5 Aju xjal tzꞌaklxix in tbinchaꞌn aju tzꞌaklxix ex tuj tumel in bet: 6 Mintiꞌ in waꞌn tiꞌj ju nintz waꞌn in cub icꞌsaꞌn cywiꞌ ke tal witz tuꞌn cycꞌulun cywitz ke tilbilal; mintiꞌ nnoꞌc keꞌ tcꞌuꞌj cyiꞌj ke tilbilal cydios aj Israel; mintiꞌ nneꞌl t-xcꞌayin t-xuꞌjil tucꞌil, ex mintiꞌ nnoꞌc tmojban tib tucꞌil t-xuꞌjil oc tul ẍwoꞌj tiꞌj; 7 mintiꞌ in yajlan cyiꞌj xjal ex in aj tkꞌoꞌn aju prent otok tcꞌam te jun tucꞌil; mintiꞌ in elkꞌan tiꞌj tucꞌil, in xi tkꞌoꞌn twa ju xjal at weꞌyaj tiꞌj, ex in xi tkꞌoꞌn t-xbalun xjal mintiꞌ t-xbalun; 8 mintiꞌ in xi tkꞌoꞌn tpwak te chꞌex nok tuꞌn tcamban mastl, ex mintiꞌ nneꞌl tkanin taꞌl tpwak, mintiꞌ jun mya baꞌn in tbinchaꞌn tiꞌj tucꞌil, ex tuj tumel in xi tbinchaꞌn cyiꞌj cabe at kꞌoj cyxol; 9 in tbinchaꞌn ic tzaꞌnx in tmaꞌn nleye ex in che japun ke nmandamyente tuꞌn. Aju xjal lu, axix toc tzꞌaklxixte, cyjaꞌtzun cꞌankꞌil. Akine Dios in chin kꞌmante jlu.

10 Aju xjal lu, katzun at jun tcyꞌajal txꞌuꞌj twiꞌ ex byol xjal, ex ka in tbinchaꞌn ke mya baꞌn lu, 11 aju mintiꞌ o tbincha tman: Ka in waꞌn tiꞌj nintz waꞌn, in cub icꞌsaꞌn cywiꞌ ke tal witz tuꞌn cycꞌulun cywitz ke tilbilal, ka nneꞌl t-xcꞌayin t-xuꞌjil tucꞌil, 12 ka nnoꞌc ten yajlal cyiꞌj ke meba xjal ex cyiꞌj ke xjal yaj, ka in elkꞌan cyiꞌj mastl xjal, ka mintiꞌ in aj tkꞌoꞌn aju prent otok tcꞌam te jun tucꞌil, ka nnoꞌc keꞌ tcꞌuꞌj cyiꞌj ke tilbilal mya dios, ka in tbinchaꞌn aju mya baꞌn icꞌun wuꞌne, 13 ka in xi tkꞌoꞌn tpwak te chꞌex nok tuꞌn tcamban mastl ex ka nneꞌl tkanin taꞌl tpwak, aju xjal lu mlay tzꞌankꞌin. Tbajlenxi tbinchaꞌn ju mya baꞌn lu aju icꞌun wuꞌne, il tiꞌj tuꞌn tcyim porque tuꞌnx til cymel.

14 Katzun at jun tcyꞌajal xjal lu in til tcyakilju mya baꞌn in tbinchaꞌn tman, pero mintiꞌ nnoꞌc lpeꞌ tiꞌj tbinchben tman; 15 mintiꞌ in waꞌn tiꞌj nintz waꞌn in cub icꞌsaꞌn cywiꞌ ke tal witz tuꞌn cycꞌulun cywitz ke tilbilal, mintiꞌ nnoꞌc keꞌ tcꞌuꞌj cyiꞌj ke tilbilal aju cydios aj Israel, mintiꞌ nneꞌl t-xcꞌayin t-xuꞌjil tucꞌil, 16 mintiꞌ in yajlan cyiꞌj xjal; mintiꞌ nneꞌl tkanin prent teju in kanin tchꞌex te; mintiꞌ in elkꞌan cyiꞌj xjal, nok oꞌcx in xi tkꞌoꞌn twa ju xjal at weꞌyaj tiꞌj, ex in xi tkꞌoꞌn t-xbalun xjal mintiꞌ t-xbalun; 17 mintiꞌ in tbinchaꞌn mya baꞌn cyiꞌj xjal, mintiꞌ nneꞌl tkanin nim taꞌl tpwak, ex in che japun ke nleye ex nmandamyente tuꞌn: aju xjal lu mlay cyim tuꞌn tlaj til tman. Ax toc cꞌankꞌil.

