Aju bis ctzajel cyiꞌj kꞌinun
5
Cybintze jlu akeye kꞌinun.
Che okꞌe ex che wuꞌyine tuꞌn tlaj ju cybise tzul.
2 Aju cykꞌinumable ma kꞌay,
ex aju cyxbalune tbanilxix ma baj twaꞌn pocꞌ.
3 Aju kꞌan pwak tucꞌix sak pwak at cyucꞌile ma acomix tiꞌj,
ex aju acom cꞌoquel te testiw cyiꞌje ka mya baꞌn keye,
ex cbajel twaꞌn acom cychibjale ic tzaꞌn tuꞌn kꞌakꞌ.
Ma baj cychmoꞌne cykꞌinumable tuj mancbil kꞌij,
ex atzun mancbil tkꞌijlalil jaꞌlo.
4 Akeju majen jaw chmonte twitz cyawale in che schꞌin tuꞌn tlaj e cub cysbuꞌne,
mintiꞌ chjet twi cycꞌuꞌj cyuꞌne;
ex ju tkꞌajkꞌajel cywiꞌ keju jaw chmonte twitz cyawale ma canun tuj t-ẍcyin Kajaw,
aju Tajaw tcyakil.
5 Ma che ankꞌine tuj achbil twitz txꞌotxꞌ ex ma che achine;
ma cycꞌaꞌcha cycꞌuꞌje ic tzaꞌn ke alumaj in che cꞌaꞌchanjtz tuꞌn cycub byoꞌn,
icx cyeye chꞌix tul canun kꞌij tuꞌn cycub byone.
6 Ke xjal mintiꞌ cypaltil,
cub cykꞌoꞌne cysentens ex cub cybyoꞌne,
ex mintiꞌ e kꞌajt cywitze.
Tuꞌn tten kpasens ex tuꞌn knaꞌn Dios
7 Cyjaꞌtzun erman ten cypasense,
che ayone ocxi tul Kajaw.
Cyximancuye tiꞌj ju akꞌnal in ayon tiꞌj ju twitz awal tbanilxix,
at pasens tuꞌn tayon alcye kꞌij tuꞌn tul canun ttzi jbalil ax icx alcye kꞌij tuꞌn tjaw jbal.
8 Ax icx cyeye ten cypasense ex cycyuwsam cyanmiye,
porque in lakꞌex ttzaj tkꞌijlalil tuꞌn tul Kajaw.
9 Erman,
miꞌn che yoline mya baꞌn tiꞌj juntl cyxolxe,
tuꞌn miꞌn cyoque tuj xjel;
porque lu at Dios ttzi pwert,
aju Jwes.
10 Akeye wermaniye,
cynaꞌntze cyiꞌj ke t-sanjel Dios e yolin ojtxi,
porque samaꞌn ke tuꞌn Kman;
cynaꞌntze nicꞌpun icꞌx cyuꞌn,
ex o ten cypasens.
11 In kmaꞌn,
at tzalajbil cye keju nnicꞌx cyuꞌn.
O cybiye tiꞌj Job,
o ten nim tpasens,
ex o cybiye aju tbincha Kman te te mancbilxi;
porque ate Kman nim in kꞌakꞌan tcꞌuꞌj ex in tzꞌeꞌy tcꞌuꞌj kiꞌj.
12 Pero aju mas ilxix tiꞌj erman,
miꞌn tzaj cynaꞌne tbi Dios tiꞌj jun cyyole,
miꞌn tzaj cynaꞌne cyaꞌj,
ex miꞌn tzaj cynaꞌne txꞌotxꞌ,
ex miꞌn tzaj cynaꞌne juntl;
nok oꞌcx tuꞌn cymanteye oc,
pero ax toc oc;
ex ka tuꞌn cymanteye miꞌn,
pero ax toc miꞌn,
tuꞌntzun miꞌn cycyaje tjakꞌ sentens tuꞌn Dios.
13 Ka at jun in bisun cyxole,
baꞌn tuꞌn tnaꞌn Dios.
Ex ka at jun in tzalaj,
baꞌn tuꞌn tbitzan.
14 Ka at jun yab cyxole,
baꞌn tuꞌn cytzaj txquet ke ansyan cyxol ocslal,
ex tuꞌn cynaꞌn Dios tiꞌj yab ex tuꞌn toc cykꞌoꞌn aseyt tiꞌj,
tuꞌnju at cyoclen tuꞌn Kajaw.
15 Ka kꞌuklxix cycꞌuꞌje tiꞌj Dios oc cynaꞌne Dios,
cbanixel ju yab ex cjawil waban tuꞌn Kajaw;
ex ka at il otok tbincha,
cnajsetel til.
16 Cyjaꞌtzun,
cypaꞌn jatz cyile cyxolxe,
ex che naꞌne Dios cyiꞌje cyxolxe tuꞌntzun cybanixe.
Aju tnaꞌj Dios ju xjal tzꞌaklxix at nim tipumal ex nim in tbinchaꞌn.
17 Ate Elías t-sanjel Dios,
ic ttzajlen ic tzaꞌn ke;
ex o naꞌn Dios cyuwxix tuꞌn miꞌn ttzaj jbal,
ex mintiꞌ tzaj jbal twitz txꞌotxꞌ tuj ox abkꞌi tucꞌil kak xjaw.
18 Ex juntl maj o naꞌn Dios,
ex tzajtzun jbal twitz cyaꞌj,
ex tzajtzun twitz tawal txꞌotxꞌ.