-19-
24
Miꞌn tzaj tloꞌch tcꞌuꞌja cyiꞌj ke xjal binchal mya baꞌn, ex miꞌn pon tcꞌuꞌja tiꞌj tuꞌn toc tucꞌin tiba cyucꞌil,2 porque ke xjal lu oꞌcx in che ximan tiꞌj tuꞌn cyelkꞌan ex oꞌcx in che yolin tiꞌj tuꞌn cybinchante mya baꞌn.
-20-
3 Tuꞌn nabl in jaw binchet jun ja, ex tuꞌn ximbetz in cub keꞌ t-simyentil,
4 tuꞌn ojtzkibl in baj noj cyuj ke cwart cyuꞌn ke tiꞌxti wiꞌyilxix ex tbanilxix che queꞌyin.
-21-
5 Mas nim toclen jun xjal at tnabl twitz jun xjal at nim tipun, ex mas baꞌn tuꞌn tten tojtzkibl jun xjal twitzju tuꞌn tten tipun;
6 porque ka ma tzꞌoc jun kꞌoj, cheba in cub ximet tzaꞌn tten tuꞌn ttzyet, ex ka at nim xjal in cykꞌoꞌn consej, jacu cub tiꞌj aj kꞌoj.
-22-
7 Aju xjal mintiꞌ tnabl, mintiꞌ baꞌn tuꞌn alcye yol tuꞌn t-xi tmaꞌn cywitz aj sanjelal, tuꞌnju maꞌ t-xilen ju nabl ex mlay tzꞌel tnicꞌ tiꞌj.
-23-
8 Aju xjal oꞌcx in ximan tiꞌj tuꞌn tbinchante mya baꞌn, cꞌoquel tbi cyuꞌn xjal jawni sbun.
9 Aju xjal mintiꞌ tnabl, oꞌcx in ximan tiꞌj tuꞌn tbant il tuꞌn; ex aju xjal baꞌn xmayin, icꞌun twitz cyuꞌn xjal.
-24-
10 Ka ma tzaj baj tcꞌuꞌja oc ttzaj yajbil tiꞌja, myatzun nim tipuna at icju.
-25-
11 Cloma ke xjal tcub cysentens tuꞌn cycyim; ex cloma ke xjal chꞌix cyxi kꞌiꞌn tuꞌn cycub byoꞌn.
12 Masque txi tmaꞌna: Mintiꞌ we biꞌn wuꞌn, ka chiya, baka mlay tzꞌel tnicꞌ Dios tiꞌj jlu, aju in baj queꞌyinte cyanmi xjal; aju toc tcwent tiꞌj tchwinklala ya baꞌntl tuꞌn, ex tuꞌn in xi tkꞌoꞌn chojbil te xjal ic tzaꞌn tbinchben.
-26-
13 Ncꞌwaꞌl, loꞌnxa aju taꞌl cab puro chiꞌ, aju tjakꞌ cꞌul cab; nicꞌbenxa ex puro chiꞌ loblte wen.
14 Ax icxtzun puro chiꞌ cꞌelel te teya aju nabl ex ju ojtzkibl; katzun ma che cnet tuꞌna, te tibajxi puro baꞌn cꞌelel te teya, ex aju in ayona tiꞌj mlayx cub xitun.
-27-
15 Miꞌn cub t-ximana tuꞌn tbinchanteya mya baꞌn tiꞌj jun xjal tzꞌaklxix, ex miꞌn tzꞌetz telkꞌana aju at tuj tja.
16 Masque cub tzꞌak wuk maj ju xjal tzꞌaklxix, pero in jaw weꞌ juntl maj; atzun ke xjal binchal mya baꞌn, nok cyjaꞌ in cheꞌx mastl tuj ju mya baꞌn.
-28-
17 Miꞌn jaw tzalaja oc tcub tzꞌak aju aj kꞌoj tiꞌja ex oc ttzaj jun mya baꞌn tibaj,
18 porque oc tlonte Kman jlu, mlay tzalaj tiꞌj, ex jacu cyaj tcolin tuꞌn mi tkꞌojin tiꞌj.
-29-
19 Miꞌn jaw kꞌojla tuꞌn cylaj ke xjal binchal mya baꞌn, ex miꞌn tzaj txꞌaꞌl tcꞌuꞌja tiꞌj xjal ploj tmod,
20 porque aju xjal binchal mya baꞌn, misicyer jun oc tcambaꞌ; ic cꞌoquel ic tzaꞌn jun candil in cuꞌx yupj.
-30-
21 Ncꞌwaꞌl, nimana te Dios ex te rey, miꞌn tzꞌoc tmojban tiba cyucꞌil xjal miban che niman,
22 porque minaben che najel ex mi jun baꞌn tuꞌn aju cycastiw ctzajel tuꞌn Dios ex tuꞌn rey.
Txkantl yol te xnakꞌtzbil cyuꞌn ke xjal at cynabl
23 Ax icx ke jlu ax cyyol ke xjal at cynabl:
Ka nnoꞌc cyqueꞌyin ke jwes aju t-xilen xjal, mya baꞌn jlu.
24 Aju nnoꞌc kꞌonte jun xjal te mintiꞌ til ex at til, cxel kanin mya baꞌn tibaj cyuꞌn tnam xjal ex cꞌelel icꞌun cyuꞌn ke nasyon;
25 atzun keju in che cub kꞌonte tcastiw, at tzalajbil cye ex ctzajel cykanin xjal cyꞌiwbil cyibaj.
26 Aju xjal in xi tkꞌoꞌn jun tzakꞌwebl baꞌnxix, nimxix in che tzalaj xjal tiꞌj.
27 Binchama cyiꞌj ke takꞌuna ex txiꞌya binchalte takꞌuna tuj cojbil, ex te tibajxi baꞌntzun tuꞌn tjaw tbinchaꞌna tjaya.
28 Miꞌn tzꞌoca jun testiw nicꞌal yol tiꞌj tucꞌila, ex miꞌn txi tcyuwsaꞌna jun tiꞌxti ka mya ax toc.
29 Miꞌn cub t-ximana tuꞌn taj tkꞌoꞌna t-xel mya baꞌn, mi tuꞌn tbinchanteya tiꞌj juntl ic tzaꞌnx otok tbincha tiꞌja.
30 In exe tuj tcojbil ju xjal cyꞌaj ex cyxol tkan t-uva ju xjal mintiꞌ tnabl:
31 aju o wile, jun txꞌotxꞌ nojni tuꞌn chꞌiꞌx, ex ke abj toc te tpeꞌnil otok che el tilj.
32 Tej twile jlu, in oc tene ximal tiꞌj; o wile ex oc te jun xnakꞌtzbil weye.
33 Tuꞌn tlaj cucx ttana ex cucx tpichꞌjeꞌ twiꞌya tuꞌn watl ex cucx tcub ttzꞌulin tkꞌaba tuꞌn ttana,
34 tzul mebayil tiꞌja ex cꞌoquel tzokpaj tiꞌja ic tzaꞌn jun xjal elekꞌ kꞌiꞌn ubl tuꞌn.