Kkꞌoꞌnc kwitz tiꞌj Jesús
12
Cyjaꞌtzun,
kkꞌoncj tcyakil iktz tucꞌix ju il toc kiꞌjele,
ko kelan tucꞌil kpasens tuj ju ojkelbil tcub kwitz,
porque nim cyajlal testiw ateꞌ kiꞌjele.
2 Kkꞌoꞌnc kwitz tiꞌj Jesús aju nejenel kwitz tuj kocslabl,
ex cyaj tzꞌaket-xix kocslabl tuꞌn,
icꞌx tuꞌn twitz crus tuꞌn tcambante jun tzalajbil otok tzaj yecꞌun te,
mintiꞌ oc tkꞌoꞌn tcwent tiꞌj tchꞌixwi,
ex jaꞌlo ma cub keꞌ ttxlaj tkꞌukbil Dios tuj bankꞌabaj,
jatum in cawin Dios.
3 Che ximane tiꞌj Jesús aju icꞌx cykꞌoj aj il tuꞌn.
Cyjaꞌtzun miꞌn che sicte ex miꞌn baj cycꞌuꞌje.
4 Porque naꞌnx cyweꞌxixe tuꞌn cykꞌojine tucꞌil il ex naꞌnx ticꞌx cyuꞌne ic tzaꞌn te Crist icꞌx tuꞌn ex cyim.
5 Ex aju yol ma tzaj kꞌmaꞌn cyeye tuꞌn toc cynable,
o tzicꞌ tnaꞌl cyuꞌne,
pero tuꞌnju cꞌwaꞌlbaj keye in tzaj kꞌmaꞌn ju yol lu,
in tmaꞌn tuj Tuꞌjil:
Ncꞌwaꞌl,
miꞌn tzꞌel ticꞌuna ka ma cub cawina tuꞌn Kman,
ex miꞌn tzaj baj tcꞌuꞌja ka ma tzꞌoc ilina tuꞌn.
6 Porque te Kman in che cub tcawin keju cꞌujlaꞌn ke tuꞌn,
ex in che baj tasyalin cycyakil keju in che tcꞌmoꞌn tuꞌn cyoc te tcꞌwaꞌl,
chi tuj Tuꞌjil.
7 Tzicꞌxcu cyuꞌne oc cycub cawine tuꞌn Dios,
porque cꞌwaꞌlbaj keye.
Porque ¿atpe jun cꞌwaꞌlbaj mintiꞌ in cub cawin tuꞌn tman?
8 Cycyakil ke cꞌwaꞌlbaj in che cub cawin;
atzun cyeye ka mintiꞌ in che cub cawine tuꞌn Dios,
entons mya tcꞌwaꞌl Dios keye,
sicꞌaj cꞌwaꞌl keye.
9 Ex at juntl tumel,
at ke kman tzalu twitz txꞌotxꞌ,
o ko cub cawin cyuꞌn ex at cychiyilal tuj kwitz.
¿Yajtzunte Kman Dios tuj cyaꞌj myapelo mas tuj tumel tuꞌn t-xi kniman,
tuꞌntzun kankꞌin?
10 Ax toc o ko cawinjtz cyuꞌn kman mya nim kꞌij ic tzaꞌnx ju cyajbil;
atzunte Dios in ko cub tcawin tuꞌn tajben ke,
tuꞌntzun koc xjan ic tzaꞌn te Dios xjan.
11 Ax toc,
aju cawbil ke jaꞌlo mintiꞌ in ko tzalaj tuꞌn,
nok oꞌcx in ko bisun;
pero te tibajxi in ko cyaj ten tuj txubtxaj ex in ko bet tuj tumelxix tuꞌnju cawbil ke.
At xobajil ka ma tzꞌel kicꞌun tyol Dios
12 Cyjaꞌtzun,
cynukpinxe cykꞌabe aju nneꞌl jilj,
ex cycyuwsame cykane mintiꞌ tipun.
13 Che bete tuj jun be jikun tiꞌj tuꞌntzun miꞌn tetz jolpaj cykane cox,
nok oꞌcx tuꞌn tbanix cykane.
14 Tzꞌoc tililx cyuꞌne tuꞌn tten cymojbabl cyibe cyucꞌil cycyakil xjal;
tzꞌoc tililx cyuꞌne tuꞌn tel cypaꞌn cyibe tiꞌj tcyakil mya baꞌn;
porque ka mintiꞌ ma tzꞌel cypaꞌn cyibe tiꞌj,
mlayx cyile twitz Kajaw.
15 Ten cycwente cyiꞌje,
mya yajcu at jun cyxole miꞌn canun tuj t-xtalbil Dios;
ten cycwente cyiꞌje tuꞌn mi jun cyeye tzꞌoc ic tzaꞌn tlocꞌ tzeꞌ puro cꞌa,
mya yajcu tzꞌoc te jun xitbil cye mastl.
