex cub cyꞌiwlaꞌn Abraham tuꞌn Melquisedec.
2 Tcyakilju o tzyet tuꞌn Abraham tuj kꞌoj xi tkꞌoꞌn tlajiꞌn te Melquisedec;
tnejelxix aju tnabl tbi Melquisedec,
jun rey tzꞌaklxix;
ex juntl tbi,
rey tuj Salem;
atzun in tmaꞌn ju yol lu:
Aju rey kꞌolte cymojbabl cyib xjal.
3 Mintiꞌ tzꞌiban alcye tman ex alcye ttxuꞌ,
ex mintiꞌ in tmaꞌn alcye ke t-xeꞌchel;
ex mintiꞌ in tmaꞌn jtoje tzꞌitzꞌj ex jtoje cyim;
icx tten ic tzaꞌn Tcꞌwaꞌl Dios,
cucx o ten te pal te jumajx.
4 Che ximane tiꞌj,
maꞌxix t-xilen ju xjal lu,
porque tcyakilju el tiꞌn kxeꞌchel Abraham cye rey tej toc kꞌoj,
xi tkꞌoꞌn tlajiꞌn te Melquisedec.
5 Akeju tiyjil Leví in cycꞌmoꞌn cyoclen tuꞌn cyoc te pal,
ex kꞌmaꞌmaj cye tuꞌn tley Moisés tuꞌn cycꞌmonte tlajiꞌn te tcyakil xjal,
ax ke cyerman in xi cykꞌoꞌn tlajiꞌn cye masque ax cyiyjil,
porque ax e jeꞌl itzꞌj tiꞌj Abraham.
6 Atzunte Melquisedec,
mya junx tiyjil cyucꞌil tiyjil Leví,
pero xi tkꞌoꞌn Abraham tlajiꞌn te;
ex cub cyꞌiwlaꞌn Abraham tuꞌn Melquisedec,
ate Abraham o tzaj ttziyan Dios jun yol te.
7 Ex clar taꞌ te yol,
aju chꞌin toclen in cub cyꞌiwlaꞌn tuꞌnju maꞌ toclen.
8 Akeju aj Leví in cycꞌmoꞌn tlajiꞌn,
pero in che cyim;
atzunte Melquisedec xi tcꞌmoꞌn tlajiꞌn ex in tmaꞌn tuj Tuꞌjil ka itzꞌxte.
9 Jacu bant tuꞌn t-xi kmaꞌn jaꞌlo:
Ke pal tiyjil Leví masque in cycꞌmoꞌn tlajiꞌn cye xjal,
pero ax icx cye mer ic tzaꞌn xi cykꞌoꞌn tlajiꞌn tej t-xi tkꞌoꞌn Abraham te Melquisedec.
10 Masque naꞌnxtok cyitzꞌj tej tetz Melquisedec canil tiꞌj Abraham,
pero tuꞌnju ax tzaj cyiyjil tiꞌj Abraham,
cyjaꞌtzun mer ic tzaꞌn cyucꞌix ke e jeꞌx kꞌonte tlajiꞌn.
11 Ke aj Israel cycꞌam ju ley cyuꞌn ke pal tiyjil Leví,
ax tiyjil Aarón.
Nokwit at tumel tuꞌn cyoc aj Israel tzꞌaklxix cyuꞌn ke pal tiyjil Leví,
entons myawtlo il tiꞌj tuꞌn ttzaj junxitl pal icx toclen ic tzaꞌn te Melquisedec,
ex myatzun toca cyxol ke tiyjil Aarón.
12 Porque ka ma che chꞌexpet ke pal,
ax icx il tiꞌj tuꞌn tchꞌexpet ley.
13 Porque junxitl tiyjil Jesucrist aju in ko yolin tiꞌj,
mi jun cye o tzꞌajben twitz altar.
14 Porque clarxix taꞌ,
ate Kajaw ul itzꞌj tiꞌj tiyjil Judá,
mintiꞌ o tma Moisés tuꞌn cyoc tiyjil Judá te pal.
