8 In icꞌ bete juntl maj cytxlaje ex e wile otok pon cyabkꞌiyile tuꞌn tcnet cychmile. Xitzun nlicꞌpuꞌne xbalune cyibaje, aju kꞌiꞌn wuꞌne, ex oc ntxaꞌyine cyiꞌje, xitzun ntziyane jun yol axix toc cyeye, bant tiꞌj jun nyole cyucꞌile, ex e octzune te weye. Akine Dios in chin kꞌmante jlu. 9 E bajtzun ntxꞌjoꞌne, el baj chicꞌ cyiꞌje wuꞌne, ex oc nkꞌoꞌne perjum cyiꞌje; 10 octzun nkꞌoꞌne cyxbalune tbanilxix queꞌyin tilbilal, ex cyxajbiye tzꞌuꞌm; xiꞌ nkꞌoꞌne jun cꞌalbil cycꞌuꞌje sak queꞌyin ex jun cyxbalune tbanilxix chemben te; 11 oc nkꞌoꞌne cyiꞌje ke adorn tbanilxix ex wiꞌyilxix, oc nkꞌoꞌne tkul kꞌabaj tiꞌj cykꞌabe, ex cub nkꞌoꞌne jun uwj cykule; 12 oc nkꞌoꞌne jun xmulkꞌabaj twi cytxaꞌne, oc nkꞌoꞌne tuj cyẍcyine, ex jax nkꞌoꞌne tuj cywiꞌye jun coron tbanilxix queꞌyin. 13 Baj noj cyiꞌje wuꞌne tuꞌn kꞌan pwak ex sak pwak; aju cyxbalune sak queꞌyin wen tbanilxix chemben te, ex mejorxix queꞌyin tilbilal. E waꞌne tiꞌj pan tbanilxix, ex e loꞌne tiꞌj taꞌl cab ex e chyoꞌne tiꞌj chibj aseyt nneꞌl tiꞌj tzeꞌ olivo. E oque tbanilxix che queꞌyine, ex e oque mer ic tzaꞌn t-xuꞌjil jun rey. 14 O binjtz tkanil tbanilxix cyiꞌje cyxol ke nasyon tuꞌnju tbanilxix che queꞌyine cyuꞌn ke adorn e oc nkꞌoꞌne cyiꞌje. Akine Dios in chin kꞌmante jlu.

15 Pero oc keꞌ cycꞌuꞌje tiꞌj ju queꞌybil cyeye tbanilxix, ex tuꞌnju el tkanil cyiꞌje ka tbanilxix queꞌybil cyeye, e oque ic tzaꞌn ke xuꞌj jawni cywitz cyucꞌil xinak ex xi cykꞌon cyibe tuꞌn cyyaẍine cyucꞌil ke xinak in che icꞌ bet. 16 Cyiꞌj ke cyxbalune cybinchaye ke xbalun ja cywiꞌ ke tal witz, ex atzun e cꞌulune cywitz ke tilbilal. A jlu miwt o cybinchaye ex miꞌnwt cybinchaye juntl maj. 17 Tzaj cyiꞌne ke adorn wiꞌyilxix kꞌan pwak ex sak pwak, aju otok txi nkꞌoꞌne cyeye, cub cybinchaꞌne ke tilbilal xinak tuꞌntzun cycꞌulune cywitz; 18 ex oc cykꞌoꞌne cyxbalune cyiꞌj aju mejorxix queꞌyin tilbilal, ex cub cykꞌoꞌne cywitz aju aseyt ex storac aju in ajben weye. 19 Aju pan otok txi nkꞌoꞌne cyeye, aju banin tiꞌj arin tbanilxix, ex aju aseyt ex aju taꞌl cab xi nkꞌoꞌne cyeye te cynicꞌbeble tuꞌn cyankꞌine tuꞌn, xi cyoꞌyine cye ke tilbilal te jun oyaj tbanilxix tcꞌocꞌjal. Akine Dios in chin kꞌmante jlu.

20 Ax icx ke cycyꞌajale ex ke cymeꞌjele e ul itzꞌj tuꞌn cyoc te weye, xi cykꞌoꞌne te chojbil cye ke tilbilal, mer ic tzaꞌn cywa. Nok chꞌin ma tzꞌeꞌla tuj cywitze tej cycꞌulune cywitz ke tilbilal, 21 ax icx ke cycꞌwaꞌle e ul itzꞌj tuꞌn cyoc te weye e jeꞌx cykꞌoꞌne te chojbil tuꞌn cycub tzꞌeꞌy te jun nimbil cye ke tilbilal. 22 Tej in che binchantoke mya baꞌn, ex tej in che yaẍintoke, mintiꞌ ul tiꞌj cycꞌuꞌje aju tkꞌijlalil tej cꞌwaꞌlxtok keye, tej mintiꞌtok cyxbalune toc, ex tej in xtanpaj cykane tuj cyitzꞌjlene.

