Alcye tuꞌn kbinchante tuꞌn ttzalaj Dios kꞌij
13
Cucx tuꞌn tten cycꞌujlalile cyxolxe porque cyerman cyibe.
2 Miꞌn tzicꞌ tnaꞌl cyuꞌne tuꞌn cykꞌonteye cyposad xjal tucꞌix ju at tajben cye,
porque at junjun cybincha jlu,
xi cykꞌoꞌn cyposad anjel ex mintiꞌ baꞌn cyuꞌn ka anjel ke.
3 Cynaꞌntze keju ateꞌ tuj pres,
ic tzaꞌn ax keye ateꞌye tuj pres junx cyucꞌil;
ex cynaꞌntze keju in che yajlanjtz,
ic tzaꞌn ax keye in che yajlanjtze.
4 Nimanxwit ju mejebleꞌn cyuꞌn cycyakil,
ex tuꞌn miꞌn tcnet jun cyyaẍ,
porque jun tzꞌil jlu;
porque akeju yaẍil ex ke aj pajil cbel cycastiw tuꞌn Dios.
5 Miꞌn pon cycꞌuꞌje tiꞌj pwak;
che tzalaje tiꞌj chꞌin at cyeye jaꞌlo;
porque in tmaꞌn Dios:
Mlay cyaj ncoline,
ex mlay cyaj nkꞌoꞌne.
6 Cyjaꞌtzun in keꞌxix kcꞌuꞌj tuꞌn t-xi kmaꞌn:
Ate Kman onil weye;
mlay chin xobe.
Mintiꞌ jun mya baꞌn jacu cybincha xjal wiꞌje.
7 Cynaꞌntze ke nejenel e ten cyxole,
akeju e kꞌmante tyol Dios cyeye;
che ximane tiꞌj cyakꞌunben ex tzaꞌn tten japun baj cychwinklal,
ex tenx cyocslable ic tzaꞌn cye.
8 Axte Jesucrist ew,
ex jaꞌlo,
ex te jumajx.
9 Miꞌn txi cykꞌon cyibe tuꞌn cyxi kꞌiꞌne tuj junxilchak xnakꞌtzbil mya baꞌn;
porque baꞌn tuꞌn tcyuwset kanmi tuꞌnju t-xtalbil Dios;
mya tuꞌnju ley banin tiꞌj alcyechak chibj baꞌn t-xiꞌ kuꞌn ex alcye mya baꞌn;
porque mintiꞌ jun baꞌn o cycamba keju o keꞌ cycꞌuꞌj tiꞌj ju ley lu.
10 At jun ke kaltar,
aju mintiꞌ cyoclen pal tiꞌj tuꞌn t-xi cychyoꞌn aju chojbil in cub patit tibaj,
akeju pal in che ajben tuj ja xbalun te nabl Dios ojtxi.
11 Porque aju cychcꞌel alumaj nnoꞌcx kꞌoꞌn tuj Lugar Mas Xjanxix tuꞌn tnejel pal te chojbil il,
atzun cyximlal in cub patit tiꞌjxi campament.
12 Cyjaꞌtzun,
ax icx te Jesús cyim tiꞌjxi tnam tuꞌn cyel paꞌn ke xjal tuꞌn tuꞌncu tchcꞌel,
tuꞌn cyajben oꞌcx te Dios.
13 Ko extzun tucꞌil Jesús tiꞌjxi campament,
tzicꞌxcu kuꞌn aju yasbil ke tuꞌn tlaj,
ic tzaꞌn te icꞌx tuꞌn.
14 Porque mintiꞌ jun ktanmi tzalu te jumajx,
nok oꞌcx in ko ayon tiꞌj ju ktanmi ctzajel yecꞌun.
15 Cyjaꞌtzun,
cucx tuꞌn tjaw knimsaꞌn tbi Dios nok tuꞌn Jesucrist,
ic tzaꞌn jun oyaj tuꞌn t-xi kkꞌoꞌn te;
atzunju yol in tmaꞌn ktziꞌ tuꞌnju in jaw knimsaꞌn tbi.
16 Ex miꞌn tzicꞌ tnaꞌl cyuꞌne tuꞌn cybinchanteye aju baꞌn ex tuꞌn cyoninte cyibe cyxolxe;
porque ate jlu jun oyaj in xi cykꞌoꞌne te Dios in tzalaj tiꞌj.
17 Cynimanxe ke nejenel cyeye,
ex cybinxe cycawbil;
porque atzun ke cwentil cyeye tuꞌn miꞌn cyel tzpete,
baꞌn cyuꞌn atzun ke che kꞌol tajlal twitz Dios.
Cynimanxe tuꞌntzun cycwentin tuj tzalajbil ex mya tuꞌn cybisun;
porque ka ma che bisun tuꞌnju mintiꞌ in xi cynimane,
mlay cycambaye chꞌin baꞌn icju.
18 Che naꞌne Dios kiꞌje,
porque kꞌukl kcꞌuꞌje tiꞌj in kbinchaꞌne baꞌn ic tzaꞌnx in tmaꞌn kanmiye,
kajbile tuꞌn kbinchanteye aju baꞌn tuj tcyakil.
19 Pero chin cubsalxixe cywitze tuꞌn cynaꞌne Dios wiꞌje,
tuꞌntzun npon naje juntl maj cyucꞌile.
In kaninjtz t-xtalbil Dios cyibaj ocslal ex in che kꞌolbenjtz
20 Ate Dios kꞌolte kmojbabl kib,
ex tuꞌn Dios jatz ankꞌin Kajaw Jesús cyxol cyimni,
ate Jesús Pastor cyiꞌj ẍneꞌl ex maꞌ toclen,
aju tchcꞌel oc te cyuwsabl teju yol ma cyaj bant tiꞌj tuꞌn Dios te jumajx.
21 Awt Dios kꞌonte cynable tuj tcyakil akꞌuntl baꞌn,
tuꞌntzun cybinchanteye aju tajbil,
ex ax ckꞌolte kipumal tuꞌn kbinchante aju baꞌn tuj twitz,
nok tuꞌn Jesucrist.
Nimanxwit ju tbi tuj tcyakil tabkꞌiyil te jumajx.
Icxwitju.
22 Chin cubsale cywitze erman tuꞌn tten cypasense tuꞌn t-xi cybiꞌne ju yol lu te kꞌobl cynable;
porque mya nim yol ma txi ntzꞌibane cyeye.
23 Baꞌn tuꞌn cybinteye,
ma tzokpet kerman Timotey;
ka ma tzul naj,
junx ko xeꞌle tucꞌil tuꞌn kpone queꞌyil cyeye.
24 Cykꞌonxe jun kꞌolbebl cye cycyakil nejenel ateꞌ cyxole ex cye cycyakil ocslal.
Ke ocslal tuj Italia in cheꞌx kꞌolbeꞌne cyuꞌn.
25 Tenwt t-xtalbil Dios cyucꞌile cycyakile.
Icxwitju.