Aju ktziꞌ
3
Erman,
miꞌn tzꞌoc cykꞌoꞌne nimcu xnakꞌtzal cyxole,
porque baꞌn kuꞌn,
ka xnakꞌtzal koꞌ,
mas ko oquel tuj xjel cywitz mastl.
2 Porque kcyakil nimcu maj in ko tzpet tiꞌj;
katzun at jun mintiꞌ in tzpet tiꞌj tyol,
atzun xjalju tzꞌaklxix ex in bant tjacꞌunte tcyakil t-ximlal.
3 Nnoꞌcx kkꞌoꞌn pren tuj cytziꞌ chej tuꞌn knimanjtz cyuꞌn,
cyjaꞌtzun tten in ajtz kxkutzꞌin tcyakil cyximlal.
4 Ax icx che ximane cyiꞌj ke barc;
masque nimak ke ex in che bet tuꞌn cykꞌikꞌ cyuwxix,
pero in che ajtz xkutzꞌin tuꞌn jun xkutzꞌbil tal chꞌin nok jaꞌx jatum tajbil ju yucul te barc tuꞌn t-xiꞌ.
5 Icxtzun tten ktziꞌ;
masque tal chꞌin,
pero puro jawni ex in jaw tniman tib.
Chꞌin kꞌakꞌ in baj tzꞌeꞌy tiꞌj jun witz tuꞌn.
6 Icxtzun tten ktziꞌ ic tzaꞌn kꞌakꞌ,
ex nojni tuꞌn tcyakil mya baꞌn;
tuꞌn ktziꞌ in naj tcyakil kximlal,
ex tuꞌn ktziꞌ mas in jaw cꞌant ju mya baꞌn tuj kchwinklal,
ex atzun in tzaj tkꞌakꞌal ktziꞌ tuj infierni.
7 Porque cycyakil txcaj jil ex ke chyuꞌj ex ke lobaj ex ke jil tuj mar in cub cyiꞌj ex in che oc mans cyuꞌn xjal;
8 atzunju ktziꞌ mlayx tzꞌoc mans tuꞌn jun xjal,
porque mya baꞌn ex mlay bant tuꞌn tmaket ttzi xjal,
ex at tbiybil.
9 Tuꞌn ktziꞌ in xi kkꞌoꞌn chjonte te Kman Dios,
ex tuꞌn ktziꞌ in xi kkanin mya baꞌn cyibaj xjal o che binchanjtz ic tzaꞌn tilbilal Dios.
10 Tujx ktziꞌ nneꞌtz ju yol te akꞌbil chjonte te Dios ex tuꞌnx ktziꞌ in tzaj kkanin mya baꞌn tibaj jun xjal.
Erman,
mya tuj tumel jlu.
11 Baka at jun twi aꞌ junx in jatz aꞌ baꞌn tcꞌanjtz tuj ex ju aꞌ cꞌa.
12 Akeye wermaniye,
¿jacupe bant tuꞌn tel twitz olivo tiꞌj jun tzeꞌ higo,
ex jacupe tzꞌel twitz higo tiꞌj jun wiꞌ uva?
Cyjaꞌtzun tten,
mlay jatz ju aꞌ baꞌn tcꞌanjtz ex ju aꞌ cꞌa tuj junx twi aꞌ.
Aju nabl axix toc
13 Ka at jun cyxole at tnabl ex nneꞌl tnicꞌ tiꞌj,
bet-x tuj tumel tuꞌn tyecꞌunte takꞌunben baꞌn,
tuꞌn tten mans ex at tnabl.
14 Pero ka at tloꞌch cycꞌuꞌje tiꞌj juntl ex ka in baj cyicꞌlen cyibe,
miꞌn jaw cyniman cyibe,
ex miꞌn che nicꞌane yol ex miꞌn cub cyewane ju yol ax toc.
15 Aju nabl lu myatzun in tzaj tucꞌil Dios,
atzun in tzaj cyucꞌil xjal ex tucꞌil tajaw il;
aju nabl lu te twitz txꞌotxꞌ te.
16 Porque ka ma tzaj tloꞌch cycꞌuꞌje tiꞌj juntl ex ka in baj cyicꞌlen cyibe,
tuꞌntzunju mya tuj tumel ateꞌye,
ex in cybinchaꞌne tcyakil mya baꞌn.
17 Katzun a tnabl xjal at aju in tzaj tkꞌoꞌn Dios,
tnejelxix sak taꞌ tanmi xjal,
ex mintiꞌ in kꞌojin,
ex mejor tmod,
ex cuyin tuꞌn tuꞌn t-xi tbiꞌn;
at tkꞌakꞌbil tcꞌuꞌj ex baꞌn tbinchben,
mintiꞌ in jawjeꞌ tcꞌuꞌj,
ex mya xmletzꞌ.
18 Aju xjal nnoꞌc tilil tuꞌn tuꞌn tbant cyten xjal cyxolx ex tuꞌn cytzalaj cyxolx,
in tkꞌoꞌn ambil tuꞌn cyankꞌin xjal tuj tumelxix.