2 Tuj twitz xjal ka baꞌn tcyakilju in tbinchaꞌn, pero ate Kman in baj queꞌyinte t-ximbetz xjal, ka baꞌn ex ka miꞌn.

3 Aju xjal in tbinchaꞌn ju tzꞌaklxix ex in bet tuj tumel, mas maꞌ t-xilen jlu tuj twitz Kman cywitz ke chojbil.

4 Aju xjal jawni twitz ex in jaw tniman tib, ex aju t-ximbetz xjal binchal mya baꞌn, tcyakil jlu il tuj twitz Kman.

5 Aju xjal nej in cub ten ximal tiꞌj alcye tuꞌn tbant tuꞌn, baꞌn nneꞌl te te, atzunju xjal nok t-xoꞌn tib tiꞌj jun tiꞌxti ex mintiꞌ in cub ten ximal tiꞌj ka baꞌn, ctzajel mebayil tiꞌj.

6 Aju tkꞌinumabl xjal in cnet nok tuꞌn nicꞌaj yol, jurat in cub naj ex jun cꞌobil jlu te te tuꞌn tcyim.

7 Ke xjal binchal mya baꞌn oc che najel tuꞌnx ju cytxꞌuꞌjil, tuꞌnju mintiꞌ cyajbil tuꞌn cybinchante aju tzꞌaklxix.

8 Aju be kꞌiꞌn tuꞌn xjal binchal mya baꞌn puro ẍoꞌc tiꞌj ex mintiꞌ ttxolil; atzun ke xjal mintiꞌ cyil in che bet tuj tumelxix.

9 Mas baꞌn tuꞌn tnajan jun xinak tjunalx tuj jun tal galer, twitzju tuꞌn tnajan tuj jun matij ja tucꞌil jun xuꞌj jawni kꞌojl.

10 Aju xjal binchal mya baꞌn oꞌcx in ximan tiꞌj tuꞌn tbinchante mya baꞌn, ex mintiꞌ in tbinchaꞌn jun xtalbil tiꞌj jun tucꞌil.

11 Oc tcub tcastiw jun xjal baꞌn xmayin, atzun cꞌoquel tnabl ju xjal mintiꞌ chꞌin baꞌn tuꞌn; atzunju xjal at tnabl, cꞌoquel mastl tojtzkibl oc toc cawin.

12 Ate Dios tzꞌaklxix in baj tqueꞌyin aju in binchanjtz tuj tja xjal mya baꞌn; ex in cheꞌx tkꞌoꞌn ke xjal mya baꞌn tuj xitbil cye.

13 Aju xjal mintiꞌ in xi tbiꞌn tcubsbil jun xjal meba, ax icxtzun te mlay tzaj tzakꞌweꞌn oc toc ten kanil onbil.

14 Aju oyaj in xi kꞌoꞌn tuj ewaj, in chewix ju kꞌoj maꞌ t-xilen tuꞌn.

15 Aju xjal tzꞌaklxix in tzalaj tiꞌj ka in xi binchaꞌn cyiꞌj xjal tuj tumelxix, ex atzun cye xjal mya baꞌn, in tzaj xitbil cyiꞌj.

16 Aju xjal mintiꞌ in bet tuj tumel, max cpol weꞌ cyxol ke cyimni.

17 Aju xjal oꞌcx toc tcꞌuꞌj tiꞌj achbil ctel tuj mebayil, ex aju xjal oꞌcx toc tcꞌuꞌj tiꞌj vin ex tiꞌj perjum mlay tzꞌoc te kꞌinun.

18 Aju xjal binchal mya baꞌn ex sbul cbajel cꞌixbisaꞌn te t-xel ju xjal tzꞌaklxix ex baꞌn tmod.

19 Mas baꞌn tuꞌn knajan tuj lugar mintiꞌ cynajbil xjal tuj, twitzju tuꞌn kankꞌin tucꞌil jun xuꞌj txꞌuꞌj twiꞌ ex jawni kꞌojl.

20 Tuj tja ju xjal at tnabl at kꞌinumabl ex nimcu at te, atzunju xjal mintiꞌ tnabl in baj tnajsaꞌn tcyakilju at te.

21 Aju xjal nnoꞌc tilil tuꞌn tuꞌn tbet tuj tumel ex tuꞌn tten tcꞌujlalil in cnet chwinklal tuꞌn, nnoꞌc kꞌoꞌn te tzꞌaklxix ex in tcꞌmoꞌn nimbilte.

22 Aju xjal at tnabl nnoꞌc tzokpaj tiꞌj jun tnam at nim tipun, ex in che baj t-xitun ke ja te cycolbil cyib xjal aju kꞌukl cycꞌuꞌj tiꞌj.

23 Aju xjal toc tcwent tiꞌj tyol mlay tzꞌocx tkꞌoꞌn tib tuj bis.

24 Xmayil tbi ju xjal jawni twitz ex in jaw tniman tib.

25 Aju xjal cyꞌaj in cyim tuꞌnju in pon tcꞌuꞌj tiꞌj nimcu ex tcꞌiꞌ tzꞌakꞌnan;

26 tcyakil kꞌij in pon tcꞌuꞌj tiꞌj nimcu. Atzunju xjal tzꞌaklxix, in xi tkꞌoꞌn cotzbaj ex mintiꞌ in cub t-xcꞌayin.

27 Icꞌun tuꞌn Kman akeju chojbil in xi cykꞌoꞌn ke xjal binchal mya baꞌn, pyortzun ka in xi cykꞌoꞌn tucꞌil cyximbetz mya baꞌn.

28 Aju testiw nicꞌal yol cnajel; atzunju xjal in cub tbiꞌn jun yol, ax icx in xi ttzakꞌweꞌn.

29 Aju xjal binchal mya baꞌn in tyecꞌun mer ic tzaꞌn baꞌn taꞌ; atzunju xjal baꞌn tmod, segur taꞌ tiꞌj ju in tbinchaꞌn.

30 Masque nim cynabl xjal ex nim cyojtzkibl ex mejor che ximan, pero mlay che xcyeꞌ tiꞌj Dios.

31 Ate xjal in bant tten chej tuꞌn tuꞌn t-xiꞌ tuj kꞌoj, pero tuꞌn Kman in che camban xjal tuj kꞌoj.