3 Tuꞌn kocslabl nneꞌl knicꞌ tiꞌj,

tcyakilju at o bant tuꞌn tyol Dios;

cyjaꞌtzun tten,

tcyakilju kꞌanchaꞌl jaꞌlo mintiꞌ ajben jun tiꞌxti kꞌanchaꞌl tuꞌn tbant.

4 Tuꞌn tocslabl Abel xi tkꞌoꞌn jun oyaj te Dios,

mas baꞌn oyaj lu twitzju oyaj xi tkꞌoꞌn Caín;

ex tuꞌn jlu o yolin Dios tiꞌj ka tzꞌaklxix Abel,

ex baꞌn eꞌla tuj twitz Dios aju oyaj xi tkꞌoꞌn;

cyjaꞌtzun,

masque o cyim Abel pero cucx tyolinjtz tiꞌj tuꞌnju at tocslabl.

5 Tuꞌn tocslabl Enoc aj kꞌiꞌn ex mintiꞌ cyim,

ex mintiꞌ cnet porque ax Dios aj kꞌinte;

ex naꞌnxtok taj kꞌiꞌn in tmaꞌn tuj Tuꞌjil ka o tzalaj Dios tiꞌj.

6 Pero ka mintiꞌ kocslabl mlayx tzalaj Dios kiꞌj,

porque ka taj xjal tuꞌn tpon lakꞌeꞌ ttxlaj Dios,

ilxix tiꞌj tuꞌn tocslan ka at Dios,

ex ka a Dios in tzaj kꞌonte jun oyaj cye keju in che jyon tiꞌj.

7 Tuꞌnju at tocslabl Noé tzaj kꞌmaꞌn te tuꞌn Dios tiꞌj ju naꞌnxtok tyecꞌunjtz,

ex tuꞌnju at tchi Dios tuj twitz tbincha Noé jun matij barc jatum tuꞌn cyclet keju ateꞌ tuj tja.

Ex tuꞌn tocslabl Noé cub cysentens cycyakil xjal,

ex oc kꞌoꞌn Noé te tzꞌaklxix tuꞌn Dios nok tuꞌn tocslabl.

8 Tuꞌnju at tocslabl Abraham xi tniman ju txocbil te tuꞌn Dios tuꞌn tetz tuj ttanmi,

tuꞌn tpon tuj jun lugar jatum tuꞌn tcꞌmonte jun tetzbil.

Etztzun mintiꞌ baꞌn tuꞌn jatum tuꞌn tpon.

9 Tuꞌnju at tocslabl Abraham o ten tuj ju txꞌotxꞌ tzaj ttziyan Dios te,

ic tzaꞌn nok te tposad tuj cytxꞌotxꞌ junxitl xjal,

ex o ten tuj jun ja xbalun ja tucꞌix Isaac ex tucꞌix Jacob,

ax icx cye at cyoclen tiꞌj ju txꞌotxꞌ tzaj ttziyan Dios.

10 Porque in ayontok Abraham tiꞌj ju tnam at ke t-simyentil,

ax Dios ximal tiꞌj ex ax binchalte.

11 Ax icx te Sara,

masque otok tijin ex mintiꞌ tal,

pero nok tuꞌnju at tocslabl tcꞌam tipumal tuꞌn toc ten tal,

ex itzꞌj jun tal porque xi tocslaꞌn ka ax toc tuꞌn tjapun tyol Dios tzaj kꞌmaꞌn te.

12 Cyjaꞌtzun tten,

masque otok tijin Abraham wen,

pero nim xjal e jeꞌl pokꞌl tiꞌj ic tzaꞌn cyajlal ke cheꞌw twitz cyaꞌj,

ex ic tzaꞌn ttxa tzꞌaꞌn ttzi mar mlay bant tajlanjtz.

13 Cycyakil ke jlu e cyim tuj cyocslabl,

mintiꞌ cycꞌam aju tzaj ttziyan Dios cye;

nok oꞌcx xi cyqueꞌyin ic tzaꞌn najchak,

xi cyocslaꞌn ex e tzalaj tiꞌj.