16 Ten cycwente cyiꞌje tuꞌn miꞌn toc jun cyeye aj pajil ex tuꞌn miꞌn toc ten tnabl tiꞌj ju te twitz txꞌotxꞌ;
ic tzaꞌn te Esaú,
nok tuꞌn chꞌin twa xi tcꞌaꞌyin toclen,
aju toclen te nej cꞌwaꞌlbaj.
17 Porque baꞌn cyuꞌne,
te tibajxi o tajbetl Esaú tuꞌn tcꞌmonte cyꞌiwbil,
aju cyꞌiwbil in tzaj kꞌoꞌn te nej cꞌwaꞌlbaj,
pero mintiꞌ tzaj kꞌoꞌn te,
ex mintiꞌ tumel tuꞌn tchꞌexpet aju otok bant tuꞌn,
masque o kanin tiꞌj ex jaw okꞌ.
18 Porque myatzun ma che pone t-xe witz Sinaí,
ic tzaꞌn ke aj Israel,
baꞌn tmaconjtz ju witz ex in cꞌant kꞌakꞌ tiꞌj,
ex at tuj klolj ex tzaj nim cykꞌikꞌ,
19 ex o cybi xjal in kꞌajt chun,
ex o cybi xjal in yolin Dios.
Pero tej cybinte xjal in yolin Dios,
e cubsan tuꞌn miꞌn tyolin mastl cye,
20 porque mintiꞌ cyipa tej tyolin Dios cyucꞌil.
Chi Dios tzaj tmaꞌn:
Ka at jun xjal ex ka jun jil ma pon t-xe witz,
il tiꞌj tuꞌn toc xoꞌt tuꞌn abj ex ka tuꞌn toc xayut tuꞌn lans.
21 Ex xobajilxix aju oc cyqueꞌyin;
cyjaꞌtzun tma Moisés:
In chin xobe ex in chin luꞌlune.
22 Atzun cyeye jaꞌlo ma che ule t-xe witz Sión,
ma che ule tuj ju tnam Jerusalén tbi,
at tuj cyaꞌj,
jatum taꞌ aju Dios itzꞌ,
ex ma che ule junx cyucꞌil anjel nim cyajlal in che tzalaj wen,
23 ex ma che ule cyucꞌil ke nej cꞌwaꞌlbaj cychmon cyib,
akeju tzꞌiban cybi tuj cyaꞌj,
ex ma che ule twitz Dios aju in che oc cycyakil xjal tuj xjel tuꞌn,
jatum taꞌ cyanmi ke xjal baꞌn ma che oc kꞌoꞌn te tzꞌaklxix tuꞌn Dios.
24 Ex ma che ule twitz Jesús aju tzaj txꞌolbante ju acꞌaj yol ma cyaj bant tiꞌj tuꞌn Dios cyucꞌile,
ex ma che canune tiꞌj tchcꞌel el chitj,
mas baꞌn twitz ju tchcꞌel alumaj xi tkꞌoꞌn Abel.
25 Ten cycwente cyiꞌje tuꞌn miꞌn tel cyicꞌune Dios aju in yolin kucꞌil.
Porque ka mintiꞌ e clet ke xjal el cyicꞌun tyol Dios tej tyolin cyucꞌil twitz txꞌotxꞌ,
pyor ke mlay ko clet ka ma tzꞌel kicꞌun Dios aju in tzaj yolin ke jaꞌlo max tuj cyaꞌj.
26 Aju tkꞌajkꞌajel twiꞌ Dios o yucch txꞌotxꞌ tuꞌn ojtxi;
atzun jaꞌlo ma tzaj ttziyan juntl yol in tmaꞌn:
C-yucchtel juntl maj txꞌotxꞌ wuꞌne,
ex mya nok oꞌcx txꞌotxꞌ,
ax icx cyaꞌj c-yucchtel,
chi Dios.
27 Aju yol lu:
Juntl maj,
atzun in tmaꞌn tuꞌn tel kꞌiꞌn tcyakilju baꞌn tyucch,
akeju binchaꞌn ke,
tuꞌntzun cycyaj ten keju mintiꞌ in che yucch.
28 Cyjaꞌtzun kkꞌonx chjonte te Dios tuꞌnju ma kcꞌam jun cawbil mlay yucch,
kkꞌonx chjonte ex ko ajben te Dios tuꞌn ttzalaj kiꞌj ex tuꞌn tten tchi tuj kwitz ex tuꞌn kniman te.
29 Porque ate Kdios ic tten ic tzaꞌn jun kꞌakꞌ in baj tzꞌeꞌy tcyakil tuꞌn.