2 Oc in tzaj ttxꞌuꞌjil jun rey, junx taꞌ ic tzaꞌn in tzanun jun balun; ex alcye jun ma tzꞌoc icꞌlente te rey, mya yaj jacu cub byoꞌn tuꞌn.

3 At nimbil te jun xjal nneꞌl tpaꞌn tib tiꞌj kꞌoj, pero aju xjal mintiꞌ tnabl ex miban bin, mas in jyon kꞌoj.

4 Oc tpon tyemp te chꞌocbil txꞌotxꞌ aju xjal cyꞌaj mintiꞌ nnoꞌc ten chꞌoquil, octzun tpon tkꞌijlalil tuꞌn tjaw chmet twitz awal cꞌoquel ten jyolte, pero mlay cnet twitz awal tuꞌn.

5 Aju t-ximbetz jun xjal tuj ewaj in bant, ic tten ic tzaꞌn jun aꞌ maꞌ t-xeꞌ, pero aju xjal at tnabl jurat nneꞌl tnicꞌ tiꞌj.

6 At nimcu xjal in cymaꞌn ka puro baꞌn ke, pero mlay cnet jun in japun tcyakil tuꞌn.

7 Aju xjal ma bet tuj tumelxix ex baꞌn tmod, at tzalajbil cye ke tcꞌwaꞌl che cyjel ten tuꞌn.

8 Oc tocx keꞌ jun rey tuj tkꞌukbil tuꞌn tcawin, jurat nneꞌl tnicꞌ tiꞌj alcye baꞌn ex alcye mya baꞌn.

9 Mi jun xjal jacu kꞌmante: Ma baj nsaksaꞌne tuj wanmiye, txꞌjoꞌntl kine ex mintiꞌtl wile.

10 Aju marc mya cabal ex aju malbil mya cabal, icꞌun ke tuꞌn Kman.

11 Cyuꞌn ke tbinchben jun cuꞌxun nneꞌl nicꞌbaj tiꞌj ka baꞌn tmod ex ka tuj tumel in bet.

12 Tuꞌn t-ẍcyin xjal in tbiꞌn ex tuꞌn tbakꞌ twitz in til; tuꞌn Kman o che bant ke jlu.

13 Miꞌn nok tana, tuꞌntzun miꞌn toca te meba. Queꞌyin jaw twitza ex cyjaꞌtzun ctel nim twaya.

14 Aju xjal lakꞌol in tmaꞌn te cꞌayil: Mya baꞌn cꞌaẍjel lu, chi, pero t-xilenxi tlakꞌon, in jaw tzalaj tiꞌj.

15 Aju xjal in yolin tucꞌil nabl, mas maꞌ toclen tyol twitz kꞌan pwak ex cywitz nimcu tal abj tbanilxix.

16 Kꞌiꞌn ela t-xbalun xjal in cyaj weꞌ tiꞌj tcꞌas juntl mintiꞌ ojtzkiꞌn tuꞌn, ex axtzun tzyuꞌn cyaja te jun prent.

17 Baꞌn nneꞌla tuj twitz xjal tuꞌn twaꞌn nok tuꞌn nicꞌaj yol, pero te tibajxi jlu, ic nnoꞌc te te ic tzaꞌn ttxaꞌ abj tuj ttziꞌ.

18 Cyuꞌn ke consej baꞌn, baꞌn in che ela keju in cub kximan; ex naꞌnxtok cyxiꞌ xjal tuj kꞌoj, baꞌn tuꞌn cycub ten ximal tiꞌj nej alcye tuꞌn tbant cyuꞌn.

19 Aju xjal ẍtakꞌil yol mlay cub tewan jun tiꞌxti tuj ewaj, cyjaꞌtzun miꞌn tzꞌoc tmojban tiba tucꞌilju xjal tcyakil in baj tyolin.

20 Aju xjal nnoꞌc yasonte tman ex ttxuꞌ, cnajel tuj klolj xobajilxix ic tzaꞌn jun candil in cub yupj.

21 Aju kꞌinumabl mya cwest in cnet t-xe tnejel, te tibajxi mlay tzꞌel baꞌn te xjal tuꞌn.

22 Miꞌn txi tmaꞌna: Cꞌajel nkꞌoꞌne t-xel mya baꞌn ma binchanjtz wiꞌje; oꞌcx keꞌc tcꞌuꞌja tiꞌj Kman ex oc cletela tuꞌn.

23 Icꞌun tuꞌn Kman ke marc mya cabal ex ke malbil mya cabal; mya baꞌn ke jlu.

24 Ate Kman ẍaklulte xjal tuj tbe; atzunte xjal mlay tzꞌel tnicꞌ tiꞌj tbe.

25 At xobajil tiꞌj xjal ka jurat ma txi ttziyan jun tyol te Dios, ex te tibajxi miꞌn japun tuꞌn aju otok txi ttziyan.

26 Aju rey at tnabl in che ex tlajoꞌn keju in che binchante mya baꞌn, ex in cub tkꞌoꞌn cycastiw cyuwxix wen.

27 Aju xewbaj o txi tkꞌoꞌn Dios te xjal tuꞌn tten tchwinklal, a jlu jun spicꞌun in baj xpichꞌun tuj tanmi xjal tuꞌn.

28 Cyuw tten jun rey tuj tcawbil ka axix toc tyol ex ka at tcꞌujlalil.

29 Aju mas in che tzalaj ke cuꞌxun tiꞌj, tuꞌnju at cyipun; atzun ke tij xjal at nimbil cye tuꞌnju ma sakix cywiꞌ.

30 Ka ma baj bjuꞌn ex ka ma baj cꞌixbisaꞌn jun xjal mya baꞌn, a jlu jun kꞌanbil nnoꞌc te te; ex tuꞌnju tcastiw xjal in cub, in sakix tuj tanmi.