Cyjaꞌtzun tzaj cychicꞌbaꞌn ka stranjer xjal ke ex betin xjal ke twitz txꞌotxꞌ.

14 Porque akeju in che yolin icju in cychicꞌbaꞌn ka in che jyon tiꞌj jun cytanmi.

15 Nokwit cucx e ximan tiꞌj ju tnam jatum e jeꞌtz,

owtlo che aj meltzꞌaj juntl maj jatum e jeꞌtz.

16 Pero aju cyajbil tuꞌn cypon tuj jun tman mas baꞌn,

atzun taꞌ tuj cyaꞌj;

tuꞌntzunju mintiꞌ in chiꞌixwi Dios tuꞌn toc te Cydios,

porque ma bant jun tnam te cye tuꞌn.

17 Tej tprobarinjtz Abraham tuꞌn Dios,

xi tkꞌoꞌn Abraham Isaac ic tzaꞌn jun chojbil nok tuꞌnju at tocslabl.

Masque otok tcꞌam Abraham ju yol tzaj ttziyan Dios te,

pero bant tten tuꞌn t-xi tkꞌoꞌn oꞌcxcu jun tcꞌwaꞌl ic tzaꞌn jun chojbil.

18 Ex otok tzaj kꞌmaꞌn te tuꞌn Dios:

Oꞌcx ke tcꞌwaꞌl Isaac che oquel te tiyjila,

chi Dios.

19 Cub t-ximan Abraham ka at tipumal Dios tuꞌn cyjaw ankꞌin xjal tuꞌn cyxol cyimni;

ex o tcꞌam tcꞌwaꞌl juntl maj,

mer ic tzaꞌn otok jaw ankꞌin cyxol cyimni.

20 Tuꞌnju at tocslabl Isaac cub tcyꞌiwlaꞌn Isaac Jacob tucꞌix Esaú tuꞌn cycꞌmonte jun cyꞌiwbil cyjaꞌtok ttzaj.

21 Ax icx te Jacob tej chꞌixtok tcyim,

cub tcyꞌiwlaꞌn cycabil tcꞌwaꞌl José tuꞌnju at tocslabl,

ex o cꞌulun twitz Dios mocꞌl tibaj tcyꞌakoꞌch.

22 Atzunte José,

tej chꞌixtok tcyim o yolin tiꞌj ka attok cyeletz aj Israel tuj txꞌotxꞌ Ejipt,

ex cyaj tmaꞌn cye tuꞌn cyetz kꞌiꞌn ke tbakil.

O yolin tiꞌj jlu tuꞌnju at tocslabl.

23 Tej titzꞌj Moisés xi ewan tuj ox xjaw cyuꞌn ke tman tuꞌnju at cyocslabl,

porque o cyil mejortok queꞌyin ju tal neꞌ Moisés.

Ex mintiꞌ e xob masque otok txi tkꞌoꞌn rey orden tuꞌn cycub byoꞌn ke tal kꞌa.

24 Tej tchꞌiy Moisés mintiꞌtl o tajbe tuꞌn toc tbi tal tmeꞌjel rey tuj Ejipt,

porque at tocslabl Moisés.

25 Mas o tajbexix Moisés tuꞌn tyajlanjtz cyucꞌil ke xjal etzan tuꞌn Dios,

ex mya tuꞌn ttzalaj tiꞌj ju achbil in tkꞌoꞌn il aju nok te cab kꞌij.

26 Cub t-ximan Moisés tuꞌn tyajlanjtz tuꞌn tlaj tbi Crist porque mas kꞌinumablxix jlu twitzju cykꞌinumabl aj Ejipt;

porque atzun toc tcꞌuꞌj tiꞌj ju oyaj ctzajel tkꞌoꞌn Dios te.

27 Tuꞌnju at tocslabl Moisés etz tuj txꞌotxꞌ Ejipt,

mintiꞌ o xob twitz ju tkꞌoj rey,

porque tcyuwsa tib,

mer ic tzaꞌn in queꞌyin tiꞌj ju Dios mintiꞌ kꞌanchaꞌl.

