Miꞌn tzꞌoc ten kwitz tiꞌj cyxilen xjal
2
Akeye wermaniye,
ka ax toc ma txi cyocslaꞌne Kajaw Jesucrist,
aju at nim tajwalil,
miꞌn tzꞌoc ten cywitze tiꞌj cyxilen xjal.
2 Porque ka at jun xjal ma tzꞌocx cyxole tuj cꞌulbil,
toc t-xmulkꞌab kꞌan pwak ex toc t-xbalun in yotzꞌin twitz,
ax icx ka ma tzꞌocx jun xjal tal yaj toc t-xbalun ttxꞌakan,
3 ex ka ma cycꞌame tucꞌil tzalajbil aju toc t-xbalun in yotzꞌin twitz,
ex ka ma txi cymaꞌne te:
Keꞌcuya tzalu tuj jun kꞌukbil tbanilxix;
ex ka ma txi cymaꞌne teju tal meba xjal:
Ax weꞌcuya,
ex ka keꞌcuya twitz txꞌotxꞌ,
ka che chiye,
4 entons mya junx taꞌ cycꞌuꞌje cyiꞌj mastl cyxole,
ex ma tzꞌoc cykꞌon cyibe te jwes tuꞌn cyximbetze mya baꞌn.
5 Erman,
akeye at ncꞌuꞌje cyiꞌje,
cybinxe nyole:
¿Myapetzun tuꞌn Dios ma che jaw scꞌoꞌn ke tal meba xjal twitz txꞌotxꞌ tuꞌn cyoc te kꞌinun tuj cyocslabl ex tuꞌn cycꞌmonte tcawbil Dios ic tzaꞌn jun etzbil,
aju tziyimaj tuꞌn Dios tuꞌn ttzaj tkꞌoꞌn cye keju in che cꞌujlan te?
6 Atzun cyeye ma tzꞌel cyicꞌune aju tal meba xjal ex tuꞌn jlu in tzaj tchꞌixwi.
¿Myapetzun cyuꞌn kꞌinun in che yajlanjtze?
¿Myapetzun ake in cheꞌx jawonte cyeye tuꞌn cypon kꞌiꞌne cywitz jwes?
7 ¿Myapetzun ax ke in che xmayin tiꞌj tbi Crist tbanilxix,
aju ma txi cyocslaꞌne?
8 Ka ax toc ma japun tley ju Krey cyuꞌne ic tzaꞌn in tmaꞌn tuj Tuꞌjil,
baꞌn in cybinchaꞌne.
Porque in tmaꞌn:
Cycꞌujlame ke cyucꞌile ic tzaꞌn cyeye in cycꞌujlan cyibe.
9 Katzun mya junx taꞌ cycꞌuꞌje cyiꞌj xjal,
at cyile ex ma che icꞌe tibaj tley Dios,
ax tley in kꞌmante.
10 Alcye jun xjal ka ma japun tcyakilju ley tuꞌn,
pero ka atx taj jun mandamyent mintiꞌ ma japun tuꞌn,
at til tiꞌj,
mer ic tzaꞌn cycyakil mandamyent mintiꞌ ma japun tuꞌn.
11 Porque ate Dios o kꞌmante:
Miꞌn tbinchaya aj pajil,
ex ax Dios o kꞌmante:
Miꞌn biyuna.
Cyjaꞌtzun,
ka in biyuna,
ma tzicꞌa tibaj ley,
masque mintiꞌ ma tbinchaya aj pajil.
12 Che yoline tuj tumel ex cybinchame baꞌn,
porque oc che oquele tuj xjel tuꞌnju ley at tzokpibl tuꞌn.
13 Porque oc tcub cysentens xjal,
mlay tzaj kꞌakꞌan tcꞌuꞌj Dios tiꞌj jun xjal mintiꞌ in tzaj kꞌakꞌan tcꞌuꞌj tiꞌj tucꞌil,
pero ke xjal in tzaj kꞌakꞌan cycꞌuꞌj cyiꞌj mastl xjal,
tzul kꞌakꞌan tcꞌuꞌj Dios cyiꞌj tuj tkꞌijlalil jwisi.
