Aju techal tiꞌj tkan uva ex ke tꞌiw
17
Tzaj yolin Kman wucꞌile ex tma cyjaꞌ: 2 Aya xjal, kꞌmanxa jun techal cye aj Israel. 3 Kꞌmanxa cye cyjaꞌ:Atzun jlu in tmaꞌn Kman: At jun tꞌiw matij pon twi witz Líbano; nmakxix ke t-xicꞌ ex licꞌun cyten, junxilchak che queꞌyin tilbilal ttzmal. Tzyet tunen jun tzeꞌ wiꞌten tuꞌn,
4 ex jaw tcꞌuẍin aju tunen ex xiꞌ awalte te tuj jun txꞌotxꞌ jatum najltok ke comersyant, tuj jun tnam jatum at nim cꞌaẍjel.
5 Ax icx tzaj tiꞌn jun iyaj tuj txꞌotxꞌ cye aj Israel ex cuꞌx tawaꞌn tuj jun txꞌotxꞌ akꞌnamaj, ttziꞌ jun tkꞌab xak jatum in bet nim aꞌ. Cuꞌx tawaꞌn ic tzaꞌn jun wiꞌ chjaj.
6 Jaꞌwil pokꞌl iyaj ex oc te jun tkan uva nimxix tkꞌab, chꞌin oc twaꞌl, cyjaꞌ e jeꞌx ke tkꞌab tumlal tꞌiw, atzun ke tlocꞌ cyjaꞌ e cuꞌx tuj txꞌotxꞌ. Oc te jun tkan uva; tzaj nim t-xul ex el nim tkꞌab.
7 Pero attok juntl tꞌiw matij ex matijxix ke t-xicꞌ ex nim ttzmal. Atzun ke tlocꞌ uva cyucꞌix ke tkꞌab cyjaꞌ e jeꞌx tumlal ju tꞌiw lu, tuꞌn t-alinjtz tuꞌn jatum awaꞌntok.
8 Ex otok cuꞌx awaꞌn tuj jun txꞌotxꞌ tbanil, junx ttxlaj jatum in bettok nimxix aꞌ, jatum tuꞌn ttzaj nim tkꞌab ex tuꞌn toc nim twitz ex tuꞌn toc te jun wiꞌ uva tbanilxix queꞌyin.
9 Kꞌmanxa cye: Chitzun Kman ma tma cyjaꞌ: Aju tkan uva lu mlay chꞌiy. Aju tnejel tꞌiw cjawitz bakonte te, ex che tzajel tzꞌak ke twitz tuꞌn; nok nicꞌxi xjal ex mya nim cyipun cꞌoquel tiꞌj oc tjatz cybakoꞌn, ex che tzkijel cycyakil ke t-xul otok che tzaj.
10 Masque cuꞌx cyawaꞌn juntl maj, mlay tzaj t-xul; ctzkijel tuꞌn cykꞌikꞌ ctzajel tuj tjawitz kꞌij; ctzkijel ax jatum cbelex awaꞌn.
