Ate Jesús tzaj kꞌonte ju acꞌaj yol cyaj bant tiꞌj tuꞌn Dios kucꞌil
8
Aju mas nim toclen tiꞌj ju in chin yoline tiꞌj,
at jun tnejel pal ke kꞌukl tuj bankꞌabaj ttxlaj tkꞌukbil Dios tuj cyaꞌj,
jatum in cawin Dios.
2 Atzun jlu tnejel pal in ajben tuj Lugar Xjan ex tuj ja xbalun te nabl Dios,
atzunju ja xbalun axix toc,
tuꞌn Dios jaw tbinchaꞌn,
mya tuꞌn xjal.
3 Porque cycyakil keju in che oc kꞌoꞌn te tnejel pal,
atzun cyakꞌun tuꞌn t-xi cykꞌoꞌn ke oyaj ex ke chojbil;
cyjaꞌtzun tten ax icx te Jesucrist ilxix tiꞌj tuꞌn t-xi tkꞌoꞌn jun oyaj.
4 Nokwit ax taꞌ twitz txꞌotxꞌ,
myawtlo palte,
porque ateꞌ pal kꞌolte oyaj ic tzaꞌn in tmaꞌn tley Moisés.
5 Akeju pal lu in che ajben tuj jun Lugar Xjan,
atzun tilbilalju ex t-xlecumal ju Lugar Xjan at tuj cyaꞌj,
ic tzaꞌn tzaj kꞌmaꞌn te Moisés tej chꞌixtok tjaw tbinchaꞌn ju ja xbalun te nabl Dios:
Queꞌyinxa tuꞌn tbinchanteya tcyakil ic tzaꞌn tilbilal xi nyecꞌune teya twi witz,
chi Dios.
6 Atzun jaꞌlo ma tcꞌam Crist jun tajbebl mas maꞌ toclen,
porque ate in tzaj txꞌolbante jun yol mas baꞌnxix aju ma cyaj bant tiꞌj tuꞌn Dios kucꞌil,
ex mas baꞌn ju yol lu twitzju tzaj ttziyan Dios ojtxi.
7 Porque aju ojtxi yol nokwit mintiꞌ tpaltil,
myawtlo il tiꞌj tuꞌn tul juntl tcabin yol.
8 Cyjaꞌtzun tzaj tmaꞌn Dios ka at cypaltil xjal,
ic tzaꞌn in tmaꞌn tuj Tuꞌjil:
Chi Kman:
Tzul tkꞌijlalil cyjel bant tiꞌj jun acꞌaj yol wuꞌne cyucꞌil aj Israel ex cyucꞌil aj Judá.
9 Mya ic tten ju yol lu ic tzaꞌn ju yol cyaj bant tiꞌj wuꞌne cyucꞌil cyxeꞌchel tuj tkꞌijlalil tej cyetz nẍaklune tuj txꞌotxꞌ Ejipt.
Porque mintiꞌ ma txi cyniman aju yol cyaj bant tiꞌj wuꞌne cyucꞌil,
cyjaꞌtzun ma che el wicꞌune,
chi Kman.
10 Cyjaꞌtzun tten atzun juntl yol cyjel bant tiꞌj wuꞌne cyucꞌil aj Israel tuj tkꞌijlalil tzul,
chi Kman:
Cꞌoquex nkꞌoꞌne nleye tuj cynabl,
ex cbel ntzꞌibane twitz cyanmi.
Ex chin oquele te Cydios,
atzun cye che oquel te jun tnam etzan wuꞌne.
11 Mya il tiꞌj tuꞌn t-xi cykꞌoꞌn xjal xnakꞌtzbil cye cyucꞌil,
ex mya il tiꞌj tuꞌn t-xi cykꞌoꞌn xnakꞌtzbil cye cyerman,
ex mlay txi cymaꞌn:
Ojtzkima Kajaw che chiwt.
Porque cycyakil cꞌelel cynicꞌ wiꞌje,
tzaꞌnx keju chꞌin cyoclen ax icx keju maꞌ cyoclen.
12 Porque ctzajel kꞌakꞌan ncꞌuꞌje cyiꞌj tuꞌnju cybinchben mya baꞌn,
ex te jumajx mlay tzaj nnaꞌntle cyil,
chi Dios.
13 Tuꞌnju in yolin Dios tiꞌj jun yol acꞌaj tuꞌn tcyaj bant tiꞌj tuꞌn cyucꞌil,
cyjaꞌtzun aju yol at nej ma tzꞌoc tkꞌoꞌn te mintiꞌ tajben;
aju nnoꞌc kꞌoꞌn te mintiꞌ tajben ex ma tijin,
chꞌix tcub naj.