Mya baꞌn tuꞌn kcꞌujlante aju achbil te twitz txꞌotxꞌ
4
¿Tikuꞌn at kꞌoj cyxole ex in che kꞌojle?
¿Myapetzun tuꞌn tlaj ju cyachbile?
Axju cyachbile in kꞌojin cyiꞌje.
2 In pon cycꞌuꞌje tiꞌj nimcu ex mintiꞌ in cnet cyuꞌne;
cyjaꞌtzun in cub cybyoꞌne jun xjal.
Nim in pon cycꞌuꞌje tiꞌj te juntl,
ex mintiꞌ in cnet cyuꞌne;
cyjaꞌtzun nnoꞌc tilil cyuꞌne tuꞌn tcub tiꞌj juntl ex in che kꞌojine tiꞌj.
Mintiꞌ in cnet cyuꞌne aju cyajbile,
porque mintiꞌ in xi cykanine te Dios.
3 Ex ka ma txi cykanine,
mlay tzaj kꞌoꞌn cyeye,
porque mya tuj tumel in xi cykanine;
porque atzun cyajbile tuꞌn tbaj cynajsaꞌne tiꞌj cyachbile.
4 Akeye ic cytene ic tzaꞌn jun xuꞌj at tchmil pero mas at tgan tiꞌj juntl.
¿Mintiꞌpe baꞌn cyuꞌne,
ka ma cycꞌujlaye aju achbil twitz txꞌotxꞌ che oquele aj kꞌoj tiꞌj Dios?
Cyjaꞌtzun,
alcye jun xjal taj tuꞌn tcꞌujlante ju achbil twitz txꞌotxꞌ,
nnoꞌc tkꞌon tib aj kꞌoj tiꞌj Dios.
5 Aju in tmaꞌn tuj Tuꞌjil,
¿nokx ganpe tuj cynable?
Aju Xewbaj Xjan ma tzaj tkꞌoꞌn Dios tuꞌn tnajan tuj kanmi at-xix tcꞌuꞌj kiꞌj ex in bisun kiꞌj,
chi Dios tuj Tuꞌjil.
6 Pero mas nim t-xtalbil Dios in tzaj tkꞌoꞌn ke.
Cyjaꞌtzun in tmaꞌn tuj Tuꞌjil:
At tkꞌoj Dios cyiꞌj ke xjal jawni cywitz,
atzun keju mans ke,
in tzaj tkꞌoꞌn Dios t-xtalbil cye.
7 Cykꞌoꞌnxtzun cyibe tjakꞌ tcawbil Dios.
Che weꞌxixe twitz tajaw il,
ex cꞌeleltzun ok cywitze.
8 Che lakꞌexe ttxlaj Dios,
ax icx te ctzajel lakꞌeꞌ cyucꞌile.
Akeye aj il,
cytxꞌjom cykꞌabe;
ex akeye cabe cycꞌuꞌj,
cytxꞌjome tuj cyanmiye.
9 Che bisune,
ex che wuꞌyine,
ex che okꞌe.
Aju cytzeble tzꞌocwit te okꞌel,
ex aju cytzalajbile tzꞌocwit te bis.
10 Cymansincu cyibe twitz Kajaw,
octzun che jawil nimsaꞌne tuꞌn.
Mya baꞌn tuꞌn kyolin cyiꞌj kerman
11 Erman,
miꞌn che yoline mya baꞌn tiꞌj juntl cyxole.
Ka at jun in yolin mya baꞌn tiꞌj jun erman,
ex ka nnoꞌc terman tuꞌn tuj malbil,
tiꞌj ley in yolin mya baꞌn ex nnoꞌc ju ley tuj malbil tuꞌn.
Katzun ma tzꞌoc ley tuj malbil tuꞌna,
mintiꞌ in japun ley tuꞌna icju,
nok oꞌcx nnoꞌc tkꞌon tiba te jwes.
12 Nok oꞌcx junx kꞌolte ley ex Jwes,
ate Dios,
aju at tipumal tuꞌn cyclet xjal tuꞌn ex at tipumal tuꞌn cynaj xjal tuꞌn.
Atzun teya,
¿alcyetzuna tuꞌn toc juntl tuj malbil tuꞌna?
Miꞌn keꞌ kcꞌuꞌj tiꞌj ju kꞌij te nchiꞌj
13 Jaꞌlotzun,
cybintze akeye in che kꞌmante:
Jaꞌlo ex ka nchiꞌj ko xeꞌl tuj tnam lu,
ex atzun ko tel jun abkꞌi,
ex cbel kkꞌoꞌn kcꞌaꞌẍ tuꞌn tchmet kpwak,
che chiye.
14 Pero mintiꞌ baꞌn cyuꞌne aju tzul te nchiꞌj.
Porque ¿tzaꞌn tten cychwinklale?
Ic tten cychwinklale ic tzaꞌn chꞌin muj nok chꞌin in ten,
ex jurat in cub naj.
15 Mas baꞌn tuꞌn cymanteye cyjaꞌ:
Ka tajbil Kajaw,
oc ko ankꞌil ex oc kbinchaꞌ jlu ex ka juntl.
16 Atzun cyeye in jaw cyniman cyibe.
Pero mya baꞌn in cybinchaꞌne tuꞌnju in jaw cyniman cyibe.
17 Alcye jun xjal baꞌn tuꞌn alcye ju baꞌn ex mintiꞌ in tbinchaꞌn,
at til.