10
Porque ate tley Moisés nok t-xlecumal aju tbanil attok tulel,
mya acu te ley kꞌolte tbanil;
cyjaꞌtzun,
akeju in che pon cꞌulul mlay che oc tzꞌaklxix tuꞌnju aylex chojbil cucx in cykꞌoꞌn tcyakil abkꞌi.
2 Porque nokwit at tumel tuꞌn cyoc xjal te tzꞌaklxix tuꞌn ley,
owtlo cyaj cycolin tuꞌn cykꞌonte chojbil;
porque biꞌxwitlo cyaj sakix tuj cyanmi keju in che cꞌulun,
ex miwtlo in tzaj cynaꞌntl ju cyil.
3 Pero tuꞌnju cucx in cykꞌoꞌn chojbil tcyakil abkꞌi,
cyjaꞌtzun,
cucx in tzaj cynaꞌn cyil tcyakil abkꞌi.
4 Porque mlay najset ju il tuꞌn cychcꞌel tor ex cychcꞌel tman chip.
5 Cyjaꞌtzun,
tej tul Crist twitz txꞌotxꞌ xi tmaꞌn te Dios:
Mintiꞌ taja cyiꞌj alumaj in cheꞌx kꞌoꞌn te chojbil,
ex mi cyiꞌj ke oyaj tiꞌj twitz awal,
pero ma tbinchaya jun nximlale.
6 Mintiꞌ tzalaja cyiꞌj ke chojbil in che cub patit ex ke chojbil il.
7 Xitzun nmaꞌne:
Lu kine lu Dios,
ma chin ule binchalte ju tajbila ic tzaꞌn ju yol tzꞌiban wiꞌje tuj Tuꞌjil,
chi Crist.
8 Tnejel in tmaꞌn:
Mintiꞌ taja cyiꞌj ke chojbil ex ke oyaj ex ke chojbil in che cub patit ex ke chojbil il,
ex mintiꞌ tzalaja cyiꞌj.
Ake jlu in che kꞌonjtz ic tzaꞌn in tmaꞌn ley.
9 Ex te tcabin in tmaꞌn:
Lu kine lu,
Dios,
ma chin ule tuꞌn nbinchanteye aju tajbila.
Atzun jlu in tmaꞌn,
ma tzꞌel tiꞌn Dios ju chojbil aju in tmaꞌn ojtxi ley;
ex aju t-xel ma tzꞌoc tkꞌoꞌn,
ax te Crist ma tzꞌoc te chojbil.
10 Ex tuꞌnju tbincha Crist tajbil Dios,
ma ko el tpaꞌn tuꞌn kajben oꞌcx te,
tuꞌnju nok junx maj xi tkꞌon tib Jesucrist tuꞌn tcyim te chojbil il.
11 Ax toc tcyakil kꞌij in che ajben ke pal judiy,
ex cucx in xi cykꞌoꞌn axju chojbil nimcu maj,
pero mlay bant tuꞌn tnajset il cyuꞌn ke chojbil lu.
12 Atzunte Jesucrist nok junx maj xi tkꞌon tib,
oc te jun chojbil tuꞌn tnajset il,
ex cubtzun keꞌ tuj tbankꞌab Dios,
13 ex atzun in ayon tiꞌj jaꞌlo tuꞌn tcub cyiꞌj aj kꞌoj tiꞌj.
14 Porque tuꞌn junx chojbil ma che oc tzꞌaklxix tuꞌn te jumajx akeju ma che el tpaꞌn Dios tuꞌn cyajben oꞌcx te.
15 Ex ax in tchicꞌbaꞌn Xewbaj Xjan ke;
porque nej in tmaꞌn ju yol lu:
16 Atzunju yol lu cyjel bant tiꞌj wuꞌne cyucꞌil tuj tkꞌijlalil tzul,
chi Kman:
Cꞌoquex nkꞌoꞌne nleye tuj cyanmi,
ex cbel ntzꞌibane tuj cynabl.
17 Ax icx in tmaꞌn:
Ex te jumajx mlay tzaj nnaꞌntle cyil tucꞌix ju cybinchben mya baꞌn,
chi Kman.
18 Cyjaꞌtzun,
ka ma cub najset cyil,
ya mya il tiꞌj tuꞌn tchjet juntl maj il.
Baꞌn tuꞌn kpon lakꞌeꞌ ttxlaj Dios
19 Cyjaꞌtzun,
erman,
at koclen tuꞌn kocx tuj ju Lugar Mas Xjanxix nok tuꞌnju tchcꞌel Jesucrist.
20 Atzun ko oquex tuj ju be acꞌaj te chwinklal,
aju o tbincha Crist ke tuꞌn kocx tiꞌjxi ju xbalun te makbil tcub tuj tmij tja Dios;
aju xbalun te makbil atzun in yolin tiꞌj t-ximlal Crist.
21 Ate Jesús jun kpal maꞌ toclen cawil kibaj,
akoꞌ etzan tuꞌn Dios.