23 Akine Dios in chin kꞌmante jlu: Ay, becꞌbil cywitze, mya nok oꞌcx ma cybinchaye nimcu mya baꞌn, 24 ax icx jaw cybinchaꞌne ke altar cyuj cycyakil cay jatum tuꞌn cycꞌulune cywitz ke tilbilal ex jatum tuꞌn t-xi cykꞌon cyibe tuꞌn cyyaẍine. 25 Cyuj cycyakil cyscyin cay jaw cybinchaꞌne ke altar jatum tuꞌn cycꞌulune cywitz ke tilbilal, ex aju queꞌybil cyeye tbanilxix oc cykꞌoꞌne te mintiꞌ tajben, ex xi cykꞌon cyibe tuꞌn cyyaẍine cyucꞌil cycyakil xinak in che icꞌ bet. Nimxix e yaẍine. 26 E yaẍine cyucꞌil cyvesine, cyucꞌil aj Ejipt akeju nim cygan tuꞌn cyyaẍin, ex tzaj nkꞌoje cyuꞌne tuꞌnju cucx in che yaẍine.

27 Cubtzun nkꞌoꞌne cycastiwoye: el wiꞌne chꞌin cytxꞌotxꞌe, ex e jeꞌx nkꞌoꞌne tuꞌn tcub cyiꞌje cyuꞌn aj filistey, akeju in che el icꞌune cyuꞌn ex mintiꞌ in che tzalaj tiꞌj cybinchbene chꞌixbajilxix. 28 Mintiꞌ o keꞌ cycꞌuꞌje tej cyyaẍine cyucꞌil aj Ejipt, ax icx xi cykꞌon cyibe tuꞌn cyyaẍine cyucꞌil aj Asiria; ex mi tuꞌn jlu mintiꞌx keꞌ cycꞌuꞌje. 29 Ex cucx t-xi cykꞌon cyibe tuꞌn cyyaẍine cyucꞌil aj Babilonia, aju cytanmi ke comersyant, ex mi tuꞌn jlu mintiꞌx in keꞌ cycꞌuꞌje. 30 Akine Dios in chin kꞌmante jlu: Mya segur taꞌ cyanmiye, cyjaꞌtzun in cybinchaꞌne ic tzaꞌn in bant tuꞌn jun xuꞌj jawni twitz cyucꞌil xinak ex mintiꞌ tchꞌixwi. 31 Cyuj cycyakil cay jaw cybinchaꞌne jun altar jatum tuꞌn cycꞌulune cywitz ke tilbilal ex jatum tuꞌn t-xi cykꞌon cyibe tuꞌn cyyaẍine. Pero cyeye mintiꞌ bant cyuꞌne ic tzaꞌnx in bant cyuꞌn ke xuꞌj jawni cywitz cyucꞌil xinak; porque cyeye mintiꞌ el cykanine chojbil cyeye.

32 Akeye ic cytene ic tzaꞌn jun xuꞌj aj pajil, masque at tchmil pero in xi tkꞌon tib cye xinak mintiꞌ ojtzkiꞌn tuꞌn. 33 Cycyakil ke xuꞌj jawni cywitz cyucꞌil xinak in xi kꞌoꞌn chojbil cye; atzun cyeye, akeye e jeꞌx kꞌonte oyaj cye ke xinak at cyganiye cyiꞌj ex axpe keye e jeꞌx chjonte cye tuꞌn cytzaj tuj tcyakil part binchal il cyucꞌile. 34 Cyeye tej cyyaẍine, junxil ma tenba cyuꞌne ic tzaꞌn in cybinchaꞌn ke txkantl xuꞌj jawni cywitz cyucꞌil xinak; mi jun in jyonte cyeye tuꞌn tyaẍin cyucꞌile, ex mintiꞌ in che tzaj chjoꞌne cyuꞌn, alpe keye in cheꞌx chjonte cye. Cyjaꞌtzun junxil ma tenba cyuꞌne ic tzaꞌn ke mastl xuꞌj. 35 Cyjaꞌtzun, akeye xuꞌj jawni cywitz cyucꞌil xinak cybintze nyole: 36 Akine Dios in xi nmaꞌne jlu cyeye: Ma tzꞌel cyiꞌne cyxbalune ex mintiꞌ ma tzaj cychꞌixwiye tuꞌn cyyaẍine cyucꞌil ke xinak at cyganiye cyiꞌj, ma che cꞌulune cywitz ke tilbilal icꞌunxix wuꞌne, ex ma che cub cybyoꞌne cycꞌwaꞌle te jun oyaj cywitz ke tilbilal.

