2 Aju majen at tnabl ccawil tibaj tcꞌwaꞌl tpatrón, aju cꞌwaꞌl chꞌixbajilxix tbinchben, ex aju majen lu at toclen tiꞌj ju etzbil junx cyucꞌil ke mastl tcꞌwaꞌl tpatrón.

3 Aju kꞌan pwak tucꞌix sak pwak, tuꞌn kꞌakꞌ in che baj saksaꞌn, ax icxtzun in baj tmaloꞌn Kman aju t-ximbetz xjal.

4 Ke xjal binchal mya baꞌn ex nicꞌal yol in xi cykꞌoꞌn cywiꞌ cyiꞌj yol mya baꞌn.

5 Aju xjal in xmayin tiꞌj meba, ax icx in xmayin tiꞌj Dios aju Binchalte te; ex aju xjal in jaw tzalaj tiꞌj ju mya baꞌn in tzaj tiꞌj juntl, mlay tzicꞌx tiꞌj tuꞌn miꞌn tcub tcastiw.

6 Ke tal cychman tij xjal in che oc te jun tzalajbil te cye; ex ke mambaj in che oc te jun tzalajbil cye cycꞌwaꞌl.

7 Aju xjal mintiꞌ tnabl, mya tuj tumel tuꞌn tyolin cyiꞌj nmak yol, ex jun xjal maꞌ toclen, mya tuj tumel tuꞌn tyolin tucꞌil sbubl.

8 Aju xjal in xi oyinte pwak te juntl, tuj twitz ka at tipumal pwak tuꞌn tcambante nok alcye tajbil, ex tcyakilju in bant tuꞌn baꞌn nneꞌla te te.

9 Aju xjal nnicꞌx tiꞌj tuꞌn aju mya baꞌn in binchanjtz tiꞌj, in ten tmojbabl tib cyucꞌil mastl; atzunju xjal in baj tyolin ke cypaltil xjal, tuꞌnx in che el lakꞌeꞌ ke tamiw tiꞌj.

10 Nim tajben te jun xjal at tnabl oc t-xi cawin tuꞌn juntl twitzju tuꞌn t-xi jatoꞌn jun syent tasyal jun xjal mintiꞌ tnabl.

11 Aju xjal miban bin oꞌcx in jyon tiꞌj kꞌoj, pero tzul samaꞌn jun sanjel te cꞌixbisalte.

12 Maslo baꞌn tuꞌn koc noj twitz jun ttxuꞌ oso otok tzaj tkꞌoj tuꞌn tlaj otok che el kꞌiꞌn ke tal, twitzju tuꞌn kcꞌulbante kib tucꞌil jun xjal mintiꞌ tnabl ex tkꞌon tib tuj tchcyinibil.

13 Mlayx tzꞌel tpaꞌn tib aju mya baꞌn tiꞌj tja xjal aju in aj tkꞌoꞌn mya baꞌn te t-xel ju baꞌn.

14 Aju xjal in tzaj jyonte kꞌoj junx taꞌ jlu ic tzaꞌn nneꞌtz pax jun aꞌ ex nim in naj tuꞌn; mas baꞌn tuꞌn tel oka naꞌnxtok t-xiꞌ kꞌoj tuj tilil.

15 Aju tuꞌn miꞌn tcub t-sentens jun xjal at til ex tuꞌn tcub t-sentens jun xjal mintiꞌ til, cycabil jlu mintiꞌ in tzalaj Kman tiꞌj.

16 ¿Ti tajben te xjal mintiꞌ tnabl ka taj tuꞌn tlakꞌonte ju nabl tuꞌn tpwak ex mintiꞌ tojtzkibl?

17 Aju tamiw jun xjal cucx in ten tcꞌujlalil tiꞌj, ex oc ttzaj jun mya baꞌn tiꞌj, nnoꞌc tamiw ic tzaꞌn jun terman.

18 Aju xjal mintiꞌ tnabl in cyaj weꞌ tiꞌj tcꞌas tamiw, ex in cyaj ten cꞌas tuj tcwent.

19 Aju xjal nim tgan tuꞌn tkꞌojin, ax icx at tgan tuꞌn tbinchante il; ex aju xjal in baj tyolin tib, tuꞌnx in tzaj tiꞌn jun xitbil tibaj.

20 Aju xjal jumajx taꞌ tnabl tuj mya baꞌn, mlayx cnet ju baꞌn tuꞌn; ex aju xjal jawni yolin, ctzajel mya baꞌn tibaj.

21 Aju cꞌwaꞌlbaj miban niman, bis in tzaj tiꞌj tman tuꞌn; ex aju cꞌwaꞌlbaj mintiꞌ tnabl, mintiꞌ in tzalaj tmaꞌn tuꞌn.

22 Ka at tzalajbil tuj tanmi xjal, a jlu mer ic tzaꞌn jun kꞌanbil te te, katzun in bisun, in baj tipun t-ximlal tuꞌn.

23 Aju xjal mya baꞌn in xi tcꞌmoꞌn ke oyaj tuj ewaj, tuꞌntzun miꞌn tcub tkꞌoꞌn cycastiw ke xjal at cyil.

24 Aju xjal at tnabl, ax tcub ojtzkibl twitz, atzunju xjal mintiꞌ tnabl, nok in chꞌexpajeꞌ t-ximbetz.

25 Aju cꞌwaꞌlbaj mintiꞌ tnabl in tzaj tbis tman tuꞌn, ex in tzaj taꞌw tuj tanmi ttxuꞌ tuꞌn.

26 Ax toc mya baꞌn tuꞌn tcub t-sentens jun xjal mintiꞌ til, ax icx mya baꞌn tuꞌn tbaj asyalit jun xjal maꞌ toclen in tbinchaꞌn aju tzꞌaklxix.

27 Aju xjal at tnabl, mya nim yol in yolin tiꞌj, ex aju xjal at tojtzkibl, mya jurat in jaw cyakpaj.

28 Ka ma cub txuleꞌ ju xjal mintiꞌ tnabl ex ka mintiꞌ ma kꞌajt, nnoꞌc kꞌoꞌn cyuꞌn xjal mer ic tzaꞌn at tnabl.