22 Cyjaꞌtzun ko lakꞌeꞌx ttxlaj Dios tucꞌil kanmi axix toc,
ex kꞌuklxix kcꞌuꞌj tiꞌj tuꞌn kocslabl,
ex txꞌjoꞌmaj tuj kanmi tuꞌn Crist tuꞌn miꞌn ttzaj knaꞌntl kil,
ex txꞌjoꞌmaj kximlal tuꞌn aꞌ sak.
23 Cucx tkeꞌ kcꞌuꞌj tiꞌj Dios,
ex miꞌn jawjeꞌ kcꞌuꞌj tiꞌj,
porque te Dios in japunxix tyol tuꞌn.
24 Ko ximan tiꞌj tuꞌn kcyuwsante kib kxolx tuꞌn kcꞌujlante kib ex tuꞌn kbinchante baꞌn.
25 Ex miꞌn txi kcolin tuꞌn toc kbuyin kib,
ic tzaꞌn junjun ma che nakꞌet mintiꞌ in nnoꞌc cybuyin cyib;
pero kkꞌom knabl kxolx,
axixpe jlu tuꞌn kbinchante,
porque in lakꞌex ttzaj tkꞌijlalil tuꞌn tul Kajaw.
26 Porque ka tuꞌn kex kgan cucx in ko binchan il ex otok tzꞌel knicꞌ tiꞌj ju yol axix toc,
mintiꞌ juntl chojbil tuꞌn tchjet il.
27 Nok oꞌcx tzul nim xobajil kibaj,
porque tzul jwisi ex ctzajel tkꞌoj Dios cyiꞌj cycyakil keju in che kꞌojin tiꞌj Dios tuꞌn cynaj tuj kꞌakꞌ.
28 Porque ojtxi ka at jun xjal mintiꞌ in xi tniman tley Moisés,
ex ka at cab ox xjal testiw tiꞌj ka ax toc mintiꞌ in xi tniman xjal ley,
biꞌx in cub t-sentens xjal tuꞌn tcyim,
mintiꞌ tumel tuꞌn tcoꞌpj.
29 ¿Yajtzun jaꞌlo,
chi toc cyuꞌne?
¿Myapelo mas cyuw tcastiw xjal tzul,
aju xjal nneꞌl icꞌun Xewbaj Xjan tuꞌn,
aju kꞌol xtalbil,
ex ka in cub yajan Tcꞌwaꞌl Dios tuꞌn,
ex ka nnoꞌc tkꞌoꞌn tchcꞌel Crist te mintiꞌ tajben?
Porque aju tchcꞌel Crist atzunju in cyuwsante ju yol ma cyaj bant tiꞌj tuꞌn Dios cyucꞌil xjal,
ex tuꞌnju tchcꞌel Crist otok cyaj sakix tanmi xjal.
30 Porque baꞌn kuꞌn,
ate Kman o kꞌmante:
Wuꞌne cꞌajel t-xel,
akine chin kꞌolte castiw,
chi Kman.
Ax icx in tmaꞌn tuj Tuꞌjil:
Ke xjal etzan ke tuꞌn Kman cbel cycastiw tuꞌn.
31 Puro xobajilxix ka ma cub tzꞌak jun xjal tjakꞌ tcastiw Dios.
32 Pero cynaꞌntze tcyakilju o baj cyiꞌje cꞌitzketok spicꞌbanjtz tuj cynable tuꞌn tyol Dios;
nim e yajlanjtze cyuꞌn xjal,
pero icꞌx cyuꞌne.
33 At junjun maj e oc yasoꞌne ex e baj yajlaꞌne cywitz cycyakil xjal,
ex at junjun majtl tzajxix cybise cyiꞌj cyucꞌile tej cylonteye in che yajlanjtz.
34 Tzajxix cybise cyiꞌj cyucꞌile e ocx tuj pres;
ex tej ttzaj orden tuꞌn tel cyiꞌn xjal tcyakilju at cyeye,
icꞌx cyuꞌne ex e tzalaje,
porque baꞌn cyuꞌne at jun cyetzbile tuj cyaꞌj mas tbanilxix ex mlay naj.
35 Cyjaꞌtzun,
cucx keꞌc cycꞌuꞌje tiꞌj Dios,
porque ka cucx in keꞌ cycꞌuꞌje tiꞌj Dios,
maꞌxix jun oyaj ctzajel tkꞌoꞌn Dios cyeye.
36 Il tiꞌj tuꞌn tten cypasense,
tuꞌntzun cybinchanteye aju tajbil Dios;
octzun cycꞌmaꞌye aju ma tzaj ttziyan Dios cyeye.
37 Porque in tmaꞌn tuj Tuꞌjil:
Aju xjal at tulel,
chꞌix tul.
Mlay weꞌ,
tzul naj.
38 Pero aju xjal ma tzꞌoc te tzꞌaklxix wuꞌne,
nok tuꞌn tocslabl cankꞌil.
Pero ka ma cyaj tcolin tocslabl,
mlay chin tzalaje tiꞌj,
chi Dios.
39 Atzun keꞌ mya junx atoꞌ cyucꞌil keju in cyaj cycolin cyocslabl ex in che naj.
Atzun atoꞌ cyucꞌil keju junx kocslabl cyucꞌil tuꞌn tclet kanmi.