-6-
23
Ka ma txconjtza tuꞌn jun xjal maꞌ toclen tuꞌn t-xiꞌya waꞌl tucꞌil, ximana tiꞌj alcyeju xjal tcub twitza.2 Masque nneꞌl tcꞌuꞌja wen, pero miꞌn txiꞌ nim tuꞌna;
3 miꞌn pon tcꞌuꞌja cyiꞌj ke tchiꞌ tbanilxix, porque jacu cub sbuꞌna tuꞌn.
-7-
4 Miꞌn baj t-sicsan tiba tuꞌn toca te kꞌinun; colinxa tuꞌn t-ximana tiꞌj jlu.
5 Ka ma tzꞌoc tkꞌoꞌn tcwenta tiꞌj kꞌinumabl, cꞌelel tnicꞌa tiꞌj ka mya nim in ten, porque jurat cbel naj ic tzaꞌn jun tꞌiw jurat nnicꞌ lipan ex najchak in pon, mer ic tzaꞌn otok jlet t-xicꞌ kꞌinumabl.
-8-
6 Miꞌn cub keꞌya waꞌl tiꞌj tmes jun xjal xcꞌa, ex miꞌn pon tcꞌuꞌja tiꞌj tchiꞌ puro tbanil,
7 porque toc tcwent tiꞌj nicꞌpun cbajel tuꞌna ex in tmaꞌn: Waꞌna ex cꞌana chi, pero nok tten tuꞌn,
8 ex te tibajxi cjawitz t-xaꞌwina aju otok txi twaꞌna, ex nokx gan otok txi tkꞌoꞌna chjonte te.
-9-
9 Miꞌn txi tmaꞌna jun tiꞌxti teju xjal mintiꞌ tnabl, porque nok cꞌoquel ten xmayil cyiꞌj ke tyola at tnabl.
-10-
10 Miꞌn baj tchꞌexpuꞌna tmojonil txꞌotxꞌ cub kꞌoꞌn ojtxi, ex miꞌn tzꞌel tiꞌna cytxꞌotxꞌ ke cꞌwaꞌl o che cyim cyman,
11 porque at jun cye colil cyiꞌj nimxix tipumal, ex cꞌoquel tzokpaj tiꞌja tuꞌn tcolin cyiꞌj.
-11-
12 Xnakꞌtzam tiba cyiꞌj ke xnakꞌtzbil, ex kꞌonx twiꞌya cyiꞌj ke yol at cynabl.
-12-
13 Miꞌn txi tcolina tuꞌn cyxi tcawina ke cꞌwaꞌl, porque mlay che naj oc t-xi tjatoꞌna cyasyal;
14 ka ma cheꞌx tcawina, che cletel tuꞌna te camic.
-13-
15 Ncꞌwaꞌl, ka ma tzꞌoca at tnabla, chin tzalajele tiꞌja;
16 ex nimxix chin tzalajele oc nbinteye ka in yolina tuj tumel tiꞌj jun tiꞌxti.
-14-
17 Miꞌn tzaj loꞌch tcꞌuꞌja cyiꞌj ke xjal aj il; nok oꞌcx cucx nimana te Kman;
18 cyjaꞌtzun baꞌn cꞌelel te teya, ex aju in ayona tiꞌj mlayx cub xitun.
-15-
19 Bintza aya ncꞌwaꞌl tuꞌntzun toc tnabla, ex tzꞌoc tililx tuꞌna tuꞌn tbeta tuj be baꞌn.
20 Miꞌn tzꞌoc tucꞌin tiba cyucꞌil ke xjal cꞌal kꞌeꞌn ex mi cyucꞌil ke xjal jawni che waꞌn,
21 porque ke cꞌal kꞌeꞌn ex ke jawni che waꞌn che oquel te meba, ex ke cyꞌaj puro ttxꞌakan xbalun cꞌoquel cyiꞌj.
-16-
22 Biꞌnxa tyol tmana aju o cꞌwaꞌlin teya, ex miꞌn tzꞌel ticꞌuna ttxuꞌya oc ttijin.
23 Lakꞌoma yol axix toc, ju ojtzkibl ex ju xnakꞌtzbil, tucꞌix ju nabl, ex miꞌn cheꞌx tcꞌayina.
24 Nim in tzalaj jun mambaj tiꞌj tcꞌwaꞌl ka baꞌn ex ka at tnabl;
25 cuchiwt che tzalaj tmana ex ttxuꞌya tiꞌja, ex cuchiwt tzalaj aju alin teya.
-17-
26 Ncꞌwaꞌl, biꞌnxa ke nyole, ex canoꞌmila aju in bant wuꞌne;
27 porque aju xuꞌj aj pajil ex ju xuꞌj jawni twitz cyucꞌil xinak, ic cyten ic tzaꞌn jun jul maꞌ t-xeꞌ ex chꞌin tuj;
28 ex ic cyten ic tzaꞌn jun elekꞌ, in che cub ten xkꞌukil cyiꞌj ke xinak, ex nimcu xinak in che naj cyuꞌn.
-18-
29 ¿Alcye in ayayan tuꞌn taꞌw? ¿Alcye in jyon kꞌoj ex in okꞌ? ¿Alcye biꞌx in tzaj sutin tuj twitz?
30 A aju xjal mintiꞌ in cyaj tcolin tuꞌn tcꞌan vin ex in xi tcꞌaꞌn nim txcaj vin smoꞌn tucꞌil juntl.
31 Miꞌn txi tqueꞌyina cꞌabj vin puro cyak queꞌyin twitz ex in koptzꞌaj tuj tcubil, ex mya cwest in cuꞌx cyuꞌn xjal.
32 Pero te tibajxi, ic tten ic tzaꞌn nnoꞌc txꞌaꞌn jun xjal tuꞌn lobaj, in tzaj nim taꞌw.
33 Nok tichak cꞌoquel yecꞌun tuj twitza tuꞌn, ex mintiꞌ ttxolil t-ximbetza ex tyola;
34 oc tnaꞌya mer ic tzaꞌn tjaxa twiꞌ jun tzeꞌ tcuꞌx tuj tmij barc ex in yucch tuꞌn cykꞌikꞌ tuj tmij mar,
35 ex oc tmaꞌya cyjaꞌ: Ma chin oc bjuꞌne, pero mintiꞌ xnnaꞌye, ma chin baj asyaline, pero mintiꞌ xnnaꞌye taꞌw; pero oc tul nnable, chin xeꞌle jyol mastl vin.