At cabe ja te nabl Dios, jun twitz txꞌotxꞌ ex jun tuj cyaꞌj
9
Tej tcyaj bant tiꞌj tnejel yol tuꞌn Dios cyucꞌil xjal ojtxi,
nacꞌuꞌmaj tiꞌj tzaꞌn tten tuꞌn cycꞌulun xjal,
ex at jun ja twitz txꞌotxꞌ xjan tbi.
2 Porque aju ja xbalun te nabl Dios ictzun tten cyjaꞌ:
Aju tnejel cwart,
Lugar Xjan tbi;
atzun tcub ju candil tucꞌix ju mes cyucꞌix ke pan cyꞌiwlaꞌmaj.
3 Ex tiꞌjxi tcabin xbalun te makbil tcub tuj tmij tja Dios,
at juntl cwart,
Lugar Mas Xjanxix tbi.
4 Atzun tcub altar kꞌan pwak jatum in cub patit storac,
ex atzun tcub ju cax toc kꞌan pwak tiꞌj tcyakil,
cꞌubl teju yol tzaj tmaꞌn Dios.
Tujtzunju cax tcuꞌx jun cꞌil kꞌan pwak ttxꞌotxꞌil jatum tcuꞌx maná,
ex atzun tcuꞌx tcyꞌakoꞌch Aarón aju o xulin,
ex atzun cycuꞌx ke tzꞌlom abj jatum tzꞌiban ju yol cyaj bant tiꞌj tuꞌn Dios cyucꞌil aj Israel.
5 Ex tibaj ju cax tcub cyilbilal ke querubín,
te jun yecꞌbil ka ax taꞌ Dios,
tcub cyxlecumal tibaj tmaksil cax jatum in chjet cyil xjal.
Pero mlay bant tuꞌn nyoline tiꞌj tcyakil jlu jaꞌlo.
6 Cyjaꞌtzun tten nacꞌuꞌmaj tiꞌj tuj ju ja xbalun te nabl Dios.
Tuj tnejel cwart cucx in che ocx ke pal tuꞌn tjapun ju cyajbebl.
7 Atzun tuj tcabin cwart oꞌcx ju tnejel pal nnoꞌcx jun maj tuj abkꞌi;
ex mlay tzꞌocx ka mintiꞌ chicꞌ kꞌiꞌn tuꞌn,
tnejelxix in xi tkꞌoꞌn chojbil te til,
ax icx te chojbil cyil xjal tuꞌnju at maj in che el tzpet tiꞌj.
8 Tuꞌn jlu in tyecꞌun Xewbaj Xjan ka naꞌnxtok tjaket ju be tuꞌn cyocx xjal tuj Lugar Mas Xjanxix,
porque atx ju tnejel cwart tuj ja xbalun te nabl Dios.
9 Tcyakil jlu nok jun techal tiꞌj ju at tuj tkꞌijlalil jaꞌlo,
in che kꞌonjtz oyaj ex chojbil ic tzaꞌn nacꞌuꞌmaj tiꞌj,
pero mintiꞌ tipumal jlu tuꞌn tkeꞌxix tcꞌuꞌj ju xjal in cꞌulun.
10 Porque aju cꞌulbil lu nok oꞌcx in yolin tiꞌj chibj ex cꞌabj ex junxilchak txꞌajbil;
tcyakil jlu nacꞌuꞌmaj tiꞌj nok oꞌcx tuꞌn tajben te cyximlal,
cyaj kꞌmaꞌn cye tuꞌn cybinchante jlu acutzun nnuꞌl tkꞌijlalil tuꞌn tchꞌexpet tcyakil tuꞌn Dios.
11 Atzun jaꞌlo ma tzul Crist ex ma tzꞌoc te tnejel pal tuꞌn ttzaj tkꞌoꞌn aju mas tbanil ke,
ex atzun in ajben tuj ju ja xbalun mas maꞌ t-xilen ex mas tzꞌaklxix,
ex mya cyuꞌn xjal xbant,
ex myatzun taꞌ twitz txꞌotxꞌ.
12 Ex mya tchcꞌel tman chip ocx tiꞌn Crist,
ex mya tchcꞌel wacẍ,
nok oꞌcx texte tchcꞌel ocx tkꞌoꞌn tuj ju Lugar Mas Xjanxix;
nok junx maj ocx,
cyjaꞌtzun tbincha jun colbil ke te jumajx.
13 Porque ake xjal in che tzꞌilix twitz cyley,
in sakix cyximlal tuꞌnju nnoꞌc chitet tchcꞌel tman wacẍ cyiꞌj,
ex tchcꞌel tman chip,
ex ttzaꞌjil ttxu wacẍ aju in cub patit twi altar.
14 Katzun ka icju,
¿yajtzun tchcꞌel Crist,
myapetzun mas at tipumal?
Porque ma sakix tuj kanmi tuꞌn tiꞌj ju kbinchben mintiꞌ tajben,
tuꞌntzun kajben teju Dios itzꞌ.