11 Tzaj yolin Kman wucꞌile ex tma cyjaꞌ: 12 Kaninxa cye xjal lu, akeju cycꞌiꞌ che bin, ka baꞌn cyuꞌn ti t-xilen ju techal lu. Kꞌmanxa cye cyjaꞌ: Pon rey te Babilonia tuj Jerusalén ex tzyet ju rey te Judá tuꞌn, cyucꞌix ke xjal maꞌ cyoclen ttxlaj, ex e ul tiꞌn max tuj Babilonia. 13 Cyaj tkꞌoꞌn toclen jun tiyjil rey ex o bant tiꞌj jun tyol tucꞌil, ex oc tkꞌoꞌn il tiꞌj tuꞌn t-xi ttziyan tuꞌn tniman te rey te Babilonia, ax icx e tzaj tiꞌn tucꞌil ke xjal maꞌ cyoclen tuj tnam, 14 tuꞌntzun tel tipun cycawbil aj Judá, ex tuꞌn miꞌn tjaw cyiꞌn cyib tuꞌn cykꞌojin, nok oꞌcx tuꞌn cucx cyten oc tjapun cyuꞌn aju yol cyaj bant tiꞌj tuꞌn rey cyucꞌil. 15 Atzunte tiyjil rey lu jaw tiꞌn tib tuꞌn tkꞌojin tiꞌj rey te Babilonia ex e jeꞌx t-samaꞌn sanjel tuj Ejipt kanil nimcu cyajlal soldad ex chej tuꞌn cyajben tuj kꞌoj. ¿Baꞌnpe cꞌelel jlu te te, jacupe tzokpaj tuꞌn miꞌn tcyim? ¿Jacupe tzokpaj tuꞌn miꞌn tcyim jun xjal mintiꞌ ma japun tuꞌn aju yol otok txi ttziyan? 16 Akine Dios in xi nmaꞌne jun yol axix toc: Aju xjal lu cymel tuj Babilonia tuꞌnju otok tzꞌoc tkꞌoꞌn te mintiꞌ tajben aju yol otok txi ttziyan, ex mintiꞌ ma japun tuꞌn aju yol otok txi ttziyan te rey aju otok tzꞌoc kꞌonte toclen tuꞌn toc te rey. 17 Oc toc tzokpaj rey te Babilonia kꞌojlel tiꞌj, ex oc tjaw tbinchaꞌn t-xweꞌtzbil tiꞌjele tnam, ex oc cycub tbyoꞌn nimcu xjal, mlayx tzaj t-samaꞌn rey Faraón txkan soldad ex mi txkan xjal te onil te, 18 porque otok tzꞌoc tkꞌoꞌn te mintiꞌ tajben aju yol otok txi ttziyan ex mintiꞌ ma japun tuꞌn aju yol cyaj bant tiꞌj tuꞌn tucꞌil rey; otok txi tkꞌon tib tuꞌn tjapun tuꞌn, pero mintiꞌ ma tbincha tcyakil jlu. Cyjaꞌtzun mlayx tzokpaj tuꞌn miꞌn tcyim. 19 Akine Dios in xi nmaꞌne jun yol axix toc: Aju xjal lu ma tzꞌoc tkꞌoꞌn te mintiꞌ tajben aju yol axix toc tzaj ttziyan weye ex mintiꞌ ma japun tuꞌn aju yol otok cyaj bant tiꞌj wuꞌne tucꞌil; cyjaꞌtzun cbel tcastiw wuꞌne. 20 Cxel nxoꞌne nxuybe tibaj ex ctzyetel wuꞌne; cxel wiꞌne tuj Babilonia ex atzun cbel tcastiw wuꞌne ma chixin porque mintiꞌ ma japun nyole tuꞌn. 21 Cycyakil ke t-soldad che elel ok ex che bel byoꞌn tuꞌn spad, atzun keju che cyjel ankꞌin che bajel sputj tuj tcyajil pacꞌ twitz txꞌotxꞌ. Cꞌeleltzun cynicꞌe tiꞌj, akine Dios otok chin yoline.
22 Akine Dios in xi nmaꞌne jlu: Ax icx weye ctzajel ntzyuꞌne tunen wiꞌten aju maꞌ twaꞌl; ex cꞌelel ncꞌuẍine jun t-xul aju maꞌ tjaw, ex ax kine chin belex awante twiꞌ jun witz maꞌ twaꞌl. 23 Cbelex wawaꞌne twiꞌ ju witz mas matij twaꞌl tuj tnam Israel. Che chꞌiyil ke tkꞌab, cꞌoquel twitz ex cꞌoquel te jun wiꞌten tbanilxix. Che najal cycyakil txcaj chyuꞌj t-xe tkan, che najal tjakꞌ t-xlecumal. 24 Cꞌeleltzun cynicꞌ cycyakil ke tzeꞌ tuj cojbil tiꞌj, ax toc akine Dios. In che jaw ntxꞌemine ke tzeꞌ maꞌ cywaꞌl ex in che chꞌiy wuꞌne ke tzeꞌ chꞌin cywaꞌl. In che tzkij wuꞌne ke tzeꞌ chaꞌx ex in che chaꞌxix wuꞌne ke tzeꞌ tzkij. Akine Dios in chin kꞌmante jlu ex in japun wuꞌne.