2 Aju xjal mintiꞌ tnabl, mintiꞌ tgan tiꞌj tuꞌn tbant jun tiꞌxti tuꞌn; oꞌcx taj tuꞌn tbaj tyolin aju t-ximbetz.

3 Tuꞌnju mya baꞌn in tzaj tchꞌixwi xjal; ax icx in tzaj tchꞌixwi tuꞌnju in jaw tniman tib.

4 Ke tyol xjal ic cyten ic tzaꞌn jun aꞌ maꞌ t-xeꞌ, aju nabl ic tten ic tzaꞌn jun twi aꞌ in bet.

5 Mya tuj tumel in bant cyuꞌn jwes ka ma cub cyxtalin jun xjal at til, ex mya tuj tumel in cybinchaꞌn ka mintiꞌ in xi cyniman aju tcolbil tib jun xjal mintiꞌ til.

6 Aju xjal mintiꞌ tnabl nok tuꞌn ttziꞌ nnoꞌcx tkꞌon tib tuj kꞌoj, ex cyuꞌnx ke tyol jacu baj asyalin.

7 Ax ke tyol jun xjal mintiꞌ tnabl cꞌajbel te jun xitbil te; ex aju ttziꞌ nnoꞌc te jun cꞌobil te tchwinklal.

8 Aju cyyol ke xjal siꞌmil yol ic tten ic tzaꞌn jun tiꞌxti nnoꞌcx tuj cytziꞌ puro chiꞌ wen, ex max in cuꞌpun tuj cycꞌuꞌj.

9 Aju xjal cyꞌaj junx taꞌ tmod ic tzaꞌn jun xjal in cub t-xitun jun tiꞌxti.

10 Ic tten Kman ic tzaꞌn jun ja maꞌ twaꞌl ex cyuw tten, ex atzun in pon tclon tib ju xjal tzꞌaklxix ex mintiꞌ jun jacu baj tiꞌj.

11 Tuj cywitz ke xjal kꞌinun ka jacu che clet tuꞌn cykꞌinumabl, ic tzaꞌn in che clet xjal tuj jun tnam toc muro maꞌ twaꞌl tiꞌj.

12 Tuꞌnju in jaw tniman tib xjal in tzaj mya baꞌn tiꞌj; ex tuꞌnju in cub tmansin tib in tcꞌmoꞌn nimbil te.

13 Aju xjal in xi ttzakꞌweꞌn naj jun yol naꞌnxtok tbinte, mintiꞌ tnabl ex in tzaj tchꞌixwi tuꞌn.

14 Aju xjal cyuw tcꞌuꞌj nnicꞌx tuꞌn aju yabil in tzaj tiꞌj, atzunju xjal in tzaj baj tcꞌuꞌj mi jun jacu onin tiꞌj.

15 Ke xjal nneꞌl cynicꞌ tiꞌj, in cnet ojtzkibl cyuꞌn, ex ke xjal at cynabl, in che jyon tumel tuꞌn toc mastl cyojtzkibl.

16 Nok tuꞌn jun oyaj in xi tkꞌoꞌn xjal jacu tzaj biꞌn tyol, ex jacu pon max cywitz ke xjal maꞌ cyoclen.

17 Aju xjal in pon nej twitz jwes tuꞌn tclonte tib, mer ic tzaꞌncu mintiꞌ til, pero oc tpon tajkꞌoj nnoꞌc tuj xjel tuꞌn jwes, atzun in jaw tzꞌak twitz, tuꞌnju in nicꞌan yol.

18 Tuꞌnju in jaw cyiꞌn xjal swert in baj twiꞌ jun kꞌoj, ex in che el tpaꞌn ke xjal maꞌ cyoclen tuꞌn miꞌn cykꞌojintl.

19 Oc tetz tkꞌoj jun xjal tucꞌil terman, mas cyuw tuꞌn tten cymojbabl cyib juntl maj twitzju tuꞌn tcub tiꞌj jun tnam toc muro tiꞌj. Ex aju kꞌoj tcub cyxol ic tten ic tzaꞌn tpwertil tnam lamoꞌn wen, mi jun baꞌn tocx tuj.

20 Jun xjal in kꞌon consej baꞌn in tzalaj tiꞌj jlu, mer ic tzaꞌn otok baj waꞌn.

21 Aju xjal in yolin tiꞌj ju mya baꞌn, in tzaj camic tuꞌn, ex ju xjal baꞌn tyol, in tzaj chwinklal tuꞌn; ke xjal nim in che yolin che cꞌixbisetel tuꞌn jlu.

22 Aju xjal in cnet t-xuꞌjil, in cnet ju baꞌn tuꞌn ex in tcꞌmoꞌn t-xtalbil Dios.

23 Aju xjal meba in cubsan twitz oc tyolin; atzunju xjal kꞌinun in xi ttzakꞌweꞌn tucꞌil tkꞌoj.

24 At junjun tamiw xjal in tzaj cyiꞌn xitbil tiꞌj, ex at junjun tamiw xjal mas mojl cycꞌujlalil tucꞌil twitz tcꞌujlalil jun terman.