2 Tuj twitz xjal ka baꞌn tcyakilju in tbinchaꞌn, pero ate Kman in baj malonte t-ximbetz xjal ka baꞌn ex ka miꞌn.

3 Kꞌonxa tuj tkꞌab Kman tcyakil aju in bant tuꞌna, ex baꞌntzun cꞌelel aju ma cub t-ximana tuꞌn tbant.

4 Tcyakil o tbincha Kman tuꞌn tjapun baj, aju ximamajtl tuꞌn; ax icxpe ke xjal binchal mya baꞌn tuꞌn cyten tuj kꞌij te cꞌixbisabl.

5 Icꞌun tuꞌn Kman ke xjal in jaw cyniman cyib; ax toc mlay tzicꞌx tiꞌj tuꞌn miꞌn tcub cycastiw.

6 Ka at tcꞌujlalil xjal ex ka in yolin axix toc, jacu najset til; ka in niman xjal te Kman, nneꞌl tpaꞌn tib tiꞌj ju mya baꞌn.

7 Ka in tzalaj Kman tiꞌj tbinchben jun xjal, cyucꞌixpe ke aj kꞌoj tiꞌj in bant cyten tucꞌil.

8 Mas baꞌn nok chꞌin at ke, pero tuj tumelxix otok cnet kuꞌn, twitzju nimcu at ke, pero mya tuj tumel otok cnet.

9 In baj t-ximan xjal alcye tuꞌn tbant tuꞌn, atzunte Kman ẍaklul te.

10 Mlay cub tkꞌoꞌn rey cysentens xjal mya tuj tumel, porque a Dios in kꞌonte tnabl.

11 Atzun taj Dios tuꞌn tbaj malet tcyakil tuj balans cabalxix, ex tuꞌn o che binchet ke marc in che ajben te malbil.

12 Icꞌun cyuꞌn rey ke xjal binchal mya baꞌn, porque aju cycawbil rey in cyuwsanjtz tuꞌnju cybinchben tuj tumelxix in bant.

13 Ke xjal in che yolin tuj tumelxix, cꞌujlaꞌn ke tuꞌn rey, ax icx in tzalaj cyiꞌj keju axix toc cyyol.

14 Ka ma tzaj tkꞌoj rey, tkanil camic jlu, atzunju xjal at tnabl, nnoꞌc tilil tuꞌn tuꞌn tchewix tkꞌoj rey.

15 Ka in tzalaj twitz rey tiꞌj ju xjal in pon twitz, at tchwinklal xjal tuꞌn jlu, ex aju xtalbil in tkꞌoꞌn ic tten ic tzaꞌn muj in tzaj jbal tuꞌn.

16 Aju tuꞌn toc knabl, mas maꞌ t-xilen jlu twitz kꞌan pwak; ex aju tuꞌn tten kojtzkibl, mas maꞌ t-xilen jlu twitz sak pwak.

17 Aju cybe ke xjal tzꞌaklxix tpaꞌn tib tiꞌj ju mya baꞌn; ex ka toc tcwent xjal tiꞌj tbinchben, in cub tcwentin tib.

18 Tuꞌnju in jaw tniman tib xjal in tzaj xitbil tiꞌj; ex tuꞌnju jawni twitz in cub tzꞌak.

19 Mas baꞌn tuꞌn tcub kmansin kib cyxol ke xjal meba twitzju tuꞌn koc te kꞌinun cyucꞌil ke xjal in jaw cyniman cyib.

20 Ka ma txi tniman xjal aju xnakꞌtzbil in xi kꞌoꞌn te, baꞌn nneꞌla te te; ex aju xjal kꞌukl tcꞌuꞌj tiꞌj Kman, at tzalajbil te.

21 Aju xjal at tnabl nneꞌl tkanil tiꞌj ka at tnabl; cyuꞌn ke yol baꞌn tbinx in cub tiꞌj cynabl xjal tuꞌn.

22 Aju xjal at tnabl, jun chwinklal jlu te te; atzunju xjal mintiꞌ tnabl, in tzaj tcastiw tuꞌn jlu.

23 Aju xjal at tnabl, toc tcwent tiꞌj tyol, ex in cub tiꞌj cynabl xjal tuꞌn tyol.

24 Aju yol baꞌn tbinx ic tten ic tzaꞌn taꞌl cab puro chiꞌ wen: chiꞌxix in pon tiꞌj tcꞌuꞌj xjal tuꞌn, ex in tkꞌoꞌn acꞌaj tipumal.

25 At be jikun tiꞌj tuj twitz xjal, pero aju bajsbil te in pon tuj camic.

26 Tuꞌnju in tzaj el tcꞌuꞌj xjal, cyjaꞌtzun in akꞌnan; porque oc tnaꞌnte xjal weꞌyaj in jaw weꞌ tuꞌn takꞌnan;

27 Aju binchal mya baꞌn, oꞌcx in ximan tiꞌj tuꞌn tbinchante mya baꞌn tiꞌj juntl, ex ke tyol ic cyten ic tzaꞌn tkan kꞌakꞌ.

28 Aju xjal tkꞌon tib jumajx tuj mya baꞌn, nok kꞌoj in jyon tiꞌj; ex aju xjal siꞌmil yol, nok icꞌbil in tkꞌoꞌn cyxol xjal cyamiwxix cyib.

29 Aju xjal mya baꞌn in cub t-sbuꞌn tucꞌil ex in xi tiꞌn tuj be mya baꞌn;

30 in cub t-xmutzꞌin ttzi twitz oc in cub ten ximal tuꞌn tbinchante mya baꞌn; ex in che cub tbetzꞌan ke ttxoꞌw ttziꞌ cyuꞌn ke twitz teꞌ oc tbinchante mya baꞌn.

31 Oc t-sakix twiꞌ jun xjal, nnoꞌc ic tzaꞌn jun coron te nimbil te, ma tcamba jlu tuꞌnju baꞌn tbinchben.

32 Mas baꞌn ka mya jurat in ko jaw kꞌojl twitzju tuꞌn koc cyuw kcꞌuꞌj; mas baꞌn ka ma kjacꞌunte kib kuꞌnx kib twitzju tuꞌn tcub tiꞌj jun tnam kuꞌn.

33 In jaw tiꞌn xjal swert tiꞌj tuꞌn tlonte alcye tuꞌn tbant tuꞌn; pero ate Kman in tzaj yecꞌunte te alcye tuꞌn tbant tuꞌn.