2 Nim yol te kꞌobl nabl in che yolin ke xjal at cynabl tiꞌj, atzun ke xjal mintiꞌ cynabl oꞌcx in che yolin tiꞌj yol mintiꞌ tajben.

3 Tuj tcyakil lugar at Kman Dios, ex in kꞌon cwent cyiꞌj ke xjal baꞌn ex cyiꞌj ke mya baꞌn.

4 Aju yol at tchyaꞌl in tzaj tkꞌoꞌn kchwinklal, atzunju yol puro ploj in ko cꞌixbi tuꞌn.

5 Aju xjal mintiꞌ tnabl mintiꞌ in cub tuj twitz oc toc mayoꞌn tuꞌn tman; atzunju xjal niman tman tuꞌn in tzaj tyecꞌun ka at tnabl.

6 Nim tiꞌxti at tuj tja ju xjal tzꞌaklxix, atzunju xjal mya baꞌn mintiꞌ in xi tnicꞌben aju in tcambaꞌn.

7 Ke xjal at cynabl in cykꞌoꞌn ojtzkibl cye mastl, atzun ke xjal mintiꞌ cynabl mintiꞌ in cybinchaꞌn icju.

8 Aju oyaj in cykꞌoꞌn ke xjal mya baꞌn, mintiꞌ in xi tcꞌmoꞌn Kman, atzunju cynaꞌj Dios ke xjal tzꞌaklxix, in xi tcꞌmoꞌn Kman tucꞌil tzalajbil.

9 Icꞌun tuꞌn Kman aju cybinchben ke xjal mya baꞌn, atzunju xjal in bet tuj tumel cꞌujlaꞌn tuꞌn Kman.

10 Aju xjal in cyaj tcolin ju be baꞌn, baꞌn tuꞌn t-xi cawit cyuw; atzunju nneꞌl ticꞌun cawbil te, cymel.

11 Twitz Kman tcubsaꞌn ju camic tucꞌix ju cynajbil cyimni, ax icx tcubsaꞌn twitz aju cyximbetz xjal.

12 Aju xjal jawni twitz mintiꞌ in tcꞌujlaꞌn aju nnoꞌc mayonte te tiꞌj mya baꞌn, ex mintiꞌ nnoꞌc tmojban tib cyucꞌil keju at cynabl.

13 Aju xjal in tzalaj tanmi, ax icx in tzalaj twitz, ex aju xjal bis taꞌ, biꞌx in tzaj taꞌw tuj tanmi.

14 Aju xjal at tnabl in jyon tiꞌj ojtzkibl, atzunju xjal mintiꞌ tnabl oꞌcx toc tcꞌuꞌj tiꞌj ju mintiꞌ tajben.

15 Cycyakil kꞌij mya baꞌn in che ela teju xjal in bisun, atzunju xjal in tzalaj, cycyakil kꞌij in che oc puro baꞌn te te.

16 Mas baꞌn tuꞌn kniman te Kman Dios masque meba xjal koꞌ, twitzju tuꞌn koc kꞌinun ex tuj bis in ko ankꞌin.

17 Mas baꞌn ka at kcꞌujlalil masque nok itzaj kchiꞌ, twitzju chibj kchiꞌ ex at icꞌbil kxol.

18 Aju xjal jurat in jaw kꞌojl, nok kꞌoj in jyoꞌn tiꞌj; atzunju xjal mintiꞌ in tzaj naj tkꞌoj, in cub yupj kꞌoj tuꞌn.

19 Tuj twitz ju xjal cyꞌaj mer ic tzaꞌn chꞌiꞌx tcub tuj tbe; atzunju xjal tzꞌaklxix, aju tbe puro ktzꞌumin tuj.

20 Aju cꞌwaꞌlbaj at tnabl, jun tzalajbil jlu te tman; atzunju cꞌwaꞌlbaj mintiꞌ tnabl, jun bis jlu te ttxuꞌ.

21 Aju xjal mintiꞌ tnabl in tzalaj tuꞌnju mintiꞌ tnabl; atzunju xjal at tnabl tuj tumel in bet tuj tbe.

22 Mintiꞌ in japun aju in cub cyximan xjal ka mi aꞌl jun kꞌol cyconsej; pero ka at nim kꞌol consej baꞌn nneꞌla jlu.

23 At tzalajbil teju xjal in tzakꞌwet ju yol tuꞌn, ex mas at tzalajbil te ka ma tzakꞌwet tuꞌn oc tajben.

24 Aju be tbeyil chwinklal cyjaꞌ in xiꞌ jawni, ex in clet ju xjal at tnabl tuꞌn tuꞌn miꞌn tcuꞌx tuj cynajbil cyimni.

25 In cub t-xitun Kman tja ju xjal in jaw tniman tib, ex in tcyuwsaꞌn aju tetzbil meba xuꞌj.

26 Icꞌun tuꞌn Kman aju cyximbetz ke xjal binchal mya baꞌn, atzun ke yol mintiꞌ cypaltil in tzalaj cyiꞌj.

27 Aju xjal in pon tcꞌuꞌj tiꞌj nimcu, tuꞌnx in che naj keju ateꞌ tuj tja; atzunju xjal mintiꞌ in tcꞌmoꞌn pwak tuꞌn miꞌn tcub cysentens xjal tuꞌn, oc cꞌankꞌil.

28 Aju xjal tzꞌaklxix, nej in cub ten ximal tiꞌj alcye yol tuꞌn t-xiꞌ ttzakꞌweꞌn, atzunju xjal binchal mya baꞌn, nok nneꞌtz chitj yol mya baꞌn tuj ttziꞌ.

29 Nneꞌl tpaꞌn tib Kman cyiꞌj xjal binchal mya baꞌn, atzun ke xjal tzꞌaklxix in tzaj tbiꞌn cynaꞌj Dios.

30 Aju xjal in ko tzaj tqueꞌyin tucꞌil tzalajbil in ko tzalaj tuꞌn; ex aju tkanil baꞌn in tkꞌoꞌn acꞌaj kipumal.

31 Aju xjal in xi tniman aju cawbil tuj tumelxix ctel cyxol ke xjal at cynabl.

32 Aju xjal mintiꞌ in xi tniman cawbil te, tuꞌnx tib nneꞌl ticꞌun tib; atzunju xjal in xi tniman cawbil te, nnoꞌc mastl tnabl.

33 Ka in ko xob twitz Dios, tuꞌn jlu in tzaj kꞌoꞌn xnakꞌtzbil ke tuꞌn tten knabl; ka kajbil tuꞌn kcꞌmonte nimbil ke, tnejel il tiꞌj tuꞌn tcub kmansin kib.