15 Ex aju in ko yolin tiꞌj mas clarxix taꞌ,
porque ma tzaj junxitl pal ax toclen ic tzaꞌn te Melquisedec.
16 Mintiꞌ ma tzꞌoc te pal tuꞌnju tiyjil ic tzaꞌn in tmaꞌn ley,
nok oꞌcx ma tzꞌoc te pal tuꞌnju tipumal tchwinklal mlay naj.
17 Porque in yolin Dios tuj Tuꞌjil tiꞌj:
Aya cꞌoquel te pal te jumajx.
Ax toclena cꞌoquel ic tzaꞌn te Melquisedec,
chi Dios.
18 Cyjaꞌtzun,
aju mandamyent at ojtxi ma naj tuꞌnju mintiꞌ tipun ex mintiꞌ tajben.
19 Porque mintiꞌ jun colbil tzꞌaklxix tzaj tkꞌoꞌn tley Moisés.
Atzun jaꞌlo ma tzaj kꞌoꞌn jun mas baꞌnxix jatum tuꞌn toc keꞌ kcꞌuꞌj tiꞌj,
tuꞌntzun kpon lakꞌeꞌ ttxlaj Dios.
20 Tej toc Jesucrist te pal tzaj tnaꞌn Dios ax tbi tiꞌj tyol.
21 Atzun ke txkantl pal o che oc te pal pero mintiꞌ tzaj tnaꞌn Dios tbi cyiꞌj tuꞌn cyoc te pal;
atzunte Jesucrist ma tzꞌoc te pal tuꞌnju yol tzaj tnaꞌn Dios tbi tej t-xi kꞌmaꞌn te:
Ax tbi Kman tzaj tnaꞌn tiꞌj tyol ex mlay chꞌexpet.
Chi Kajaw:
Aya cꞌoquel te pal te jumajx.
Ax toclena cꞌoquel ic tzaꞌn te Melquisedec.
22 Cyjaꞌtzun,
ma tzꞌoc Jesús te piador tiꞌj jun yol mas baꞌnxix cyaj bant tiꞌj tuꞌn Dios kucꞌil.
23 Akeju txkantl pal nim cybaj e chmet,
porque tuꞌnju in che cyimxi mintiꞌ tumel cucx tuꞌn cyten.
24 Atzunte Jesús atx toclen te pal tuꞌnju cucx tten te jumajx.
25 Cyjaꞌtzun tten at tipumal tuꞌn cyclet te jumajx akeju in che pon lakꞌeꞌ ttxlaj Dios tuꞌn Jesús,
porque itzꞌ te Jesús te jumajx tuꞌn tcubsan twitz Dios cyiꞌj.
26 Porque atzun jlu jun tnejel pal baꞌn tuꞌn tajben ke,
xjan te,
ex mintiꞌ til,
ex mintiꞌ tzꞌil tiꞌj,
ex tpaꞌn tib cyiꞌj aj il,
ex ma tzꞌoc kꞌoꞌn toclen te maꞌxix cywitz cycyakil keju ateꞌ tuj cyaꞌj.
27 Mya il tiꞌj tuꞌn t-xi tkꞌoꞌn Jesús chojbil tcyakil kꞌij ic tzaꞌn in cybinchaꞌn txkantl tnejel pal;
tnejel in xi cykꞌoꞌn ju chojbil tuꞌn tnajset cyil,
ex te tibajxi in xi cykꞌoꞌn chojbil tuꞌn tnajset cyil xjal.
Pero mya ic tten te Jesús,
porque nok junx maj xi tkꞌoꞌn ju chojbil tej t-xi tkꞌon tib tuꞌn tcyim.
28 Porque tuꞌn tley Moisés in che oc kꞌoꞌn te tnejel pal ke xjal mintiꞌxix cyipun;
atzunju yol tzaj tnaꞌn Dios tbi tiꞌj,
o tzaj kꞌmaꞌn tuꞌn Dios te tibajxi ju ley;
tzaj kꞌmaꞌn tuꞌn toc aju Tcꞌwaꞌl te tnejel pal,
aju tzꞌaklxix te jumajx.