18 Atzunju tman otok yajlan cyiꞌj xjal, otok tzꞌelkꞌan cyiꞌj xjal, ex otok tbincha mya baꞌn cyxol t-xjalil, cymel tuꞌn tlaj tex til. 19 Atzun cyeye oc cymaꞌye: ¿Tikuꞌn mintiꞌ in cyim cꞌwaꞌlbaj tuꞌn tlaj til tman? Che chiloye. Mlay cyim porque o bet te cꞌwaꞌl tuj tumel, o tbincha ju tzꞌaklxix ex o che japun ke nleye tuꞌn; tuꞌntzun jlu, axix toc cꞌankꞌil. 20 Oꞌcx ju xjal in binchan il cymel, mlay txi tchjoꞌn cꞌwaꞌlbaj aju til tman, ex mi ju mambaj mlay txi tchjoꞌn til tcꞌwaꞌl. Aju xjal in binchan ju tzꞌaklxix oc tcꞌmaꞌ oyaj tuj tumelxix te t-xel ju baꞌn otok tbincha, atzunju xjal binchal mya baꞌn oc tcꞌmaꞌ jun castiw te t-xel mya baꞌn otok tbincha.

21 Katzun ma tzꞌel tpaꞌn tib xjal binchal mya baꞌn tiꞌj tcyakil il otok tbincha, ka ma che japun ke nleye tuꞌn, ka ma bet tuj tumelxix ex ka ma tbincha ju tzꞌaklxix, axix toc cꞌankꞌil ex mlay cyim. 22 Mlay tzaj nnaꞌntle tcyakil ju mya baꞌn otok tbincha, ex cꞌankꞌil tuꞌnju in bet tuj tumel. 23 Miꞌn waje tuꞌn tcyim xjal binchal mya baꞌn, nok oꞌcx waje tuꞌn tbaj tchꞌexpuꞌn tnabl tuꞌntzun tankꞌin. Akine Dios in chin kꞌmante jlu.

24 Katzun ma cyaj tcolin xjal tuꞌn tbinchante ju tzꞌaklxix, ex ka ma tbincha juntl maj tcyakilju mya baꞌn ex icꞌbil in tbinchaꞌn jun xjal binchal mya baꞌn, ¿che chipetzune ka cucx cꞌankꞌil ju xjal lu? Mlay tzaj nnaꞌne tcyakilju baꞌn otok tbincha: Cymel tuꞌn tlaj otok tzꞌel tpaꞌn tib tiꞌj nleye ex tuꞌn tlaj til.

25 Oclo cymaye ka mya tuj tumel in bant wuꞌne, pero cybintze akeye aj Israel: ¿Che chipetzune ka mya tuj tumel in bant wuꞌne? Tcyakil in bant tuj tumel wuꞌne. ¿Myapelo akeye in che binchan mya baꞌn? 26 Ka ma cyaj tcolin ju xjal tzꞌaklxix tuꞌn tbinchante baꞌn ex ka ma tbincha mya baꞌn, cymel tuꞌn tlaj tbinchben mya baꞌn. 27 Katzun ma tzꞌel tpaꞌn tib xjal tiꞌj tbinchben mya baꞌn, ex ka ma bet tuj tumelxix ex ka ma tbincha ju tzꞌaklxix, octzun cletel. 28 Ka ma tzꞌel tnicꞌ tiꞌj ex ka ma tzꞌel tpaꞌn tib tiꞌj tcyakilju mya baꞌn otok tbincha, ax toc cꞌankꞌil ex mlay cyim.

29 Atzun cye aj Israel oc cymaꞌ ka mya tuj tumel in bant wuꞌne. ¿Axpe toc ka mya tuj tumel in nbinchaꞌne? ¿Myapelo ake aj Israel mintiꞌ in cybinchaꞌn ju baꞌn? 30 Akeye aj Israel, teyle junjun cyeye cbel tcastiw wuꞌne ic tzaꞌnx tbinchben. Akine Dios in chin kꞌmante jlu. Cypaꞌn el cyibe tiꞌj tcyakil cybinchbene mya baꞌn. tuꞌntzun mi cynaje tuꞌnx cyile. 31 Cypaꞌn el cyibe tiꞌj tcyakil mya baꞌn o cybinchaye wiꞌje, ex e toc cyanmiye ex cynable te acꞌaj. ¿Tikuꞌn cyaje tuꞌn cycyime, akeye aj Israel? 32 Porque miꞌn waje tuꞌn tcyim jun cyeye. Cypaꞌn el cyibe tiꞌj ju mya baꞌn, tuꞌntzun cyankꞌine. Akine Dios in chin kꞌmante jlu.