37 Cyjaꞌtzun, che oquel nchmoꞌne cycyakil ke xinak at cyganiye cyiꞌj, akeju ma che achine cyucꞌil, cyucꞌix cycyakil keju e tzalaje cyucꞌil, ex cyucꞌix cycyakil keju e jeꞌl cyicꞌune; che oquel nchmoꞌne cyiꞌjeleye, ex cywitztzun ke jlu cꞌelel wiꞌne cyxbalune tuꞌntzun cyilwaje cyuꞌn mintiꞌ cyxbalune toc. 38 Cbel cysentense wuꞌne ic tzaꞌn cysentens xuꞌj aj pajil ex byol xjal, ex tuꞌn ntxꞌuꞌjile che cymele. 39 Che xel nkꞌoꞌne tuj cykꞌab ke jlu tuꞌntzun tcub cyxitun ke lugar jatum in che yaẍine ex jatum in che cꞌulune cywitz ke tilbilal. Cꞌelel cyiꞌn cyxbalune toc cyiꞌje cyucꞌix ke adorn tbanilxix che queꞌyin, ex che cyjel tene jumajx mintiꞌ cyxbalune. 40 Tzul cyiꞌn nim xjal kꞌojlel cyiꞌje, che oquel xoꞌne tuꞌn abj ex che bel byoꞌne tuꞌn spad cyuꞌn. 41 Cꞌoquel cykoptzꞌiꞌn kꞌakꞌ tiꞌj cyjaye ex cbel cysentense cyuꞌn cywitz nimcu xuꞌj. Miꞌn cybinchatle aj pajil, ex mlay txiꞌ cychjoꞌne juntl maj ke xinak at cyganiye cyiꞌj. 42 Biꞌxtzun cchewixtel nkꞌoje cyiꞌje; chin cbel txuleꞌye ex mlay chin kꞌojintle. 43 Ma tzicꞌ tnaꞌl cyuꞌne tkꞌijlalil tej matok kꞌapojx keye, ex ma tzaj nkꞌoje tuꞌn cyyaẍbile ex cybinchbene icꞌbilxix; cyjaꞌtzun cbel cycastiwoye wuꞌne tuꞌn tlaj ju cybinchbene lu. Akine Dios in chin kꞌmante jlu.

44 Atzun jaꞌlo, cycyakil keju in che yolin tiꞌj jun twitz yol axix toc che yolil cyiꞌje aju yol in tmaꞌn cyjaꞌ: Tzaꞌnx te txuybaj cyjaꞌxtzun te tal. 45 Akeye tal cytxuꞌye, aju el icꞌunte tchmil cyucꞌix ke tal, ax icx ke cyitzꞌine el cyicꞌun cychmil cyucꞌix cyal. Aj Hetey cytxuꞌye, ex aj Amorrey cymane. 46 Tuj txꞌotxꞌ tumlal tbankꞌab kꞌij taꞌtok tnam Samaria cyucꞌix ke t-aldey, aju ma tzꞌoc tbi ic tzaꞌn cytzique xuꞌj; atzun tuj txꞌotxꞌ tumlal tnayaj kꞌij taꞌtok tnam Sodoma cyucꞌix ke t-aldey, aju ma tzꞌoc tbi ic tzaꞌn cyitzꞌine xuꞌj. 47 Atzun cyeye ma tzꞌel cycanoꞌne cyiꞌj. Mya oꞌcx ma cybinchaye ic tzaꞌn cye cybincha, mas pyor ma tzicꞌ tibaj cyuꞌne. 48 Akine Dios in xi nmaꞌne jun yol axix toc: Ke aj Sodoma cyucꞌix ke t-aldey, aju toc tbi cyitzꞌine xuꞌj, mintiꞌlpe cybincha ic tzaꞌn cyeye ma cybincha ex ic tzaꞌn ma cybincha ke cy-aldeye. 49 Atzun cyil aj Sodoma jlu, akeju toc cybi cyitzꞌine xuꞌj: Jaw cyniman cyib cyucꞌix ke cy-aldey tuꞌn tlaj chmet nimxix cywa ex tuꞌnju ateꞌtok tuj txubtxaj, pero mintiꞌ e onin cyiꞌj ke meba xjal ex cyiꞌj keju atx taj cye. 50 Jaw cynima cyib ex cybincha aju mya baꞌn nneꞌl wicꞌune, cyjaꞌtzun o che cub nxitune ic tzaꞌn o cyile. 51 Myalpe ic il o bant cyuꞌn aj Samaria ic tzaꞌn cyeye ma bant cyuꞌn. Cyeye ma cybinchaye nimxix mya baꞌn ic tzaꞌn cye. Tuꞌnju nim mya baꞌn ma cybinchaye, ma che oc aj Sodoma ic tzaꞌn mintiꞌ cyil, aju toc cybi cyitzꞌine xuꞌj. 52 Cbel cychꞌixwiye oc tcub cycastiwoye, ex il tiꞌj tuꞌn tcub cyapaꞌne, porque tuꞌnju nim il ma cybinchaye cywitz ke cyitzꞌine xuꞌj, cye ma che oc ic tzaꞌn mintiꞌ cyil. Cbel cychꞌixwiye oc tcub cycastiwoye, ex il tiꞌj tuꞌn tcub cyapaꞌne, porque tuꞌnju nim il ma cybinchaye, ma che oc cyermaniye xuꞌj mer ic tzaꞌn mintiꞌ cyil.

