2 Mya baꞌn nneꞌl jun akꞌuntl ka mi xcub ten xjal ximal tiꞌj nej; aju xjal taj tuꞌn tbant jun tiꞌxti jurat naj in tzpet tiꞌj.

3 Tuꞌnju mintiꞌ tnabl xjal nneꞌl tzpet tiꞌj tbe, ex in tmaꞌn ka tuꞌn Kman otok tzꞌel tzpet.

4 Aju xjal kꞌinun in cnet nim tamiw, atzunju xjal meba in cyaj colin cyuꞌn ke tamiw.

5 Aju testiw in tmaꞌn yol mya ax toc, mlayx tzicꞌx tiꞌj tuꞌn miꞌn tcub tcastiw; ex aju xjal nicꞌal yol mlayx clet.

6 Aju xjal baꞌn kꞌon cotzbaj, cycyakil xjal in che jyon tiꞌj, ex aju xjal baꞌn kꞌon oyaj, cycyakil xjal in che oc te tamiw.

7 Aju xjal meba nneꞌl icꞌun cyuꞌnx ke terman, pyortzun ke tamiw in che el lakꞌeꞌ tiꞌj.

8 Aju xjal taj tuꞌn toc tnabl in tcꞌujlan tib, ex aju xjal in xi tcꞌujlaꞌn xnakꞌtzbil, baꞌn cꞌelel te te.

9 Aju testiw in tmaꞌn yol mya ax toc mlayx tzicꞌx tiꞌj tuꞌn miꞌn tcub tcastiw; ex aju xjal nicꞌal yol nok camic in ayon tiꞌj.

10 Mya baꞌn tuꞌn tankꞌin jun xjal tuj achbil ka mintiꞌ tnabl, ax icx mya baꞌn tuꞌn tcawin jun majen cyibaj ke xjal maꞌ cyoclen.

11 Tuꞌnju at tnabl xjal mya jurat in jaw kꞌojl, ex jun nimbil te ka ma cub tnajsaꞌn jun mya baꞌn otok binchanjtz tiꞌj.

12 Aju tkꞌoj rey in tzaj ic tten ic tzaꞌn tkꞌajkꞌajel twiꞌ jun balun in tzanun, ex aju xtalbil in tkꞌoꞌn ic tten ic tzaꞌn tkꞌab cheꞌw in cub tibaj cꞌul.

13 Jun cꞌwaꞌlbaj mintiꞌ tnabl, jun bis jlu te tman. Aju xuꞌj jawni kꞌojl ic tten ic tzaꞌn jun tzꞌuj mintiꞌ in weꞌ.

14 Jun ja ex ju kꞌinumabl, jun etzbil jlu cyuꞌn ke mambaj; atzun jun xuꞌj at tnabl, tuꞌn Kman in tzaj tkꞌoꞌn te t-xuꞌjil jun xjal.

15 Aju xjal cyꞌaj nok watl in tzaj tiꞌj, ex aju xjal lu oc cꞌicꞌex weyaj tuꞌn.

16 Aju xjal in japun tmandamyent Kman tuꞌn nnoꞌc tcwentin tib; atzunju xjal mintiꞌ nnoꞌc tkꞌoꞌn tcwent tiꞌj alcye in bant tuꞌn, ctzajel camic tiꞌj.

17 Aju xjal in xi tkꞌoꞌn tcotz jun xjal meba, mer ic tzaꞌn tchꞌex Kman in xi tkꞌoꞌn, ex tuꞌnx Kman cꞌajel tkꞌoꞌn t-xel te.

18 Cawinx tcꞌwaꞌla acux atx ambil tuꞌn tcawinjtz, katzun mi ma txi tcawina, jacu naj cꞌwaꞌl.

19 Aju xjal nim in kꞌojin cbel tcastiw; katzun mi xcub tcastiw, mas cꞌoquel ten binchal mya baꞌn.

20 Binxa ke consej ex nimanxa aju cxel cawinte teya; cyjaꞌtzun jacu tzꞌoc tnabla.

21 Nimcu in cub t-ximan xjal tuꞌn tbant tuꞌn, pero oꞌcx in bant aju te Dios t-ximbetz.

22 Aju kajbil tiꞌj jun xjal, oꞌcx tuꞌn tten tcꞌujlalil; mas baꞌn jun xjal meba twitz jun xjal nicꞌal yol.

23 Aju xjal in xob twitz Kman, tzul kꞌoꞌn tchwinklal; oc cꞌankꞌil tuj tzalajbil ex mlay tzaj mya baꞌn tiꞌj.

24 Aju xjal cyꞌaj in xi tlamoꞌn tkꞌab tuj lak tuꞌn twaꞌn, ex mintiꞌtl nnoꞌc tilil tuꞌn tuꞌn tpon canun tuj ttziꞌ.

25 Oc tcub tcastiw jun xjal baꞌn xmayin, atzun cꞌoquel tnabl ju xjal mintiꞌ chꞌin baꞌn tuꞌn; atzunju xjal at tnabl, cꞌoquel mastl tojtzkibl oc tcub cawin.

26 Aju xjal nnoꞌc ten elkꞌal tiꞌj tman ex nneꞌx tlajoꞌn ttxuꞌ tuj tja, atzun jun cꞌwaꞌlbaj mya baꞌn ex chꞌixbajilxix tbinchben.

27 Ncꞌwaꞌl, ka mi ma txi tnimana aju cawbil teya cꞌelel tpaꞌn tiba cyiꞌj ke yol te ojtzkibl.

28 Tuꞌnju testiw nicꞌal yol mintiꞌ in xi binchet cyiꞌj xjal tuj tumelxix; aju xjal binchal mya baꞌn, oꞌcx in yolin tiꞌj yol mya baꞌn.

29 Ma bant tten castiw cbel cyibaj ke xjal baꞌn che xmayin; ax icx ma bant tten tuꞌn t-xi jatoꞌn asyal ttzal cyiꞌj xjal mintiꞌ cynabl.