Porque nok tuꞌn Xewbaj Xjan,
aju cucx tten te jumajx,
xi tkꞌon tib Crist te Dios,
ex oc te jun chojbil mintiꞌ tpaltil.
15 Cyjaꞌtzun tten,
ate Crist tcub kxol tucꞌil Dios tuꞌn ttzaj tchicꞌbaꞌn aju acꞌaj yol ma cyaj bant tiꞌj tuꞌn Dios kucꞌil;
ex ma cyim Crist tuꞌn cyclet xjal tjakꞌ cyil aju o cybincha tej atxtok ju tnejel yol tzaj tmaꞌn Dios ojtxi,
ex tuꞌn cycꞌmonte jun etzbil te jumajx akeju ma che txconjtz tuꞌn Dios.
16 Porque ic tzaꞌn jun xjal biꞌx in cyaj bant jun uꞌj tuꞌn alcye cyetzbil tcꞌwaꞌl cxel tkꞌoꞌn tuꞌntzun cycꞌmonte cyetzbil oc tcyim xjal;
cyjaꞌtzun,
maxi oc cycꞌmaꞌ cꞌwaꞌlbaj cyetzbil oc tcyim xjal.
17 Porque aju tyol xjal ma cyaj bant tuj uꞌj,
maxi at tipun ocxi tcyim xjal;
mintiꞌ tipun ju yol ka itzꞌx te xjal.
18 Cyjaꞌtzun tten,
tej tbant tiꞌj ju tnejel yol tuꞌn Dios cyucꞌil kxeꞌchel,
el cychcꞌel alumaj tuꞌn tcyaj segurxix ju yol.
19 Porque tbajlenxi tmaꞌn Moisés cycyakil ke mandamyent tzꞌiban tuj ley cye cycyakil xjal,
tzaj tiꞌn Moisés cyak lan ex tucꞌix tkꞌab tzeꞌ hisopo tbi,
cuꞌx tmuꞌn tuj cychcꞌel tor tucꞌix cychcꞌel tman chip tucꞌix aꞌ,
ex oc tchitun tiꞌjx ju libro ax icx cyiꞌj cycyakil xjal.
20 Entons xi tmaꞌn Moisés cye:
Ate chicꞌ lu te cyuwsabl teju yol ma cyaj bant tiꞌj tuꞌn Dios cyucꞌile.
21 Ex mya nok oꞌcx jlu,
ax icx oc tchitun Moisés chicꞌ tiꞌj ju ja xbalun te nabl Dios ex cyiꞌj cycyakil ke macbil in che ajben tuj cꞌulbil te Dios.
22 Jacu bant tuꞌn t-xi kmaꞌn:
Tcyakil in sakix tuꞌn chicꞌ ic tzaꞌn in tmaꞌn ley;
ex ka mintiꞌ ma tzꞌel chitj chicꞌ,
mlay cub najset il.
Cyim Crist tuꞌn tchjet kil tuꞌn
23 Ake jlu atzun cyilbilal keju ateꞌ tuj cyaꞌj,
ilxixtzun tiꞌj tuꞌn cysakix tuꞌn cychcꞌel alumaj;
atzun keju ax ateꞌ tuj cyaꞌj,
il tiꞌj tuꞌn tcub jun chojbil mas baꞌn tuꞌn cysakix.
24 Porque myatzun ocx Crist tuj jun Lugar Xjan binchaꞌn cyuꞌn xjal,
porque aju Lugar Xjan lu nok tilbilal ju axix toc at tuj cyaꞌj;
pero axtzun ocx Crist tuj cyaꞌj tuꞌn tcub ten twitz Dios tuꞌn tcubsan kiꞌj.
25 Ex mya tuꞌn t-xi tkꞌon tib te chojbil nimcu maj,
mya ic tzaꞌn in tbinchaꞌn tnejel pal,
nnoꞌcx tuj Lugar Mas Xjanxix junjun abkꞌi kꞌiꞌn chicꞌ tuꞌn,
mya tex tchcꞌel.
26 Nokwit icx te Cristju,
ilxixwitlo tiꞌj tuꞌn tcyim nimcu maj ttzajlenx atxix tej tbant twitz txꞌotxꞌ;
atzun jaꞌlo tej tjapun baj tkꞌijlalil,
tyecꞌu tib Crist nok junx maj tuꞌn tcub najset ju il,
tuꞌnju xi tkꞌon tib te chojbil.
27 Ex ic tzaꞌn cyajni bant tiꞌj tuꞌn cycyim xjal nok junx maj,
ex cycyimlenxitzun che oquel tuj xjel,
28 ax icx te Crist xi tkꞌon tib nok junx maj tuꞌn tcyim tuꞌn tchjet cyil nimcu xjal;
ex cbel tyecꞌun tib tcabmajiꞌn,
mya chjol il,
nok oꞌcx tuꞌn cyclet keju in che ayon tiꞌj.