22
Mas baꞌn ka in yolinjtz baꞌn tiꞌj jun xjal twitzju tuꞌn tten tkꞌinumabl, ex mas baꞌn ka in che tzalaj xjal tiꞌj twitzju tuꞌn tten sak pwak ex kꞌan pwak tucꞌil.2 Aju xjal kꞌinun ex ju meba junx ateꞌ, tuꞌnju cycabil ma che bant tuꞌn Kman Dios.
3 Aju xjal at tnabl, oc t-xi tqueꞌyin ka cyjaꞌ ttzaj xobajil tibaj, in jyon naj tumel tuꞌn tex twitz; atzunju xjal mintiꞌ tnabl, cucx in xi lakꞌeꞌ tuj tbe ex in cꞌixbi tuꞌnju mya baꞌn.
4 Ka mans koꞌ ex ka in ko niman te Kman, ctzajel kꞌoꞌn kkꞌinumabl, nimbil ke ex kchwinklal.
5 Aju tbe xjal mya baꞌn nojni tuj tuꞌn chꞌiꞌx ex cꞌobil, pero aju xjal toc tcwent tiꞌj tchwinklal nneꞌl tpaꞌn tib tiꞌj be lu.
6 Cykꞌonxe xnakꞌtzbil cye cꞌwaꞌl tuꞌn cybet tuj be baꞌn, octzun cytijin mlay tzꞌel cypaꞌn cyib tiꞌj.
7 Aju xjal kꞌinun in cawin cyibaj ke xjal meba, ex ke xjal cꞌasbenal ke in che cyaj tjakꞌ tcawbil aju in kꞌonte cychꞌex.
8 Aju xjal in tbinchaꞌn mya baꞌn, ax icx tzul mya baꞌn tiꞌj, ex aju tipun tuꞌn tbinchante mya baꞌn cnajel.
9 Aju xjal in tbinchaꞌn xtalbil te juntl cbel cyꞌiwlaꞌn, tuꞌnju in xi t-sipan twa cye ke xjal meba.
10 Oc tex lajoꞌn ju xjal baꞌn xmayin, in cub naj ju icꞌj tibil, ax icx in baj twi kꞌoj ex yasbil.
11 Aju xjal in tzalaj tuꞌn tten tanmi sak ex mans yolin, nnoꞌc te tamiw rey.
12 Ate Kman in cwentin tiꞌj ju xjal at tnabl, ex in baj ttzpet-saꞌn tyol ju xjal nicꞌal yol.
13 Aju xjal tcꞌiꞌ tzꞌakꞌnan in tmaꞌn cyjaꞌ: At balun tuj cay, jacu bant ncub byoꞌne tuꞌn, chi xjal.
14 Aju ttziꞌ ju xuꞌj jawni twitz cyucꞌil xinak, ic tten ic tzaꞌn jun jul maꞌ t-xeꞌ jatum in che cupun tzꞌak ke xjal at tkꞌoj Kman cyiꞌj.
15 Ke cꞌwaꞌl nok in che ẍticꞌun, pero jacu tzꞌel jlu oc cyxi cawit tucꞌil asyal.
16 Aju xjal in cub yajlante jun xjal meba nok tuꞌn toc te kꞌinun, ex aju xjal in xi kꞌonte oyaj te jun xjal kꞌinun, cycabil oc che tel tuj mebayil.
Ke 30 yol te xnakꞌtzbil cyuꞌn ke xjal at cynabl
17 Kꞌonx twiꞌya cyiꞌj cyyol ke xjal at cynabl, ex kꞌoncuꞌxa nxnakꞌtzbile tuj tanmiya.
18 Ctzalajela tiꞌj ka ma cyaj tcꞌuꞌna tuj tnabla, ex tuꞌn ttzaj tnaꞌna tcyakil junx.
19 Cxel nmaꞌne teya jaꞌlo, tuꞌntzun toc keꞌ tcꞌuꞌja tiꞌj Kman.
20 Ma txi ntzꞌibane 30 yol teya; akeju yol lu in cykꞌoꞌn consej baꞌn ex ojtzkibl,
21 tuꞌntzun t-xnakꞌtzanjtza cyuꞌn tuꞌn tel tnicꞌa tiꞌj yol ax toc, ex tuꞌntzun t-xi tkꞌoꞌna jun tajlal tzꞌaklxix teju otok tzaj samante teya.
-1-
22 Miꞌn tzꞌelkꞌana tiꞌj jun xjal meba tuꞌnju meba, ex miꞌn cub tyajlaꞌna jun xjal mintiꞌ colil tiꞌj twitz jwes,
23 porque ate Kman ccolil tiꞌj, ex oc che bel tyajlaꞌn keju otok che baj yajlante te.
-2-
24 Miꞌn tzꞌoc tamiwin tiba tucꞌil ju xjal jawni kꞌojl ex txꞌuꞌj twiꞌ, ex miꞌn tzꞌoc tucꞌin tiba tucꞌil,
25 mya yajcu tzꞌel tcanoꞌna aju cycostumr mya baꞌn, ex tuꞌn tocx tkꞌon tiba tuj jun cꞌobil.
-3-
26 Miꞌn tzꞌoc tkꞌon tiba tuꞌn tcyaj weꞌya tiꞌj tcꞌas jun xjal,
27 porque ka mintiꞌ tumel tuꞌn tchjet tuꞌna, tucꞌixpe twatbila jacu tzꞌel kꞌiꞌn tiꞌj.
-4-
28 Miꞌn baj tchꞌexpuꞌna tmojonil txꞌotxꞌ cub cykꞌoꞌn ke t-xeꞌchela.
-5-
29 Aju xjal baꞌn takꞌunben, ctel cytxlaj ke rey, ex mlay ten cytxlaj ke xjal mintiꞌ cyoclen.