28 Tuꞌnju at tocslabl Moisés cub ticꞌsaꞌn ju Xjan Kꞌij,

ex xi tmaꞌn cye aj Israel tuꞌn toc chitet chicꞌ ttzi cyja,

tuꞌntzun miꞌn cynaj ke nej cꞌwaꞌlbaj tuꞌnju anjel byol xjal.

29 Tuꞌnju at cyocslabl aj Israel,

e icꞌtz tuj Mar Cyak Queꞌyin ic tzaꞌn in che bet twitz txꞌotxꞌ tzkij;

ax icx cye aj Ejipt o cyajbe tuꞌn cyicꞌtz,

pero e baj naj tuj aꞌ.

30 Tuꞌnju at cyocslabl aj Israel,

e cub tzꞌak ke ma tij muro tiꞌj tnam Jericó tbajlenxi cybetin wuk kꞌij tiꞌjele.

31 Ate xuꞌj Rahab,

aju jawni twitz cyucꞌil xinak,

mintiꞌ o naj cyucꞌil ke xjal miban che bin,

tuꞌnju at tocslabl xuꞌj,

porque baꞌn e cꞌmonjtz ke queꞌyil txꞌotxꞌ tuꞌn.

32 ¿Ex alcye mastl cxel nmaꞌntle?

Porque mlaylo canun kꞌij tuꞌn t-xi ntxꞌolbaꞌne tiꞌj Jedeón,

tiꞌj Barac,

tiꞌj Sansón,

tiꞌj Jefté,

tiꞌj David,

tiꞌj Samuel ex cyiꞌj ke t-sanjel Dios.

33 Tuꞌnju at cyocslabl cub cyiꞌj mastl nasyon cyuꞌn,

ex e cawin tuj tumelxix,

ex o cycꞌam aju tzaj ttziyan Dios cye.

O makset cytziꞌ balun cyuꞌn,

34 ex ju kꞌakꞌ in julin wen o yupj cyuꞌn,

ex e colpaj tuꞌn miꞌn cycyim tuꞌn spad.

Masque mintiꞌ cyipun pero o cycꞌam cyipumal,

e oc nim cyipumal tuj kꞌoj,

e jeꞌl ok ke soldad stranjer xjal cyuꞌn.

35 Ke xuꞌj cycꞌam juntl maj cycyimni tej cyjaw ankꞌin.

Atzun ke txkantl xjal e baj cꞌixbisaꞌn tuꞌn cycyim,

mintiꞌ cub tuj cywitz tuꞌn cytzokpet,

tuꞌntzun cycambante jun ankꞌibl mas baꞌnxix.

36 Ex txkantl e oc yasoꞌn ex e baj asyalin,

ax icx e oc cꞌaloꞌn tuꞌn caden ex e ocx kꞌoꞌn tuj pres.

37 At junjun e oc xoꞌn tuꞌn abj,

ex at junjun e cub tuꞌn sier,

ex at junjun e oc tuj joybil cyiꞌj,

ex at junjun e cyim tuꞌn spad;

ex at junjun nok in che betjeꞌ toc cyxbalun ttzꞌumal ẍneꞌl ex ttzꞌumal chip,

meba xjal ke,

e cꞌixbisanjtz ex e yajlanjtz.

38 Baꞌn ke jlu,

pero mintiꞌ tumel tuꞌn cyten cyxol ke mastl xjal mya baꞌn,

cyjaꞌtzun nok in che betjeꞌ cyuj lugar mintiꞌ cynajbil xjal tuj ex cywi witz ex t-xe pic,

ex t-xe jul.

39 Cycyakil ke jlu tma Dios cyiꞌj ka baꞌn ke tuꞌnju at cyocslabl,

pero mintiꞌ o cycꞌam aju tzaj ttziyan Dios cye.

40 Porque at juntl mas baꞌn banin tuꞌn Dios te ke,

tuꞌntzun cyoc tzꞌaklxix junx kucꞌil.