Aju kocslabl tucꞌix ju kakꞌunben
14 Akeye wermaniye,
¿ti tajben ka at jun xjal in tmaꞌn at tocslabl,
pero ka mintiꞌ jun baꞌn in tbinchaꞌn?
¿Jacupe clet tuꞌn tocslabl?
15 Ka at jun erman xinak ex ka jun erman xuꞌj ma tzul,
mintiꞌ t-xbalun ex mintiꞌ twa te junjun kꞌij,
16 ex ka at jun cyxole ma txi tmaꞌn te:
Txiꞌya,
miꞌn bisuna;
txaꞌyinc tiꞌja ex waꞌna,
ka chi,
pero ka mintiꞌ ma txi tkꞌoꞌn aju in ajben te t-ximlal;
¿ti tajben jlu?
17 Icxtzun tten kocslablju;
ka mintiꞌ ma txi kyecꞌun ka at kocslabl tuꞌnju baꞌn in kbinchaꞌn,
entons mintiꞌ tajben kocslabl.
18 Pero jacu tma jun xjal te juntl:
In tmaꞌna ka at tocslabla,
pero mintiꞌ takꞌunbena;
atzun weye at wakꞌunbene ex at wocslable.
Teya,
ka mintiꞌ takꞌunbena,
¿tzaꞌntzun tten tuꞌn tel nnicꞌe tiꞌj ka ax toc at tocslabla?
Atzun weye jacu tzꞌel tnicꞌa tiꞌj ka ax toc at wocslable,
tuꞌn wakꞌunbene,
chilo xjal te juntl.
19 Ocslaꞌn tuꞌna ka oꞌcx jun Dios at;
baꞌn in tbinchaꞌna.
Pero icx ke juꞌẍ ocslaꞌn cyuꞌn ka oꞌcx jun Dios at,
ex in che jaw luꞌlun tuꞌn cyxobil.
20 Aya xjal mintiꞌ tnabla,
¿jtoj baꞌn tel tnicꞌa tiꞌj jlu?
Ka mintiꞌ in tyecꞌuna ka at tocslabla tuꞌnju baꞌn in tbinchaꞌna,
tuꞌn jlu mintiꞌ tajben tocslabla.
21 Ic tzaꞌn te kxeꞌchel Abraham,
¿Myapetzun tuꞌn takꞌunben oc kꞌoꞌn te tzꞌaklxix tuꞌn Dios tej tcub tkꞌoꞌn tcꞌwaꞌl aju Isaac tbi tibaj altar te jun chojbil te Dios?
22 ¿Mintiꞌpe nneꞌl tnicꞌa tiꞌj jlu,
at tocslabl Abraham ex at takꞌunben,
ex tuꞌnju takꞌunben o tzꞌaket-xix ju tocslabl?
23 Japuntzun ju yol in tmaꞌn tuj Tuꞌjil:
Xi tocslaꞌn Abraham tyol Dios,
cyjaꞌtzun oc kꞌoꞌn te tzꞌaklxix tuꞌn Dios,
chi tuj Tuꞌjil.
Ex oc kꞌoꞌn tbi tamiw Dios.
24 Tzꞌelxtzun cynicꞌe tiꞌj,
aju xjal nnoꞌc kꞌoꞌn te tzꞌaklxix tuꞌn Dios tuꞌn takꞌunben,
ex mya nok oꞌcx tuꞌn tocslabl.
25 Ax icx teju xuꞌj jawni twitz cyucꞌil xinak,
Rahab tbi,
¿myapetzun tuꞌn takꞌunben oc kꞌoꞌn te tzꞌaklxix tuꞌn Dios tej t-xi tkꞌoꞌn cyposad ke xjal sanjel,
ex e jeꞌx t-samaꞌn tuj juntl be?
26 Porque ic tzaꞌn tten kximlal,
ka mintiꞌ kanmi,
cyimni ju kximlal;
icxtzun tten kocslablju;
ka mintiꞌ ma txi kyecꞌun ka at kocslabl tuꞌnju baꞌn in kbinchaꞌn,
entons mintiꞌ tajben kocslabl.