53 Ke aj Sodoma ex ke aj Samaria che tel juntl maj tuj txubtxaj wuꞌne, cyucꞌix cy-aldey; ax icx cyeye che tele juntl maj tuj txubtxaj wuꞌne, 54 pero il tiꞌj tuꞌn ticꞌx cyuꞌne oc ttzaj cycastiwoye, ex ctzajel cychꞌixwiye tiꞌj aju o cybinchaye, cyjaꞌtzun ckebel cycꞌuꞌj keju cabe tnam toc cybi cyermaniye xuꞌj. 55 Ke aj Sodoma ex ke aj Samaria cyucꞌix ke cy-aldey, che tel tuj txubtxaj juntl maj, ax icx cyeye cyucꞌix ke cy-aldeye che tele juntl maj tuj txubtxaj ic tzaꞌn nej. 56 Tej tcub cycastiw aj Sodoma, akeju toc cybi cyitzꞌine xuꞌj, e xmayine cyiꞌj, ex jaw cyniman cyibe 57 tej naꞌnxtok tkꞌanchaꞌlin cybinchbene mya baꞌn; atzun jaꞌlo ke aj Siria, ke aj filistey ex ke tnam cyvesin cyibe cyucꞌil in che xmayin cyiꞌje; ex cycyakil xjal in che icꞌun cyeye. 58 Atzun jaꞌlo il tiꞌj tuꞌn ticꞌx castiw cyuꞌne tuꞌn tlaj cyyaẍbene ex cybinchbene icꞌbilxix. Akine Dios in chin kꞌmante jlu.

59 Akine Dios cxel nmaꞌne jlu: Tuj tumelxix cbel nkꞌoꞌne cycastiwoye, porque ma tzꞌoc cykꞌoꞌne te mintiꞌ tajben aju yol tzaj cytziyane, ex mintiꞌ ma japun cyuꞌne aju yol cyaj bant tiꞌj wuꞌne cyucꞌile. 60 Atzun weye ctzajel nnaꞌne aju yol cyaj bant tiꞌj wuꞌne cyucꞌile tej matok kꞌapoj keye, ex cbantel tiꞌj jun nyole cyucꞌile te jumajx. 61 Tzultzun tiꞌj cycꞌuꞌje aju cybinchbene ex ctzajel cychꞌixwiye oc cycꞌmonteye ke cytzique ex ke cyitzꞌine xuꞌj, oc cyxi nkꞌoꞌne cyeye tuꞌn cyoc ic tzaꞌn cyale, pero mya tuꞌnju atwit cyoclen tiꞌj ju yol cyaj bant tiꞌj wuꞌne cyucꞌile. 62 Cbantel tiꞌj nyole juntl maj cyucꞌile, cꞌeleltzun cynicꞌe tiꞌj, akine Dios. 63 Oc tcub nnajsaꞌne tcyakil cybinchbene mya baꞌn, tzultzun tiꞌj cycꞌuꞌje ex ctzajel nimxix cychꞌixwiye ex miꞌn che yolintle. Akine Dios in chin kꞌmante jlu.