2 Jun nimbil te Dios tuꞌn tcub tewan jun tiꞌxti, atzun cye rey, jun nimbil te cye ka ma baj cyxpichꞌun jun tiꞌxti tuꞌn tel tuj kꞌanchaꞌl.

3 Aju twaꞌl cyaꞌj, aju t-xeꞌpun txꞌotxꞌ ex aju cyximbetz ke rey, ake jlu mlay tzꞌel nicꞌbaj cyiꞌj.

4 Kꞌiꞌn ela tzꞌil tiꞌj sak pwak, ex jacu bant jun vas tiꞌj tuꞌn binchalte;

5 ke xjal binchal mya baꞌn che tpaꞌn ela ke twitz rey, ex aju tkꞌukbil ccyuwsetel tuj tumelxix.

6 Miꞌn tzꞌoc tkꞌon tiba te maꞌ toclena twitz rey, ex miꞌn cub tena tuj tlugar jun xjal maꞌ toclen;

7 porque mas baꞌn ka ma tzaj cyman teya: Ttzaja ex kecuya tzalu, twitzju tuꞌn ttzaj kꞌmaꞌn teya cywitz ke xjal maꞌ cyoclen: Ticꞌ lakꞌeꞌya tzalu.

8 Akeju in che tila cyuꞌn ke tbakꞌ twitza, miꞌn txi naja kꞌmalte cye aj sanjelal, porque tuꞌn juntl testiw jacu tzꞌoc kꞌoꞌna nicꞌal yol, ex te bajsbil mlay tzꞌel tnicꞌa tiꞌj alcye tuꞌn tbant tuꞌna.

9 Binchanxa tiꞌj kꞌoj tucꞌil tvesina cyjunalxe, ex miꞌn baj tyolina te juntl aju ma bant tiꞌj cyuꞌne cyxolxe;

10 mya yajcu at jun xjal jacu bin teya ex jacu cub kꞌoꞌn tchꞌixwiya tuꞌn, ex aju yolbil teya mya baꞌn, mlay tzicꞌ tnaꞌnjtz cyuꞌn xjal.

11 Oc ttzaj kꞌmaꞌn jun yol at tajben, ic tten jlu ic tzaꞌn jun tilbilal mansan kꞌan pwak ttxꞌotxꞌil ex cyoc junjun tilbilal tiꞌj sak pwak cytxꞌotxꞌil.

12 Ka ma ko mayonjtz tiꞌj jun mya baꞌn tuꞌn jun xjal at tnabl ex ka ma txi kbiꞌn, ic tten jlu te ke ic tzaꞌn jun xmulkꞌabaj ex jun uwj kꞌan pwak tbanilxix cytxꞌotxꞌil.

13 Aju sanjel in japunxix tuꞌn, ic nnoꞌc teju samalte te ic tzaꞌn t-schewil ttxa cheꞌw tuj tkꞌijlalil cyak, porque tuꞌn jlu in keꞌ tcꞌuꞌj tpatrón tiꞌj.

14 Ke xjal in cymaꞌn tuꞌn t-xi cykꞌoꞌn jun oyaj te juntl ex mintiꞌ in xi cykꞌoꞌn, ic cyten ic tzaꞌn muj ex cykꞌikꞌ mintiꞌ jbal cyuj.

15 Tuꞌn nim pasens in cub tcꞌuꞌj jun cawil; ex masque puro cyuw cyanmi xjal, pero in cub tiꞌj cyuꞌn ke yol baꞌn cybinx.

16 Ka ma cnet taꞌl cab tuꞌna, miꞌn txi tloꞌna nim, mya yajcu jatz t-xaꞌwina tuꞌnju nim otok txi tloꞌna.

17 Ka ma txiꞌya visitarilte jun tamiwoya, miꞌn txiꞌya cocꞌx wen, mya yajcu jacu sict tuꞌna ex jacu tzꞌel icꞌuna tuꞌn.

18 Aju xjal in tmaꞌn jun nicꞌaj yol tiꞌj jun tucꞌil, ic tten ic tzaꞌn jun martiy, ex ka spad, ex ka plech tzꞌuꞌp twiꞌ.

19 Oc ttzaj yajbil kiꞌj ex ka ma tzꞌoc keꞌ kcꞌuꞌj tiꞌj jun xjal mya baꞌn, junx taꞌ jlu ic tzaꞌn in ko bet tucꞌil jun kkan otok tzꞌex kꞌulpaj, ex ic tzaꞌn in ko waꞌn tucꞌil jun twitz keꞌ otok tzꞌetz tokj.

20 Ka ma txi bitzan jun bitz cywitz ke xjal in che bisun, junx taꞌ jlu ic tzaꞌn in cuꞌx kꞌot taꞌl vinagr tuj jun txꞌaꞌc, ex ic tzaꞌn nneꞌl tiꞌn xjal t-xbalun tuj tkꞌijlalil cheꞌw.

21 Ka at weꞌyaj tiꞌj aj kꞌoj tiꞌja, kꞌonxa twa, ex ka at txketleꞌn tiꞌj, kꞌonxa tcꞌa;

22 tuꞌntzun jlu biꞌx ctzajel tchꞌixwi, ex ate Kman ckꞌolte t-xel teya.

23 Tuꞌn cykꞌikꞌ in tzaj tuj tbankꞌab kꞌij in tzaj jbal, ex tuꞌnju mya baꞌn yolin xjal in tzaj kꞌoj tuꞌn.

24 Mas baꞌn tuꞌn tnajan jun xinak tjunalx tuj jun tal galer, twitzju tuꞌn tnajan tuj jun matij ja tucꞌil jun xuꞌj jawni kꞌojl.

25 Oc tul jun tkanil baꞌn tzajni tuj jun txꞌotxꞌ najchak, junx taꞌ ic tzaꞌn cheꞌw aꞌ in xi tcꞌaꞌn jun xjal at txketleꞌn tiꞌj.

26 Ka at jun xjal tzꞌaklxix in cub tcuyin aju in tzaj kꞌmaꞌn te tuꞌn jun xjal mya baꞌn, ic tten xjal lu ic tzaꞌn jun twi aꞌ in baj xokꞌliꞌn tuj ex in tzꞌilix twitz.

27 Mya baꞌn ka ma txi kloꞌn nim taꞌl cab, ax icx mya baꞌn ka in ko jyon tiꞌj nimbil ke.

28 Aju xjal mintiꞌ in tjacꞌunte tib, ic tten ic tzaꞌn jun tnam mintiꞌ muro toc tiꞌj ex at tuj xobajil.