In tkꞌoꞌn Pedro cynabl ocslal
5
Chin cubsale cywitz ke ansyan ateꞌ cyxole,
ax icx weye ansyan kine cyucꞌil ex testiw kine tiꞌj tcyakilju icꞌx tuꞌn Crist,
ax icx at woclene tuꞌn njaw nimsaꞌne junx tucꞌil Crist oc tul tuj tajwalil.
2 Akeye ansyan,
cypastorin oque ke t-ẍneꞌl Dios o che cyaj kꞌoꞌn tuj cycwente,
ex cycwentin oque ke;
pero mya lajwers tuꞌn cyxiꞌye,
cyuꞌnx cyibe tuꞌn cyxiꞌye ic tzaꞌn tajbil Dios,
ex mya tuꞌn cycꞌmonteye jun cambabl mya tuj tumel,
nok oꞌcx tuꞌn cyajbene tuꞌn tcyakil cycꞌuꞌje.
3 Ex miꞌn cub cyximane tuꞌn cyoque te cyajaw keju ateꞌ tuj cycwente,
nok oꞌcx tuꞌn cyoque te jun yecꞌbil tuꞌn cyoc lpeꞌ ẍneꞌl cyiꞌje.
4 Octzun tul ju Nejenel cye pastor,
oc cycꞌmaꞌye jun oyaj mlay naj ex tbanilxix.
5 Ax icx cyeye,
akeye cuꞌxun,
che tene tjakꞌ cycawbil ansyan;
ex cycyakile che oque mans tuꞌn cyajbene cyxolxe,
porque in tmaꞌn tuj Tuꞌjil:
At tkꞌoj Dios cyiꞌj keju in jaw cyniman cyib,
atzun keju mans in tzaj tkꞌoꞌn t-xtalbil cye,
chi tuj Tuꞌjil.
6 Cyjaꞌtzun,
cymansin cub cyibe tjakꞌ tipumal tkꞌab Dios,
tuꞌntzun cyjaw nimsaꞌne tuꞌn oc tpon tkꞌijlalil.
7 Tcyakilju in baj cycꞌuꞌje tiꞌj,
cykꞌonxe tuj tcwent Dios,
porque ate Dios cwentil cyeye.
8 Tenx cynable ex che xkꞌukine porque ate tajaw il aj kꞌoj cyiꞌje,
ex in bet cyiꞌjele,
in tzanun ic tzaꞌn jun balun,
in jyon tiꞌj alcye jun tuꞌn t-xi tchyoꞌn.
9 Che weꞌxixe twitz,
cyuw cytene tuj cyocslable,
porque baꞌn cyuꞌne,
tuj tcyakil twitz txꞌotxꞌ nnicꞌx cyuꞌn cyermaniye ic tzaꞌn cyeye nnicꞌx cyuꞌne.
10 Cybajlenxitzun yajlaꞌne cab kꞌij,
axte Dios ctzꞌaksalte cynable,
ex tuꞌn cyweꞌxixe tuj cyocslable,
ex ckꞌolte cyipumale,
ex ccyuwsal cyeye.
Axte Dios in tzaj kꞌonte nim t-xtalbil ke,
ex ma ko txconjtz tuꞌn,
tuꞌn kten tuj t-spicꞌumal te jumajx nok tuꞌn Jesucrist.
11 Nimanxwit ju tbi,
ex tuꞌn tcawin tuj tcyakil tabkꞌiyil te jumajx.
Icxwitju.
Jun kꞌolbebl tuꞌn apostl Pedro te bajsbil yol
12 Ma txi ntzꞌibane cab ox yol cyeye;
ate Silvano cxel kꞌinte uꞌj,
porque aju erman lu tuj nnable in japunxix tuꞌn tuj takꞌun Dios.
Ma txi ntzꞌibane tuꞌn t-xi nkꞌoꞌne cynable ex tuꞌn t-xi nchicꞌbane cyeye ka atzun t-xtalbil Dios jlu axix toc.
Ax che tencje tuj t-xtalbil.
13 In cheꞌx kꞌolbeꞌne cyuꞌn ocslal ateꞌ tuj Babilonia,
akeju ma che jaw scꞌoꞌn junx cyucꞌile,
ex in cheꞌx kꞌolbeꞌne tuꞌn Marcos aju ic tten ic tzaꞌn jun ncꞌwaꞌle.
14 Cykꞌolbem cyibe cyxolxe,
ex cytzꞌuban el cywitze tuꞌn tcyakil cycꞌujlalile.
Awt Dios kꞌukbante cycꞌuꞌje cycyakile akeye ocslal tiꞌj Jesucrist.
Icxwitju.